Böi Huku Niha Moloʼö Niʼila Hörö
”Böi mihuku niha moloʼö niʼila hörö, hizaʼi miʼatulöʼö wanguhukumi andrö.”—YOHANE 7:24.
1. Hadia wamaʼeleʼö Yesaya sanandrösa khö Yesu, ba hana wa möi famarou dödöda daʼö?
FAMAʼELEʼÖ Yesaya sanandrösa khö Yesu Keriso möi famarou dödöda ba sameʼe khöda dötönafö. Ifaʼeleʼö Yesaya wa Yesu ”tenga niʼila hörönia dali wanguhukunia, ba tenga dali wangetuʼö huku nirongo dögi dalingania” ba ”satulö saʼae dali khönia wameʼe huku ba zi numana”. (Yesaya 11:3, 4) Hana wa möi famarou dödöda daʼö? Börö me so ita ba gulidanö safönu fanahö-nahö tödö hegöi niha si so ba zi fasuida lahuku niha böʼö moloʼö niʼila höröra. Sindruhu-ndruhu moguna khöda Zanguhuku soʼahonoʼa, yaʼia daʼö Yesu, si lö irai manguhuku moloʼö niʼila hörönia!
2. Hadia niwaʼö Yesu enaʼö tafalua, ba hadia nitutunöda ba wamahaʼö daʼa?
2 Ero maʼökhö, taʼokhögö lala wangera-ngera sanandrösa ba niha böʼö. Hizaʼi, börö me lö moʼahonoa ita tenga simane Yesu, tola manö fasala lala wamaigida yaʼira. Tedönisi ita ba niʼila höröda. Hizaʼi, imane Yesu, ”Böi mihuku niha moloʼö niʼila hörö, hizaʼi miʼatulöʼö wanguhukumi andrö.” (Yohane 7:24) Omasi Yesu na taʼoʼö ia ba lö tahuku niha moloʼö niʼila höröda. Ba wamahaʼö daʼa, tatutunö tölu ngawalö zondrönisi lala wangera-ngerada ba niha böʼö: hezo moroi mado mazui soinia, hawaʼebua haratonia, ba hawaʼalawa ndröfinia. Ba ginötö tazara-zara wanutunö yaʼia, tafahaʼö ita lala ba woloʼö Yesu enaʼö lö tahuku niha böʼö moloʼö niʼila höröda.
BÖI HUKU MOLOʼÖ MADO MAZUI SOI
3, 4. (a) Hana wa tebulö lala wangera-ngera Wetero ba zi tenga niha Yahudi? (Faigi gambara ba wamobörö wamahaʼö.) (b) Hadia zindruhu si bohou nifahaʼö Yehowa khö Wetero?
3 Khalaigö hadia nirasoi zinenge sotöi Fetero me muʼandrö khönia weʼamöi ba Kaisarea, ba nomo Konelio, si tenga niha Yahudi! (Halöwö Zinenge 10:17-29) Iʼotarai me ide-ide Wetero, no lafahaʼö ia wa raʼiö zi tenga niha Yahudi. Hizaʼi, so zawena alua sombulöʼö fangera-ngerania. Duma-dumania, iʼila gangilata moroi khö Lowalangi. (Halöwö Zinenge 10:9-16) Ba gangilata daʼö, iʼila Fetero zi hulö nukha sebua moroi ba zorugo, ba so ngawalö gurifö si raʼiö ba daʼö. Aefa daʼö, so li sangumaʼö, ”He Fetero, ozizio. Taba ba a!” Itimbagö daʼö Fetero. Aefa daʼö imane li andrö, ”Böi waʼö raʼiö zi no ihaogö Lowalangi.” Lö aboto ba dödö Wetero hadia zedöna ifaʼema fehede andrö khönia. Lö ara, tohare niha nifatenge Konelio. Simane fanuturu lala nibeʼe geheha niʼamoniʼö, fao Wetero khöra ba nomo Konelio.
