Nisura Matai’o sanandrösa ba wa’atumbu hegöi waö-waö mböröta Yesu fabö’ö moroi ba nisura Luka. Alua da’ö börö me la’osambua’ö dödöra ba wangera-ngerara hegöi si no irai alua ba niha si fabö’ö.

I’osambua’ö dödönia Matai’o ba zalua so’amakhaita khö Yosefo. Itutunö hadia nifalua Yosefo me irongo wa manabina Maria, fangifinia me itutunö khönia mala’ika hadia zalua hegöi lala nifaluania ba wolo’ö fanuturu lala moroi khö mala’ika. (Matai’o 1:19-25) Itutunö göi hewisa wamangelama nibe’e mala’ika ba wangifi Yosefo ena’ö moloi ia hegöi ösi nomonia ba Miserai, ba hewisa wolo’önia da’ö. Itutunö göi khöda Matai’o wa ifuli mangifi Yosefo, iwa’ö khönia mala’ika ena’ö mangawuli ia ba mbanua Gizara’eli si fao nösi nomonia hegöi ena’ö lahalö gangetula toröi ira ba Nazareta. (Matai’o 2:13, 14, 19-23) Ba zi dombua faza si oföna ba Injilnia, itötöi döi Yosefo Matai’o walu kali, hiza’i ha öfa kali itötöi döi Maria.

Hiza’i, i’osambua’ö dödönia Luka khö Maria. Itutunö hewisa me möi mala’ika Gaberieli khö Maria, me möi Maria ba wamalukhaisi Gelizabe, hegöi fehede Maria ba wanuno Yehowa. (Luka 1:26-56) Itutunö göi khöda hadia niwa’ö Simeoni khö Maria sanandrösa ba wanandraigö nitaögö Yesu ba zi so miföna. Aefa da’ö itutunö göi Luka ginötö me möi Yesu ba gosali si fao ösi nomonia me 12 fakhe ndröfinia. Ba da’a göi no isura Luka wehede Maria, tenga Yosefo. Itutunö göi khöda wa sindruhu-ndruhu adöni dödö Maria ba zalua andre. (Luka 2:19, 34, 35, 48, 51) Ba zi dombua faza siföföna ba Injilnia, itötöi döi Maria 12 kali, hiza’i ha 3 kali itötöi döi Yosefo. Andrö, sabölö oya nitutunö Matai’o khöda ya’ia da’ö hadia nirasoi ba nifalua Yosefo. Na Luka, i’osambua’ö dödönia ba nirasoi hegöi salua khö Maria.

Ba zi dombua Injil andre, faehu göi waö-waö nga’ötö Yesu. Nitutunö Matai’o ya’ia da’ö waö-waö nga’ötö Yosefo ba iforoma’ö wa no tobali ono nisou Yesu khö Yosefo, ba no sinangea mamatörö Yesu ba wamatörö Dawido. Hana? Börö me Yosefo no nga’ötö Razo Dawido khö nononia Zelomo. (Matai’o 1:6, 16) Hiza’i, nitutunö Luka ya’ia da’ö waö-waö nga’ötö Maria ba iforoma’ö wa ya’ia andre nga’ötö moroi khö Dawido ba no sinangea mudadao Yesu ba dadaoma Dawido molo’ö ”nga’ötö niha”. (Roma 1:3) Hana? Börö me Maria no nga’ötö Razo Dawido khö nononia Natano. (Luka 3:31) Hiza’i, hana wa lö isura Luka wa Maria andrö ono Eli ono alawe? Börö me si to’ölönia, ha waö-waö nono matua nisura. Andrö, me isura Luka nga’ötö Yosefo ba itutunö wa Yosefo andrö si tobali ono Eli, la’ila niha wa eluahania Yosefo andrö umönö Eli.​—Luka 3:23.

Waö-waö nga’ötö Yesu ba Injil Matai’o hegöi Luka, da’ö zangoroma’ö wa Yesu no Mesia nifabu’u Lowalangi. Fa’asindruhu wa no nga’ötö Razo Dawido Yesu, no la’ila fefu niha. Niha Farizai’o hegöi Sadukai’o lö irai lö lafaduhu’ö da’a. Nitutunö Matai’o hegöi Luka sanandrösa ba waö-waö nga’ötö Yesu möi fangaro’ö wamatida ba möi famaduhu’ö dödöda wa hasambalö alua fefu zi no ifabu’u Lowalangi.