1, 2. Hadia zalua khö Waulo hegöi Sila ba Wilifi? (Faigi gambara ba wamobörö wamaha’ö.)

KHALAIGÖ zalua andre. Ba zi talu mbongi, darua utusan injil sotöi Faulo hegöi Sila, labe’e ira ba gurunga tanö bakha ba zogömi-gömi ba mbanua Wilifi. Tebai lafaliwa ira börö me no lakalo gahera ba afökhö döla hulura börö me no laböbözi ira. (Halöwö Zinenge 16:23, 24) Ba zi laluo, niha sato si so ba da’ö ladöni Waulo hegöi Sila bakha ba fasa khö ndra samatörö. La’anemai’ö lahuku ira. Lasika mbaru ba laböbözi ira faoma eu. (Halöwö Zinenge 16:16-22) Lafalua khöra zi lö atulö! Faulo andre niha Romawi, ba no sinangea itema wanguhuku si tefaudu. *—Faigi nisura ba gahe zura.

² Me so Waulo ba gurunga, te i’angeraigö hadia zalua ba zi ma’ökhö andrö hegöi sanandrösa ba niha si toröi ba Wilifi. Lö hadöi sinagoga ba da’ö, tenga simane ba mbanua  bö’ö si no irai i’ondrasi Faulo. Da’ö mbörö wa baero ba mbawa göli ba zinga nidanö lafalua wamosumange ira niha Yahudi. (Halöwö Zinenge 16:13, 14) Hadia alua da’ö börö me lö ikhamö dafulu niha Yahudi si toröi ba mbanua da’ö, si tobali dane-dane ba wangokhögö sambua sinagoga? Niha si toröi ba Wilifi omuso sibai dödöra tobali niha Romawi. (Halöwö Zinenge 16:21) Te da’ö mbörö wa lö tumbu ba wangera-ngera wa Faulo hegöi Sila tola tobali ira ono mbanua Romawi hewa’ae ya’ira andre niha Yahudi. Lö ta’ila sibai zindruhunia, hiza’i ta’ila wa lö atulö wame’era bakha ba gurunga Waulo hegöi Sila.

3. Hana wa manofu-nofu dödö Waulo me labe’e ia ba gurunga, hiza’i hadia mbua-bua ni’okhögönia?

³ Te i’angeraigö göi Faulo hewisa wa tola ofeta ia ba Wilifi. Ba zi hauga waŵa silalö, toröi Waulo ba zinga Nasi Aegea ba Asia Kecil. Me so ia ba da’ö, no hauga kali lö ifatenge ia eheha ni’amoni’ö ba wanuriaigö ba zi hauga mbanua si so ba da’ö. Hulö ifarou ia eheha ni’amoni’ö we’amöi ba mbanua bö’ö. (Halöwö Zinenge 16:6, 7) Hiza’i, hezoso? Me so ia ba Deroa, itema gangilata Faulo sanguma’ö khönia, ”Ae si yefo, ba Makedonia.” Ba da’a oroma hadia zomasi Yehowa! Andrö wa lö itaha-taha ia Faulo ba we’amöi ba Makedonia. (Baso Halöwö Zinenge 16:8-10.) Hiza’i, hadia zalua aefa da’ö? Lö ara me no aefa irugi Makedonia, labe’e ia ba gurunga! Hana wa itehegö alua da’ö Yehowa khö Waulo? Hawa’arania bakha ba gurunga? Hewa’ae na manofu-nofu Waulo ba zalua andre, lö mamalö aro wamatinia ba owua-wua dödönia. ”Mangandrö Waulo, awö Zila, lasuno Lowalangi.” (Halöwö Zinenge 16:25) Fa’ohahau dödö moroi khö Lowalangi zame’e khöra fa’ahono dödö hegöi fa’ohahau wangera-ngera.

4, 5. (a) Hewisa wa tola fagölö zalua khöda simane salua khö Waulo? (b) Hewisa zalua khö Waulo tola tebulö ba zi lö mudöna-döna?

⁴ Hadia no irai örasoi simane nirasoi Waulo? Te no irai ö’andrö khö Lowalangi ba wanolo ya’ugö ba wangai angetula, ba wamaigimö no ö’o’ö fefu wanuturu lala moroi ba geheha ni’amoni’ö. Hiza’i, oya wanandraigö salua khömö mazui moguna öfalua wombulö’ö sebua ba lala wa’aurimö. (Zangombakha 9:11) Iada’a, ba ginötö ö’angeraigö zalua andre, te manofu-nofu ndra’ugö hana wa itehegö alua da’ö Yehowa. Hadia zanolo ya’ugö ena’ö tola anau gölömö ba tola öfaduhusi tödö Yehowa? Tola ta’ila wanema linia moroi ba zalua khö Waulo hegöi Sila aefa da’ö.