4 Na ihalö gangetula Fetero ”moloʼö niʼila hörö”, lö möi ia ba nomo Konelio. Lö irai möi niha Yahudi ba nomo niha si tenga Yahudi. Andrö, hana wa möi Wetero? Hewaʼae no irai manahö-nahö dödö Wetero khöra, angilata daʼö hegöi fanuturu lala moroi ba geheha niʼamoniʼö, daʼö zombulöʼö lala wangera-ngerania. Me no aefa ifondrondrongo niwaʼö Konelio imane Fetero, ”Awena aboto ba dödögu wa lö ifaigi mbawa niha Lowalangi, dozi samalua sindruhu ba sangataʼufi yaʼia moroi ba ngawalö soi, daʼö zomasi ia.” (Halöwö Zinenge 10:34, 35) Adöni dödö Wetero ba waʼaboto ba dödö si bohou andre. Hewisa wa möi fondrönisi dödö niha Keriso daʼö?
Hadia taʼokhögö nasa wanahö-nahö tödö, hewaʼae ba wamaigida lö ebua dödö zambuana ita?
5. (a) Hadia zomasi Yehowa enaʼö laʼila fefu niha Keriso? (b) Hewaʼae na taʼila hadia zindruhunia, hadia manö nasa zi tola so ba dödöda?
5 Iʼogunaʼö Wetero Yehowa ba wanolo fefu niha Keriso enaʼö laʼila wa lö ebua dödö zambuana Yehowa. Itemaʼö ita Yehowa gofu hadia mado, banua, soi mazui li niʼogunaʼöda. Na lö mamalö taʼataʼufi Lowalangi ba tafalua zatulö, itemaʼö ita. (Galatia 3:26-28; Famaʼeleʼö 7:9, 10) Te no öʼila daʼö. Hizaʼi, hewisa na asese so wanahö-nahö tödö ba niha si so ba soimö mazui ba nösi nomomö? Hewaʼae na ba wamaigimö lö ebua dödö zambuana ndraʼugö, hizai hadia so nasa ba dödömö wanahö-nahö tödö? Hewaʼae no itolo niha Fetero ba wamaigi wa lö ebua dödö zambuana Lowalangi, so nasa khönia wanahö-nahö tödö. (Galatia 2:11-14) Andrö, hewisa enaʼö tola taʼoʼö Yesu ba lö tahuku niha moloʼö niʼila höröda?
6. (a) Hadia zanolo yaʼita ba waniboʼö fanahö-nahö tödö? (b) Hadia wamahaʼö nihalöda moroi khö zi samösa ira matua sangai halöwö?
6 Enaʼö tola taʼila hadia so khöda wanahö-nahö tödö, moguna tafareso ita samösa. Moguna tafatimbaisi hadia tefaudu mbua-buada ba zi no tafahaʼö ita ba Daromali Lowalangi. (Zinunö 119:105) Tola göi manofu ita khö nawöda hadia iʼila so khöda wanahö-nahö tödö si lö nasa niʼilada. (Galatia 2:11, 14) Tola manö mowaʼa ba dödöda wanahö-nahö tödö irege lö taʼila wa no taʼokhögö ia! Daʼa zalua khö zi samösa talifusöda ira matua sangai halöwö. Ifazökhi sambua gangombakhata sanandrösa ba zi sambua fongambatö sangai halöwö safönu inötö. Foʼomo ira matua, moroi ba mado si lö laʼosinangegö. Oya zi sökhi nisura dalifusöda sangai halöwö sanandrösa khö woʼomo ira matua andrö, hizaʼi isura göi, ”Hewaʼae moroi ba [mado daʼa] ia, amuata hegöi bua-buania möi fanolo niha irege laʼila wa lö fefu niha moroi ba [mado daʼa] ogoro ita ba laʼokhögö lala waʼauri si lö baga, simane niha sato moroi ba [mado daʼa].” Hadia wamahaʼönia? Gofu hadia halöwöda ba organisasi Yehowa, moguna tafareso ita samösa ba tatemaʼö wanolo enaʼö tola taʼila hadia so nasa khöda wanahö-nahö tödö. Hadia nasa zi tola tafalua?
