BÖRÖ me auri ita ba ”ngaluo safuria”, moguna taforege ba wangoromaʼö faʼebolo dödö. (2 Timoteo 3:1-5) Ato niha ba zi fasuida lö khöra faʼebolo dödö. Ha tana khöra laʼalui, lö fahasara dödö, ba lö fanaha tödö. Andrö wa moguna tasofu khöda samösa, ’Hadia lö khögu faʼebolo dödö simane niha ba zi fasuigu? Hadia geluahania waʼebolo dödö sindruhu? Hadia zinangea ufalua enaʼö uʼokhögö waʼebolo dödö?’

Ba Zura Niʼamoniʼö, hadia geluahania ”faʼebolo dödö”? Tenga ha daʼö geluahania mangokhögö fanaha tödö na so gabula dödö. Niha sebolo tödö, anau gölönia me so khönia wanötöna wa tola itugu sökhi zalua andrö. Tenga ha yaʼia samösa niʼangeragönia, hizaʼi iʼangeragö göi dödö niha böʼö, hewaʼae na niha daʼö no iʼafökhöiʼö dödönia mazui ifalua khönia zi lö sökhi. Lö mamalö itötöna enaʼö itugu sökhi gamakhaitara. Iwaʼö Sura Niʼamoniʼö wa faʼebolo dödö no bua-bua waʼomasi. * (Faigi nisura ba gahe zura.) (1 Korindro 13:4) Faʼebolo dödö göi no ”bua-bua geheha”. (Galatia 5:22, 23) Andrö, hadia zinangea tafalua enaʼö lö mamalö taʼokhögö waʼebolo dödö sindruhu?

Enaʼö so khöda waʼebolo dödö, moguna taʼandrö geheha niʼamoniʼö Yehowa, nibeʼenia ba niha si faduhu tödö khönia. (Luka 11:13) Mofaʼabölö geheha niʼamoniʼö, hizaʼi moguna göi tafaudugö nifaluada simane fangandröda. (Zinunö 86:10, 11) Eluahania, moguna taʼodödögö ba wangoromaʼö faʼebolo dödö ero maʼökhö enaʼö taʼokhögö mbua-bua daʼö. Hizaʼi, itaria lö mofozu ita wamalua yaʼia. Hadia zanolo yaʼita?

Moguna tafahaʼö ita ba taʼoʼö duma-duma soʼahonoa moroi khö Yesu. Me fahuhuo zinenge sotöi Faulo sanandrösa ba ’wamohouni amuata’ farahu ba daʼö waʼebolo dödö, ifarou ita, ”Yaʼifatörö dödömi faʼohahau dödö khö Keriso.” (Kolose 3:10, 12, 15) Ba wamalua daʼö, moguna taʼoʼö duma-duma Yesu ba faduhu dödöda wa hasambalö iʼasiwai gabula dödö andrö Lowalangi ba ginötö si tefaudu. Na faduhu dödöda daʼö, so khöda waʼebolo dödö gofu hadia zalua ba zi fasuida.​—Yohane 14:27; 16:33.

Omasi ita fefu na alio tohare gulidanö si bohou. Hizaʼi, tola itugu taʼokhögö waʼebolo dödö na taʼangeragö waʼebolo dödö Yehowa niforomaʼönia khöda. Ifaduhuʼö khöda Sura Niʼamoniʼö, ”Lö iʼaragö Yehowa ginötö ba wamalua si no ifabuʼu, simane niwaʼö niha ösa. Hizaʼi, ebolo dödönia khömi börö me lö omasi ia na tekiko fazamösa. Omasi ia enaʼö dozi lafalalini gera-erara.” (2 Fetero 3:9) Andrö, na taʼangerönusi waʼebolo dödö Yehowa khöda, tola göi taʼokhögö waʼebolo dödö ba niha böʼö. (Roma 2:4) Hawaʼara manö moguna taforomaʼö waʼebolo dödö?

Ero maʼökhö, moguna khöda waʼebolo dödö. Duma-dumania, hewaʼae so zabölö moguna somasi ita tawaʼö, hizaʼi moguna ebolo dödöda enaʼö lö tataba dalu huhuo niha. (Yakobo 1:19) Moguna göi ebolo dödöda na so niha zangafökhöiʼö tödöda. Moroi na tatanö ba dödöda, abölö sökhi na taʼangeragö hewisa wamaigi Yehowa ba Yesu falömoʼahonoa niʼokhögöda. Lö laʼosambuaʼö dödöra ba waʼoya zala side-ide nifaluada. Hizaʼi, lafaigi mbua-bua si sökhi niʼokhögöda ba si fao faʼebolo dödö labeʼe khöda ginötö ba wondrouʼö daʼö.​—1 Timoteo 1:16; 1 Fetero 3:12.

Moguna ebolo dödöda na so niha zamatunö khöda wa no tawaʼö mazui tafalua zala. Te iʼanemaiʼö tetutu dödöda ba taheta ba huluda. Hizaʼi, iwaʼö khöda Taromali Lowalangi enaʼö tatemaʼö daʼö. Imane, ”Sökhi lua-lua hadia ia, moroi ba mbörötania. Sökhi zebolo tödö, moroi ba zi fayawa. Böi alio-lio abao dödöu, me no barö doto zambö era-era so waʼabao dödö.” (Zangombakha 7:8, 9) Andrö, hewaʼae na fasala niböbögönia, moguna ebolo dödöda ba tahaogö taʼangeragö fatua lö tafalua hadia ia. Daʼa nifalua Yesu me laböbögö khönia zi lö duhu.​—Mataiʼo 11:19.