⁵ Me manunö Waulo hegöi Sila, oya zalua si lö mudöna-döna. Si oföna, alua ndruru danö sabölö-bölö. I’anemai’ö teboka mbawandruhö gurunga. Alulu fefu rate nifasa ba niha gurunga. Aefa da’ö, itaha safi gurunga andrö Faulo sedöna mamunu ya’ia samösa. Buania, tebayagö ia idanö hegöi ösi nomonia. Ba zihulö wongi aefa da’ö, lafatenge zohalöwö ira samatörö ba wolohe Faulo hegöi Sila baero ba gurunga ba la’andrö khöra ena’ö laröi mbanua da’ö si fao fa’owua-wua dödö. Me la’ila ira samatörö wa Faulo hegöi Sila no ono mbanua Romawi, aboto ba dödöra wa no lafalua zala sebua ba möi ira lafasao baero Waulo  hegöi Sila. Hiza’i, fatua lö laröi mbanua andrö, möi Waulo hegöi Sila ba wangondrasi Lidia, talifusöra alawe sawena mubayagö idanö. Ba la’oguna’ö ginötö da’ö ba wangaro’ö ndra talifusö tanö bö’ö ba Wilifi. (Halöwö Zinenge 16:26-40) Alio sibai tebulö zalua!

6. Hadia nitutunöda ba wamaha’ö da’a?

⁶ Hadia wamaha’ö khöda ba zalua andre? Tola ifalua hadia zi lö tadöna-döna Yehowa, andrö wa lö moguna abu sibai dödöda na tataögö wanandraigö. Ta’ila wa tebai i’olifugö wamaha’ö da’ö Faulo. Oroma da’ö ba zura nibe’enia khö ndra talifusöda ba Wilifi sanandrösa ba wa’aombö-aombö dödö hegöi fa’ohahau dödö moroi khö Lowalangi. Ba wamaha’ö da’a, tatutunö wehede Waulo si so ba Filifi 4:6, 7. (Baso.) Aefa da’ö, tafaigi göi duma-duma moroi ba Zura Ni’amoni’ö sangoroma’ö wa ifalua Yehowa hadia zi lö mudöna-döna. Safuria, tatutunö hewisa ’wa’ohahau dödö moroi khö Lowalangi’ möi fanolo ena’ö anau gölöda ba wanaögö fanandraigö si fao fa’afaduhu dödö khö Yehowa.

7. Hadia wamaha’ö nibe’e Waulo me isura zurania khö ndra talifusöda ba Wilifi, ba hadia wamaha’ö khöda?

⁷ Me labaso zura Waulo ira talifusöda si so ba Wilifi, hadia zi so ba wangera-ngerara? Ato ba gotaluara, ifuli itörö tödöra hadia zalua khö Waulo hegöi Sila ba hadia lala si lö mudöna-döna nifalua Yehowa ba wanolo ya’ira. Hadia wamaha’ö nibe’e Waulo ba zurania? Famaha’önia: Böi busi tödö. Angandrö ba tema ’wa’ohahau dödö moroi khö Lowalangi sabölö moroi ba gera-era niha fefu’. Hadia geluahania? Iwa’ö Faulo wa ’fa’ohahau dödö moroi khö Lowalangi’ abölö sökhi ia moroi ba nikhalaigöda. Itaria lö ta’ila hewisa wangasiwaisi gabula dödöda, hiza’i tola ifalua da’ö Yehowa. Ba tola ifalua ngawalö zi lö tadöna-döna.​—Baso II Fetero 2:9.

8, 9. (a) Hewa’ae itaögö walö’atulö Faulo ba Wilifi, hadia mbua si sökhi börö zalua andrö? (b) Hana wa faduhu sibai dödö ndra talifusöda si so ba Wilifi ba wehede Waulo?

⁸ Te’aro’ö ndra talifusöda ba Wilifi ba zura nibe’e Waulo na la’angeraigö hewisa wanolo Yehowa ya’ira ba zi fulu fakhe silalö. Hewa’ae itehegö Yehowa khö Waulo hegöi Sila ba wanaögö falö’atulö, hiza’i salua andre tobali ’famaduhu’ö turia somuso dödö, ba ba wanga’aro’ö ya’ia’. (Filifi 1:7) Ira samatörö ba mbanua Wilifi, ata’u ira sa’ae ba wolohi mbanua niha Keriso si bohou. Te börö me no iwa’ö Faulo wa ya’ia andre niha Romawi, andrö wa lö mofanö Luka ba Wilifi hewa’ae no mofanö Waulo hegöi Sila. Oya  wanolo nibe’e Luka ba niha Keriso si bohou ba Wilifi.