7. Hewisa wangoromaʼöda wa ’taʼeboloʼö wamokai dödöda’?
7 Na ’taʼeboloʼö wamokai dödöda’, taʼokhögö waʼomasi ba lö khöda fanahö-nahö tödö. (2 Korindro 6:11-13) Hadia fariawö ndraʼugö ha ba niha si fagölö mado, soi, banua mazui li? Na simane daʼö, tandraigö fariawö ba niha böʼö göi. Tola faoʼö manuriaigö khö ndra talifusöda si faböʼö mado, soi mazui li. Mazui tola ökaoni ira manga ba nomomö. (Halöwö Zinenge 16:14, 15) Na öfalua daʼö, tola öʼomasiʼö ira irege lö manahö-nahö dödömö khöra. Iadaʼa, datatutunö hadia nasa zalua irege tola manö tahuku ”niha moloʼö niʼila hörö”.
BÖI HUKU MOLOʼÖ HARATO
8. Hadia wamahaʼö nihalöda ba 3 Moze 19:15 sanandrösa ba waʼebua harato niʼokhögö zi samösa niha möi fondrönisi lala wangera-ngerada ba niha böʼö?
8 Lala wangera-ngerada ba niha böʼö, tola manö tedönisi daʼö ba waʼebua harato niʼokhögöra. Imane 3 Moze 19:15, ”Böi öʼawögö zi numana ba böi faigi-faigi mbawa zalawa, öʼatulöʼö wangetuʼö huku khö nawöu.” Hewisa wa tola tedönisi lala wangera-ngerada ba waʼebua harato niʼokhögö zi samösa niha?
9. Hadia zi no asese alua nisura Zelomo, ba hadia wamahaʼönia khöda?
9 Isura Selomo hadia zi no asese alua, ”Ba zi numana, ba faʼudu göi zahatö khönia; ba somasi si so anaʼa, Gamaedola 14:20) Hadia wamahaʼönia khöda? Na lö mangelama ita, tola manö ha khö ndra talifusöda sebua harato fariawö ita, ba lö omasi ita fariawö khö ndra talifusöda si numana. Hana wa no sambua teʼala na tahuku niha moloʼö hadia niʼokhögöra mazui si lö laʼokhögö?
ba no ato.” (10. Hadia gabula dödö salua irege ibeʼe wamangelama Yakobo ba niha Keriso?
10 Na tahuku ndra talifusöda moloʼö haratora, tola tekiko wahasara dödö ba mbanua niha Keriso. Daʼa zalua ba mbanua niha Keriso ösa me abad siföföna, ba ifangelama niha Keriso Yakobo sanandrösa ba daʼö. (Baso Yakobo 2:1-4.) Lö omasi ita na tekiko wahasara dödö ba mbanua niha Keriso. Börö daʼö, hewisa enaʼö lö tahuku niha moloʼö hawaʼebua harato niʼokhögöra?
Moguna so khöda wangide-ngideʼö ba wanemaʼö fanolo enaʼö tola taʼila hadia so nasa khöda wanahö-nahö tödö
11. Hadia teʼodane-dane wahuwusa zi samösa niha khö Yehowa ba harato? Tutunö.
11 Moguna taʼoʼö lala wamaigi Yehowa ndra talifusöda. Iʼameʼegö tödö niha Yehowa tenga börö me kayo mazui numana. Fahuwusada khö Yehowa lö teʼodane-dane ba waʼebua gefe mazui harato niʼokhögöda. Atulö sa no iwaʼö Yesu, ”afökhö ba zoʼanaʼa wogamö Famatörö zorugo”, hizaʼi lö iwaʼö wa tebai alua daʼö. (Mataiʼo 19:23) Imane göi Yesu, ”Yaʼahowu ami niha si numana, börö me khömi Wamatörö Lowalangi.” (Luka 6:20) Hizaʼi, tenga daʼö geluahania wa fefu niha si numana lafondrondrongo niwaʼö Yesu ba lasöndra howu-howu si tohude. Ato göi niha si numana si lö moloʼö Yesu. Sindruhunia, tebai tahuku wa fariawösa zi samösa niha khö Yehowa teʼodane-dane ba harato niʼokhögönia.
