1, 2. (a) Hadia zinangea tafahaʼö ita, ba hadia mbörö? (b) Hadia nitutunöda ba wamahaʼö daʼa?

MOGUNA tafahaʼö ita lala wamareso zi sambua turia ba taʼogunaʼö daʼö ba wangai rahu-rahu satulö. (Gamaedola 3:21-23; 8:4, 5) Na lö tafalua daʼö, tola ifakiko lala wangera-ngerada Satana hegöi ulidanönia. (Efeso 5:6; Kolose 2:8) Tatu manö, ba wangai rahu-rahu satulö, moguna taʼalui hadia zindruhunia zalua. Imane Gamaedola 18:13, ”Na so zanema li, na lö nifondrondrongonia, ba tebeʼe falötödö ba fangaila khönia.”

² Ba wamahaʼö daʼa, tatutunö hana wa abua sibai ba wangalui hadia zindruhunia zalua hegöi ba wangai rahu-rahu satulö. Tafahaʼö göi ita ba goi-goi hegöi duma-duma moroi ba Zura Niʼamoniʼö, samahaʼö yaʼita lala ba wamareso zi sambua turia.

3. Hana wa moguna taʼoʼö goi-goi si so ba Gamaedola 14:15? (Faigi gambara ba wamobörö wamahaʼö.)

³ Iadaʼa, aoha sibai khöda wanöndra turia. Tola taʼila daʼö ba Internet, TV hegöi ba media tanö böʼö. Tola göi moroi  ba e-mail, SMS, hegöi ba nidunö-dunö nawöda. Itaria, talafo oya duria nitemada. Andrö wa moguna mangelama ita. Tola manö sindruhunia sökhi gohitö dödö nawöda, hizaʼi so niha sangodödögö ba wamaʼema turia si lö atulö mazui lafabaliaʼö zindruhu. Hadia goi-goi Zura Niʼamoniʼö sanolo yaʼita ba wamareso hadia nirongoda? Imane ba Gamaedola 14:15, ”Sambö tödö, ba ifati fefu hadia ia niwaʼö; ba satua-tua, ba ifaigi nibekainia.”

4. Hewisa Filifi 4:8, 9 möi fanoloda ba wamili hadia nibasoda, ba hana wa moguna taʼila hadia zindruhunia zalua? (Faigi göi kotak ” Si No Tehenaigö Sanolo Yaʼita ba Wamaigi Hadia Zindruhunia”.)

⁴ Ba wangai angetula si sökhi, moguna taʼila hadia zindruhunia zalua si tola mufaduhusi tödö. Börö daʼö, moguna mangelama ita ba ginötö tafili hadia nibasoda. (Baso Filifi 4:8, 9.) Böi tahorigö ginötöda ba wombaso situs Web berita si tebai tafaduhusi tödö, e-mail mazui SMS samatou-tou niha. Mendrua manö situs Web nifazökhi niha si no mondröi sindruhu. Omasi ira enaʼö awuwu wamati nono mbanua Lowalangi ba lafabaliaʼö zindruhu. Turia simane daʼö, lö möi fanoloda ba wangai angetula si sökhi. Böi so ba dödöu wa lö tedönisi ndraʼugö ba duria si lö atulö andrö.​—1 Timoteo 6:20, 21.

5. Hadia gangombakhata nirongo ndraono Gizaraʼeli, ba hadia lua-luania?

⁵ Angombakhata si fasala tola molua-lua ia. Ba götö Moze, möi zi 12 samauze ba Danö Amabuʼula. Si dafulu samauze andrö labeʼe gangombakhata si lö sökhi. (4 Moze 13:25-33) Lanönö-nönö ba wangombakha hadia zalua irege ataʼu nono mbanua Yehowa ba afatö dödöra. (4 Moze 14:1-4) Hana wa tola alua daʼö? Te so ba wangera-ngerara wa atulö gangombakhata andrö börö me ato zamauze sangumaʼö daʼö. Andrö wa lö omasi ira lafondrondrongo zi darua samauze tanö böʼö sanutunö ngawalö zi sökhi si so ba Danö Amabuʼula. (4 Moze 14:6-10) Lö laʼalui hadia zindruhunia zalua ba lö faduhu dödöra khö Yehowa. Lafaduhusi tödö duria si lö sökhi andrö.