⁹ Me labaso zura nibe’e Waulo ira talifusöda ba Wilifi, la’ila wa fehede da’a tenga ha bua gera-era zi samösa niha. No göna fanandraigö sabölö-bölö Waulo. No lakuru ia ba nomonia ba Roma me isura zurania khö ndra talifusöda. Hiza’i, lö mamalö iforoma’ö wa irasoi ’wa’ohahau dödö moroi khö Lowalangi’.​—Filifi 1:12-14; 4:7, 11, 22.

10, 11. Hadia zinangea tafalua na so khöda wa’aombö-aombö dödö börö gabula dödö, ba hadia nitötönada?

¹⁰ Hadia zanolo ya’ita ena’ö lö talafo ’tabusi tödö hadia ia’, hiza’i ta’okhögö ’wa’ohahau dödö moroi khö Lowalangi’? Fehede Waulo ba niha Filifi mangoroma’ö wa ba ginötö tarasoi wa’aombö-aombö dödö ba gabula dödöda, dalu-dalunia ya’ia da’ö fangandrö. Andrö, ba ginötö tarasoi wa’aombö-aombö dödö, moguna tatou’ö da’ö ba wangandrö. (Baso I Fetero 5:6, 7.) Ba ginötö mangandrö ndra’ugö khö Yehowa, faduhusi tödö wa hasambalö irorogö ndra’ugö. Böi mamalö andrö saohagölö ba ngawalö howu-howu nitemamö. Böi irai olifu’ö wa tola ifalua fefu hadia ia Yehowa ”italu’i ni’andröda, awö zi faböbö ba gera-erada”.​—Efeso 3:20.

¹¹ Simane Faulo hegöi Sila, te tokea ita ba nifalua Yehowa ba wanolo ya’ita. Hewa’ae tenga sahöli-höli dödöda da’ö, hiza’i hasambalö tefaudu ba zoguna khöda. (I Korindro 10:13) Tenga da’ö geluahania wa ibönö na ha modadao manö ita, lö tafalua hadia ia, ba tabaloi manö wa i’asiwaisi zalua mazui abula dödöda andrö Yehowa. Hiza’i, moguna tafaudugö nifaluada simane fangandröda. (Roma 12:11) Moroi ba nifaluada oroma wa soroi ba dödö tabe’e gofu hadia ia khö Yehowa ena’ö ifahowu’ö ita. Böi olifu ita wa tola ifalua gofu hadia ia Yehowa töra moroi ba ni’andröda mazui nitötönada. Itaria ifalua zi lö ikhamö fangera-ngerada irege tola manö tokea ita. Andrö, data’angeraigö duma-duma si tola manga’aro’ö wa’afaduhu dödöda ba wa’abölö Yehowa ba wamalua ngawalö zi lö tadöna-döna.

12. (a) Hadia nifalua Razo Hizikia me ifeta’u ia Razo Saneribi? (b) Hadia wamaha’ö nihalöda moroi ba lala nifalua Yehowa ba wangasiwaisi abula dödö?

¹² Ba Zura ni’amoni’ö, oya ta’ila duma-duma nifalua Yehowa ba zi lö mudöna-döna. Duma-dumania, me mamatörö Razo Hizikia ba Yehuda, tohare razo Asiria sotöi Saneribi ba wanuwö Yehuda. No ladudugö fefu mbanua tanö bö’ö, hatö Yeruzalema zi lö mududugöra. (II Razo 18:1-3, 13) Aefa da’ö, möi isuwö Yeruzalema Saneribi. Hadia nifalua Razo Hizikia? Si oföna, ilau mangandrö khö Yehowa, ba i’andrö wanuturu lala moroi khö zama’ele’ö Yehowa sotöi Yesaya. (II Razo 19:5, 15-20) Aefa da’ö, iforoma’ö wa’atua-tua Hizikia me ibe’e hadia ni’andrö Zaneribi. (II Razo 18:14, 15) Safuria, ifa’anö mbanuania Hizikia börö me ara ginötö ba wamasui nifalua ndrawa Asiria. (II Nga’ötö 32:2-4) Hewisa lua-luania zalua andrö? Ifatenge  mala’ikania Yehowa ba wamunu 185.000 zaradadu Zaneribi ba zi sara wongi. Lö irai tumbu ba wangera-ngera Hizikia wa alua da’a!​—II Razo 19:35.

13. (a) Hadia wamaha’ö khöda ba zalua khö Yosefo? (b) Hadia zi lö mudöna-döna salua khö Sara?