12. Hadia nifahaʼö Zura Niʼamoniʼö ba niha si kayo hegöi ba niha si numana?
12 Ba gotalua nono mbanua Yehowa, so ndra talifusöda si kayo ba si numana. Hizaʼi, fefu ira laʼomasiʼö Yehowa ba lafosumange ia soroi ba dödö. Imane Sura Niʼamoniʼö ba niha si kayo enaʼö ”böi manötöna ira ba waʼakayo salio taya, hizaʼi khö Lowalangi”. (Baso 1 Timoteo 6:17-19.) Ifangelama göi fefu zamosumange Yehowa, he si kayo ba si numana, hadia manö deʼala börö waʼomasi ganaʼa. (1 Timoteo 6:9, 10) Na taʼoʼö lala wamaigi Yehowa ndra talifusöda, lö tahuku ira moloʼö hawaʼebua harato niʼokhögöra. Hizaʼi, hewisa sanandrösa ba waʼalawa ndröfi? Hadia tola tobali dane-dane daʼö ba wanguhuku niha böʼö?
BÖI HUKU MOLOʼÖ FAʼALAWA NDRÖFI
13. Hadia nifahaʼö Zura Niʼamoniʼö khöda sanandrösa ba lala wangoromaʼöda wa tafosumange niha si no alawa döfi?
13 Asese iwaʼö Sura Niʼamoniʼö wa moguna tafosumange niha si no alawa döfi. Imane 3 Moze 19:32, ”Na so zi no tohare huwa, ba maoso ndraʼugö ba öfosumange zatua ba öʼataʼufi Lowalangimö.” Imane ba Gamaedola 16:31, ”Saembu lakhömi huwa andrö, ba lala satulö tesöndra ia.” Iwaʼö Faulo khö Dimoteo enaʼö lö itegu ndra matua salawa döfi faoma fehede sabeʼe, hizaʼi enaʼö hulö simane amania. (1 Timoteo 5:1, 2) Hewaʼae iʼokhögö halöwö si tohude Dimoteo ba wameʼe fanuturu lala khö ndra talifusö si no alawa döfi, lö mamalö ifosumange ira ba iforomaʼö waʼasökhi dödö.
14. Ba ginötö hadia tola taʼamenesi niha salawa döfi moroi khöda?
14 Hewisa na so samösa niha salawa döfi sangodödögö ba wamalua horö, ba idönisi niha böʼö ba wamalua hadia zi lö omasi Yehowa? Lö itehegö Yehowa so niha sangodödögö wamalua horö, hewaʼae na niha daʼö no atua mazui nifosumange. Faigi hadia goi-goi si so ba Yesaya 65:20, ”Ba si ha otu fakhe, ba si so horö, si no göna fangelifi.” Tola taʼila goi-goi si fagölö ba gangilata Hezekieli. (Hezekieli 9:5-7) Sabölö moguna yaʼia daʼö tafosumange Yehowa, si No Alawa Döfi. (Danieli 7:9, 10, 13, 14) Na tafosumange ia, so khöda waʼabarani ba woʼamenesi niha böʼö gofu hawaʼalawa ndröfira.—Galatia 6:1.
Hewisa wangoromaʼömö wa öfosumange ndra talifusöda si bohou ebua? (Faigi ngenoli si-15)
15. Hadia wamahaʼö si tola tahalö moroi khö zinenge sotöi Faulo sanandrösa ba wamosumange ndra talifusöda si bohou ebua?
15 Hewisa ndra talifusöda si bohou ebua? Hadia tola tafosumange ira? Tola. Isura Faulo khö Dimoteo, ”Böi tehegö so zangosiwawöi yaʼugö börö me awuyu nasa ndraʼugö. Hizaʼi, yatobali ndraʼugö duma-duma ba niha si lö faröi, ba wehede, ba gamuata, ba waʼomasi, ba wamati, ba waʼohau-hau.” (1 Timoteo 4:12) Me isura daʼa Faulo, te awena 30 fakhe ndröfi Dimoteo. Hizaʼi, no ibeʼe khönia halöwö si tohude Faulo. Hadia wamahaʼönia? Böi tahuku ndra talifusöda si bohou ebua moloʼö ndröfira. Angeragö fefu hadia nifalua Yesu me awena 33 fakhe ndröfinia!