6. Hana wa lö moguna tokea ita na tarongo gangombakhata si lö sökhi sanandrösa ba nono mbanua Yehowa?

⁶ Moguna mangelama ita na tarongo gangombakhata sanandrösa ba nono mbanua Yehowa. Törö tödöu wa ududa Satana lafotöi ia ”sangadugö ira talifusöda”. (Famaʼeleʼö 12:10) Ifangelama ita  Yesu wa niha samadaö ’laböbögö khöda ngawalö zi lö duhu’. (Mataiʼo 5:11) Na lö mamalö tatörö tödöda daʼö, lö tokea ita na tarongo gangombakhata si lö sökhi sanandrösa ba nono mbanua Yehowa.

7. Hadia zinangea tasofu khöda samösa fatua lö takirim e-mail mazui SMS?

⁷ Hadia asese ökirim e-mail hegöi SMS khö nawömö? Ba ginötö öʼila so gangombakhata ba berita mazui örongo so zalua sahöli-höli dödö, hadia iʼanemaiʼö öfaʼema daʼö ba niha böʼö simane nifalua wartawan? Fatua lö öfalua daʼö, sofu khöu samösa, ’Hadia faduhu dödögu wa atulö gangombakhata andrö? Hadia uʼila zindruhunia zalua?’ Na so khömö waʼaombö-aombö dödö, tola manö angombakhata si fasala nifaʼemamö. Börö daʼö, na lö öʼila hadia atulö gangombakhata andrö, böi kirim ia. Hapus manö!

8. Ba soi böʼö, hadia nifalua ndra samadaö, ba hewisa enaʼö lö fao ita ba wamaʼema turia si lö sökhi?

⁸ So zalua tanö böʼö na takirim e-mail mazui SMS fatua lö taʼangeragö. Ba soi böʼö, lasaisi mazui lö latehegö tafalua halöwöda ba wamati. Niha samadaö si so ba soi daʼö, tola manö lafaʼema gangombakhata si lö sökhi ba wametaʼu yaʼita mazui enaʼö so khöda wanahö-nahö tödö. Angeragö zalua ba soi si no irai farahu ba Uni Soviet. Sambua agen rahasia nifotöi KGB, lafaʼema gangombakhata wa so ösa ndra talifusöda, no tobali ira si manga mböli nono mbanua Yehowa. * (Faigi nisura ba gahe zura.) Ato ndra talifusöda faduhu dödöra ba gangombakhata andrö ba laröi organisasi  Yehowa. Hizaʼi, ato moroi ba gotaluara zangawuli. Hewaʼae simanö, so göi zi lö mangawuli. Latehegö awuwu wamatira ba duria si lö sökhi andrö. (1 Timoteo 1:19) Hewisa enaʼö lö tafalua zimane daʼö? Böi faʼema gangombakhata si lö sökhi mazui si lö tatu hadia atulö. Böi faduhusi tödö fefu hadia nirongomö. Alui hadia zindruhunia zalua.

9. Hadia mbörö wa abua khöda ba wangai rahu-rahu satulö?

⁹ Itaria tarongo duria si lö ahori atulö maʼafefu. So göi duria si lö manutunö hadia zindruhunia zalua. Daʼa mbörö wa abua khöda ba wangai rahu-rahu satulö. Tebai tafaduhusi tödö duria si lö atulö maʼafefu! Hewisa enaʼö lö telimo ita ba duria simane daʼö?​—Efeso 4:14.

10. Hana wa so ösa ndraono Gizaraʼeli sarakhagö manuwö dalifusöra, ba hadia zanolo yaʼira enaʼö lö lafalua daʼö?

¹⁰ Tola tahalö wamahaʼö moroi ba ndraono Gizaraʼeli si toröi ba gaekhula Nungo Nidanö Yoridano me götö Yosua. (Yosua 22:9-34) No larongo wa iraono Gizaraʼeli si so ba gatumbukha Nungo Nidanö Yoridano no lafazökhi sambua naha wanunu sumange sahatö ba nungo nidanö andrö. Atulö gangombakhata daʼö, hizaʼi so nasa zindruhu tanö böʼö si lö laʼila. Iraono Gizaraʼeli si toröi ba gaekhula, so ba wangera-ngerara wa ira talifusöra si so ba gatumbukha no mamadaö ira khö Yehowa, andrö wa lafaʼanö ira fasuwö. (Baso Yosua 22:9-12.) Hizaʼi fatua lö lafalua daʼö, iraono Gizaraʼeli si so ba gaekhula, lafatenge ösa ndra matua ba wangalui hadia zindruhunia zalua. Hadia niʼilara? Iraono Gizaraʼeli si so ba gatumbukha lafazökhi naha wanunu sumange tenga ba wamosumange lowalangi faya. Lafazökhi daʼö si tobali tandra wa lafosumange Yehowa. Omuso sibai dödö ndraono Gizaraʼeli börö me laʼalui sakali hadia zindruhunia zalua, ba lö lasuwö dalifusöra.