¹³ Angeraigö hadia zalua khö ndra matua si bohou ebua sotöi Yosefo. Me so ia ba gurunga ba danö Miserai, lö irai ikhalaigö Yosefo wa tobali ia samatörö numero dua ba Miserai mazui i’oguna’ö ia Yehowa ba wangorifi ösi nomonia moroi ba mbaŵa lofo sabölö-bölö. (I Moze 40:15; 41:39-43; 50:20) Fefu nifalua Yehowa töra moroi ba nitötöna Yosefo. Angeraigö göi sanandrösa khö nene Yosefo sotöi Sara. Hadia manötöna Sara ba wa’atuania wa ibe’e khönia nono matua Yehowa, tenga ha ono zawuyunia ira alawe? Sindruhu-ndruhu lö irai ikhalaigö Sara wa’atumbu Giza’aki.​—I Moze 21:1-3, 6, 7.

14. Hadia zi tola tafaduhusi tödö khö Yehowa?

¹⁴ Lö manötöna ita wa ifalua Yehowa dandra sahöli-höli dödö ba wangasiwai fefu gabula dödöda fatua lö tohare gulidanö si bohou. Ba lö ta’andrö khö Yehowa ba wamalua ngawalö zahöli-höli  dödö ba wa’aurida. Hiza’i, ta’ila wa no itolo nono mbanuania si lö faröi ba götö föna Yehowa ba lala sahöli-höli dödö. Ba lö si tebulö ia. (Baso Yesaya 43:10-13.) Da’a zame’e fa’afaduhu dödö khöda wa tola ibe’e khöda wa’abölö ni’oguna’öda ba wamalua somasi ia. (II Korindro 4:7-9) Hadia wamaha’ö nihalöda moroi ba duma-duma Hizikia, Yosefo hegöi Sara? Na lö faröi ita khö Yehowa, tola itolo ita hewa’ae ba ginötö si basaki.

15. Hadia zanolo ya’ita ba wangokhögö ’fa’ohahau dödö moroi khö Lowalangi’ hewa’ae na so gabula dödöda, ba hewisa wa tola alua da’ö?

¹⁵ Hewisa ena’ö tola ta’okhögö ’wa’ohahau dödö moroi khö Lowalangi’ hewa’ae na so gabula dödöda? Moguna tarorogö ena’ö lö mamalö aro wahuwusada khö Yehowa. Alua wahuwusa simane da’ö börö höli nibe’e Yesu Keriso. Höli no sambua mbuala sahöli-höli dödö nibe’e Yehowa. Börö höli, tola i’efa’ö horöda, tola ta’okhögö dödö side-ide si lö sinegu ba tola ahatö ita khönia.​—Yohane 14:6; Yakobo 4:8; I Fetero 3:21.

16. Hadia zalua na tatema ’wa’ohahau dödö moroi khö Lowalangi’? Be’e duma-duma.

¹⁶ Hadia zalua ba ginötö tatema ’wa’ohahau dödö moroi khö Lowalangi, sabölö moroi ba gera-era niha fefu’? Imane Sura Ni’amoni’ö wa ”irorogö” dödö hegöi fangera-ngerada. (Filifi 4:7) Ngawua wehede ”irorogö” mo’amakhaita ia ba ngawawa ndra saradadu solumö’ö zi sambua soi. Ba mbanua Wilifi, so sambua ngawawa zolumö’ö niha si toröi ba da’ö. Ohahau dödöra wemörö ba zi bongi börö me la’ila wa so zolumö’ö mbanuara. Simanö göi, na so khöda ’wa’ohahau dödö moroi khö Lowalangi’, lö khöda fa’aombö dödö ba tola ahono dödö hegöi fangera-ngerada. Ta’ila wa irorogö ita Yehowa ba omasi ia na mofozu wa’aurida. (I Fetero 5:10) Da’a göi zolumö’ö ya’ita ena’ö lö marase ita börö wa’aombö-aombö dödö mazui fa’afatö dödö.

17. Hadia zanolo ya’ita ena’ö lö mamalö tafaduhusi tödö Yehowa sagötö alua wamakao sabölö-bölö?

¹⁷ Lö aratö tohare wamakao sabölö-bölö ba niha gulidanö. (Matai’o 24:21, 22) Lö ta’ila hadia zalua khöda zamösana. Hiza’i, lö moguna talafo aombö dödöda ba zalua andrö. Hewa’ae lö ta’ila hadia manö nifalua Yehowa, hiza’i aboto ba dödöda Lowalangida. Ta’ila hadia zi no ifalua ba niha samosumange ya’ia si lö faröi ba götö föna. Ta’ila wa gofu hadia zalua, hasambalö ifalua hadia gohitö dödönia Yehowa. Ba tola ifalua hadia manö ba lala si lö mudöna-döna! Börö da’ö, ero na so nifalua Yehowa khöda, da’ö ginötö ba worasoi ’fa’ohahau dödö moroi khö Lowalangi, sabölö moroi ba gera-era niha fefu’.