Moguna göi ebolo dödö zatua mendrua manö ba wanolo iraonora ba wangaʼazökhi bua-bua si fasala mazui ba wanimbagö isö-isö dödö si lö sökhi. Duma-dumania Mattias, sangai halöwö ba Mbetieli Skandinavia. Me awuyu-wuyu ndröfinia, asese laʼoʼaya nifaduhusinia tödö ira awönia ba zekola. Ba wamobörö, lö laʼila ira satuania zalua andre. Hizaʼi ba gafuriata, laʼila wa ibörögö aombö dödönia ba nifaduhusinia tödö. Ama Mattias sotöi Gillis, iwaʼö wa moguna so khönia hegöi foʼomonia waʼebolo dödö. Isofu Mattias wanofu-nofu simane, ”Haniha Lowalangi? Hewisa na tenga Taromali Lowalangi Zura Niʼamoniʼö? Hewisa tola taʼila wa daʼa zomasi Lowalangi enaʼö tafalua?” Isofu göi khö bapania, ”Hana wa sala ndraʼodo ba wamaigira na lö fagölö nifaduhusida tödö?”

Itutunö Gillis, ”Itaria manofu nonoma si fao fönu. Tenga khögu mazui khö mamania mofönu ia, hizaʼi ba zindruhu. So ba dödönia wa daʼö mbörö irege fawuka waʼaurinia.” Hewisa  wanolo Gillis nononia matua? ”Modadaodo awönia ba fahuhuoga ba zi hauga za.” Si toʼölönia ifondrondrongo Gillis niwaʼö Mattias, ba ibeʼe wanofu enaʼö iʼila nösi dödö hegöi bua gera-erania. Itaria na no aefa itutunö Gillis sambua duho, iʼandrö khö nononia enaʼö iʼangeragö daʼö ba zi sahari mazui töra fatua lö lafuli latutunö. Ba ginötö böʼö, iʼandrö Gillis ginötö hauga hari enaʼö tola iʼila geluaha niwaʼö nononia. Börö me asese fahuhuo ira, ibörögö aboto ba dödö Mattias geluaha höli hegöi wa iʼomasiʼö ita Yehowa ba no sinangea yaʼia zamatörö yaʼita. Imane Gillis, ”Sindruhu sa wa moguna ginötö, ba asese sibai abua, hizaʼi ba waʼara manö, ibörögö iʼomasiʼö Yehowa. Omuso sibai dödögu hegöi foʼomogu börö me no maforege ba wamalua faʼebolo dödö irege tola tofakha ba dödö nonoma ba tola matolo ia ba waʼawuyu-wuyunia.”

Tenga ha faʼebolo dödö niʼokhögöra ba wanolo onora matua, faduhu göi dödö Gillis ba foʼomonia wa itolo ira Yehowa. Imane Gillis, ”Asese uwaʼö khö Mattias wa maʼomasiʼö sibai ia ba daʼö zamarou tödögu hegöi mamania, irege asese mangandrö ndraʼaga enaʼö itolo ia Yehowa.” Omuso sibai dödöra me laʼokhögö waʼebolo dödö ba lö awuwu!

Moguna göi so khöda waʼebolo dödö ba ginötö tarorogö nösi nomoda mazui si fahuwu khöda si no ara ba wökhö. Duma-dumania Ellen * (faigi nisura ba gahe zura), si toröi ba Skandinavia.

Te mato walu fakhe silalö, göna stroke dua kali woʼomo Ellen irege no irugi gutonia. Lua-luania, tebai saʼae irasoi waʼomuso dödö, faʼabu dödö, mazui faʼahakhö dödö. Abua khö Ellen zalua andre. Imane, ”Moguna sindruhu-ndruhu ebolo dödögu ba asese ulau mangandrö.” Imane nasa, ”Ayati somasido sondrara tödögu, so ba Filifi 4:13. Imane, ’Tola utaögö fefu hadia ia börö waʼabölö nitemagu moroi khö Lowalangi.’” Börö waʼabölö hegöi fanolo moroi khö Yehowa, anau gölö Ellen si fao faʼebolo dödö.​—Zinunö 62:6, 7.

Tatu manö, Yehowa no duma-duma sabölö sökhi ba wangoromaʼö faʼebolo dödö. (2 Fetero 3:15) Ba Zura Niʼamoniʼö, asese tabaso waʼebolo dödö Yehowa sahöli-höli dödö. (Nehemia 9:30; Yesaya 30:18) Hadia itörö tödömö nifalua Yehowa me no hauga kali isofu Aberahamo gangetulania ba wangohori Zodoma? Lö itaba Yehowa dalu huhuo Gaberahamo. Si fao faʼebolo dödö, ifondrondrongo fefu wanofu ba faʼaombö-aombö dödö Gaberahamo. Aefa daʼö, iforomaʼö Yehowa wa ifondrondrongo waʼaombö-aombö dödö Gaberahamo ba ifaduhuʼö wa lö idudugö Zodoma na so dafulu niha satulö ba daʼö. (I Moze 18:22-33) Lö mamalö ifondrondrongo Yehowa si fao faʼebolo dödö, ba ihaogö iʼameʼegö tödö!

Faʼebolo dödö no faosatö si tohude moroi ba wamohouni amuata si lö tola löʼö laʼokhögö fefu niha Keriso. Na tafalua zabölö sökhi ba wangokhögö faʼebolo dödö sindruhu, no tafosumange Namada Yehowa, soʼameʼegö tödö ba sebolo tödö khöda. Tefarahu ita ba ”niha sanema amabuʼula andrö börö wamati ba faʼebolo dödö”.​—Heberaiʼo 6:10-12.