11. (a) Hewisa walöʼatulö salua khö Meribaʼali? (b) Hadia nifalua Dawido ba wangoromaʼö faʼatulö khö Meribaʼali?

¹¹ Te no irai afatö dödöda ba ginötö so niha zanutunö duria si lö ahori atulö sanandrösa khöda. Daʼa zalua khö Meribaʼali. Si fao faʼasökhi dödö ibeʼe khönia Razo Dawido fefu mbenua tana khö duania sotöi Saulo. (2 Zamueli 9:6, 7) Hizaʼi ba gafuriata, irongo Dawido gangombakhata si lö sökhi sanandrösa khö Meribaʼali. Lö ifareso hadia atulö gangombakhata andrö, ihalö fefu mbenua si no ibeʼe khö Meribaʼali. (2 Zamueli 16:1-4) Me no ilau fahuhuo khö Meribaʼali, aboto ba dödö Dawido wa no ifalua zala. Ifangawuli ösa mbenua tana khö Meribaʼali. (2 Zamueli 19:24-29) Na oföna iʼalui Dawido hadia zindruhunia zalua fatua lö ifalua daʼö, tatu lö tefakao waʼauri Meribaʼali.

12, 13. (a) Hadia nifalua Yesu ba ginötö so niha samöbögö khönia si lö duhu? (b) Hadia nifaluada na so niha samöbögö khöda si lö duhu?

¹² Hewisa na so zamöbögö khömö si lö duhu? No alua daʼö khö Yesu hegöi Yohane Samayagö Idanö. (Baso Mataiʼo 11:18, 19.) Hadia nifalua Yesu? Lö ihorigö ginötö hegöi faʼabölönia ba wangeheta ba hulunia. Iʼoʼou niha enaʼö lafaigi hadia zindruhunia. Omasi ia na laʼameʼegö tödö fefu hadia ia nifalua hegöi nifahaʼönia.  Imane Yesu, ”Oroma waʼatua-tua niha moroi ba ngawalö zatulö nifaluania.”

¹³ Tola tahalö wamahaʼö moroi khö Yesu. Itaria so niha sangumaʼö si lö atulö sanandrösa khöda, ba tola manö so khöda waʼaombö dödö wa möi fangobousi döida daʼö. Hizaʼi moroi ba lala waʼaurida tola laʼila niha hewisa zindruhunia ita. Simane duma-duma Yesu, amuatada si sökhi daʼö zangoromaʼö wa lö atulö hadia niböbögö khöda andrö.

14, 15. Hana wa tebai taʼodaligö waʼatua-tuada samösa?

¹⁴ No tatutunö wa tola manö abua khöda ba wangalui hadia zindruhunia zalua. Baero daʼö, lö moʼahonoa ita. Te no ngafulu fakhe tafosumange Yehowa ba itugu atua-tua ita. Tola manö lafosumange ita niha böʼö börö me taʼokhögö lala wangera-ngera si sökhi. Hadia tola tobali abula dödöda daʼö?

¹⁵ Tatu manö. Tola ibörögö taʼodaligö waʼatua-tuada samösa. Tatehegö ifatörö lala wangera-ngerada hadia nirasoi hegöi bua gera-erada. Ibörögö faduhu dödöda ba zalua andrö, hewaʼae sindruhunia lö taʼila fefu hadia zindruhunia. No sambua famaʼala daʼö! Ifangelama ita Sura Niʼamoniʼö enaʼö böi taʼodaligö waʼatua-tuada samösa.​—Gamaedola 3:5, 6; 28:26.