16, 17. (a) Hewisa ndra satua sokubaloi ba wangai angetula hadia tola tobali enoni mazui satua sokubaloi zi samösa talifusöda ira matua? (b) Hana wa lö tefaudu ba Zura Niʼamoniʼö lala wangera-ngerada mazui si no toʼölö lafalua ba mbanuada?
16 So ösa budaya, lö lafosumange ndraono matua si bohou ebua. Lua-luania, so ösa ndra satua sokubaloi lö lafarou zi bohou ebua enaʼö tobali enoni mazui satua sokubaloi, hewaʼae no tola lahalö halöwö andrö. Hizaʼi, lö iwaʼö Sura Niʼamoniʼö wa moguna mutatugöi hawaʼalawa ndröfi zi samösa ira matua enaʼö tobali ia enoni mazui satua sokubaloi. (1 Timoteo 3:1-10, 12, 13; Tito 1:5-9) Na so zatua sokubaloi samalua daʼö ha börö zi toʼölö mufalua, lö niʼoʼönia Daromali Lowalangi. Tebai lahuku zi bohou ebua ira satua sokubaloi moloʼö fangera-ngerara samösa mazui si toʼölö mufalua ba mbanuara, hizaʼi moloʼö goi-goi Daromali Lowalangi.—2 Timoteo 3:16, 17.
17 Na lö laʼoʼö goi-goi Zura Niʼamoniʼö ira satua sokubaloi, no lasaisi ndra talifusöda ira matua si tola mangai halöwö tobali enoni mazui satua sokubaloi. Ba zi sambua soi, so samösa genoni si no mamalua halöwönia soroi ba dödö, ba fao dödö ndra satua sokubaloi wa tola tobali ia satua sokubaloi moloʼö Sura Niʼamoniʼö. Hizaʼi so ösa zatua sokubaloi si no alawa döfi lawaʼö wa talafo awuyu-wuyu dalifusöda andrö. Lö omasi ira na tobali ia satua sokubaloi. Lua-luania, lö latuyu dalifusöda andrö, ha börö me awuyu-wuyu ndröfinia. Te daʼö lala wangera-ngera si toʼölö ba gulidanö andre. Börö daʼö, moguna taʼodaligö Zura Niʼamoniʼö, tenga fangera-ngerada samösa mazui si toʼölö mufalua ba mbanuada. Na tafalua daʼö, no taʼoʼö Yesu ba lö tahuku niha moloʼö niʼila höröda.
MANGUHUKU SI FAO FAʼATULÖ
18, 19. Hadia zanolo yaʼita ba wamaigi ndra talifusöda simane famaigi Yehowa?
18 Lö moʼahonoa ita, hizaʼi tola taʼoʼö nifalua Yehowa, taheta khöda wanahö-nahö tödö ba niha böʼö. (Halöwö Zinenge 10:34, 35) Andrö, moguna taʼameʼegö tödö wamasugi ba dödö moroi ba Daromali Lowalangi. Na tafalua daʼö, no taʼoʼö niwaʼö Yesu enaʼö ’böi tahuku niha moloʼö niʼila hörö’.—Yohane 7:24.
19 Lö ara tö, Yesu Keriso si tobali Razoda, ihuku fefu niha. Ihuku niha moloʼö goi-goi Lowalangi satulö, tenga moloʼö hadia niʼila mazui nirongonia. (Yesaya 11:3, 4) Sindruhu-ndruhu tadöna-döna ginötö si sökhi andrö!