16. Moroi ba duma-duma daʼa, hadia zalua ba zi sambua rumah makan, ba hadia zi so ba wangera-ngera Tom?

¹⁶ Duma-dumania, khalaigö so samösa zatua sokubaloi si no aro ba wamati sotöi Tom, möi ia ba rumah makan. Iʼila samösa zatua sokubaloi sotöi John, fao ia wemanga khö zi samösa ira alawe si tenga foʼomonia. Omuso sibai dödöra. Iʼila Tom wa faoma maʼiki ira khö nawöra ba lalau fatalagu. So khönia waʼaombö dödö ba so ba wangera-ngerania, ’Hadia lö ara tö fabali auri John  khö woʼomonia? Hadia zalua dania ba ndraonora?’ No irai iʼila Tom alua zimane daʼö. Hewisa dödömö na yaʼugö zi tobali Tom?

17. Ba duma-duma daʼa, hadia niʼila Tom ba gafuriata, ba hadia wamahaʼönia khöda?

¹⁷ Hizaʼi, baloi ua. Hewaʼae so ba wangera-ngera Tom wa no faröi John khö woʼomonia, hadia iʼila fefu zindruhunia zalua? Ba zi tanö owinia, itelefo John. Ba daʼö iʼila wa sindruhunia ira alawe andrö, akhi John moroi ba mbanua saröu. No hauga fakhe lö si falukha ira. Börö me lö arara nakhinia, andrö wa ha ba rumah makan falukha ira. Tebai möi woʼomo John. Iʼandrö sibai saohagölö Tom börö me lö mututunönia ba niha böʼö hadia zi so ba wangera-ngerania! Hadia wamahaʼönia khöda? Hewaʼae no ara mazui awena tafosumange Yehowa, moguna taʼalui fefu hadia zindruhunia zalua enaʼö tola tahalö rahu-rahu satulö.

18. Hadia mbörö wa tola manö faduhu dödöda na tarongo so zi lö baga sanandrösa khö ndra talifusöda?

¹⁸ Tola manö göi abua khöda ba wamareso hadia zindruhunia zalua na moʼamakhaita daʼö ba niha si fatuwu ita. Na taʼera-era manö hadia zi lö fao dödöda khönia, tola manö tumbu khöda wanahö-nahö tödö. Ba na tarongo so zi lö baga sanandrösa khönia, tola manö omasi ita ba wamaduhusi tödö daʼö hewaʼae na lö si tatu hadia atulö. Hadia wamahaʼönia khöda? Na lö taheta ba dödöda wangera-ngera si fasala khö ndra talifusöda, tola manö tahalö rahu-rahu si fasala ba si lö teʼodane-dane ba zindruhu. (1 Timoteo 6:4, 5) Böi tatehegö so ba dödöda wangera-ngera si fasala simane fatiusa ba faʼafökhö dödö. Böi irai olifuʼö wa omasi Yehowa na taʼomasiʼö ndra talifusöda ba tabeʼe aefa zalara soroi ba dödö.​—Baso Kolose 3:12-14.

19, 20. (a) Hadia goi-goi Zura Niʼamoniʼö sanolo yaʼita ba wamareso hadia zindruhunia zalua? (b) Hadia nitutunöda ba wamahaʼö aefa daʼa?

¹⁹ Iadaʼa, abua sibai wangalui hadia zindruhunia zalua si tola tafaduhusi tödö hegöi ba wangai rahu-rahu satulö. Hadia mbörö? Oya duria si lö ahori so mazui lö atulö maʼafefu, ba lö moʼahonoa ita. Hadia zanolo yaʼita? Goi-goi si so ba Daromali Lowalangi! Duma-dumania, so goi-goi zanutunö khöda wa no faʼabodo ba niha sameʼe fanema li fatua lö ifondrondrongo. (Gamaedola 18:13) So göi goi-goi sanolo yaʼita enaʼö taʼila wa tebai tafaduhusi tödö fefu hadia nirongoda fatua lö tafareso hadia atulö daʼö. (Gamaedola 14:15) Hewaʼae no ara mazui awena tafosumange Yehowa, tebai tafaduhusi tödö wangera-ngerada samösa. (Gamaedola 3:5, 6) Goi-goi Zura Niʼamoniʼö möi folumöʼöda na taʼogunaʼö zindruhu si tola tafaduhusi tödö ba wangai rahu-rahu satulö hegöi ba wangai angetula si sökhi.

²⁰ Hizaʼi, so mbörö tanö böʼö irege abua khöda ba wotatugöi hadia atulö zalua andrö mazui löʼö. Börö me yaʼita niha gulidanö, alio sibai tahalö gangetula moloʼö niʼila höröda. Ba wamahaʼö aefa daʼa, tatutunö hadia manö zalua irege tola tafalua zala simane daʼö ba hewisa lala wanimbagö yaʼia.