BA NDRÖFI silalö so ngahönö ndra talifusö ba zi sagörö ulidanö nituyu tobali satua sokubaloi hegöi enoni. Na tefarahu ndraʼugö ba gotaluara, tatu omuso dödöu me öhalö halöwö khö Yehowa hegöi ba wanolo ndra talifusö ba lala si bohou andre.

Hizaʼi, no si toʼölö na örasoi waʼaombö dödö. Imane satua sokubaloi sawuyu-wuyu sotöi Jason, ”Me awena latuyudo, abua khögu ba wangai halöwö si bohou andre.” Me awena latema halöwö si bohou moroi khö Yehowa, so ba dödö Moze hegöi Yeremia wa tebai lafalua daʼö. (2 Moze 4:10; Yeremia 1:6) Na daʼö nirasoimö, hadia nifaluamö ba wangokhögö faʼafaduhu dödö hegöi ba wondrouʼö zi tola öfalua? Fahaʼö ndraʼugö ba duma-duma Dimoteo.​—Halöwö Zinenge 16:1-3.

Te awena 20 fakhe ndröfi Dimoteo me ibörögö fao ia khö zinenge sotöi Faulo ba halöwö famasui. Me awena itema halöwö daʼa, te so ba dödönia wa tebai ifalua halöwö ba wamahaʼö hegöi ba wameʼe mene-mene ba niha böʼö börö me awuyu-wuyu ia nasa. (1 Timoteo 4:11, 12; 2 Timoteo 1:1, 2, 7) Hizaʼi, lö aetu idouʼö ia ba halöwönia, ba fulu fakhe aefa daʼö, imane Faulo ba niha Filifi, ”Manötöna ndraʼo ba khö Zoʼaya Yesu ba wamatenge khömi Timoteo.” Hana wa simane daʼö worasoi Waulo? Imane, ”Lö hadöi khögu niha böʼö simane yaʼia.”​—Filifi 2:19, 20.

Hadia mbörö wa tobali satua sokubaloi si sökhi Dimoteo? Nehegö zi önö ngawalö andre.

1. Sindruhu-ndruhu iʼameʼegö tödö niha. Iwaʼö Faulo khö ndra talifusö ba Wilifi wa ’iʼameʼegö tödö ira Dimoteo soroi ba dödö’. (Filifi 2:20) Omasi Dimoteo na lö mamalö ahatö ndra talifusö khö Yehowa, ba itehegö ginötö hegöi faʼabölönia ba wanolo yaʼira.

William, si no tobali satua sokubaloi töra ba zi 20 fakhe, lö mamalö iʼamenesi ndra satua sokubaloi sawena mutuyu, ”Omasiʼö ndra talifusö. Osambuaʼö dödöu ba zoguna khöra, tenga ha ba ngawalö zi no mufakhoi.” Böi tobali ndraʼugö simane solohe bus si lö moʼameʼegö tödö sewania ha börö me omasi ia alio irugi nahia wolombase bus.

2. Iʼofönaiʼö wangai halöwö khö Yehowa. Iwaʼö Faulo wa faehu Dimoteo moroi ba niha böʼö börö me ”ha tana khöra laʼera-era, tenga soguna khö Keriso Yesu”. (Filifi 2:21) Iʼila Faulo wa ira talifusö ba zi fasuinia, ha faʼaurira samösa niʼera-erara. Lö laʼosambuaʼö dödöra ba wangai halöwö khö Yehowa. Hizaʼi, tenga simane daʼö Dimoteo! Me iʼila wa iʼokhögö ginötö ba wondrouʼö halöwönia khö Lowalangi, iʼanemaiʼö ifalua daʼö simane Yesaya me imane, ”Yaʼe ndraʼo, fatenge ndraʼo.”​—Yesaya 6:8.

Hewisa enaʼö lö ebua dödö zambuana ndraʼugö ba woʼameʼegö tödö zoguna khöu hegöi soguna ba mbanua niha Keriso? Si oföna, oʼö mene-mene Waulo, ’Tatugöi hadia zabölö moguna.’ (Filifi 1:10) Ofönaiʼö wangai halöwö khö Yehowa. Si dua, timbagö halöwö si tola mangohori inötö hegöi faʼabölöu. Imane Faulo khö Dimoteo, ”Erogö wangisö zi bohou ebua, gohi zindruhu, famati, faʼomasi, faʼatulö.”​—2 Timoteo 2:22.

3. Iʼodödögö ba wangai halöwö khö Yehowa. Imane Faulo sanandrösa khö Dimoteo: ”Fao ndraʼaga wanuriaigö turia somuso dödö, simane ono khö namania.”  (Filifi 2:22) Lö areu Dimoteo. Iʼodödögö wohalöwö ba wefao khö Waulo, ba daʼa zangaʼaroʼö fahuwusara.

Iadaʼa, oya sibai halöwö ba organisasi Yehowa. Halöwö daʼa zangaʼasogö faʼomuso dödö ba sanolo yaʼugö enaʼö ahatö khö ndra talifusö. Andrö, halö gangetula enaʼö lö aetu ’owölö-ölö ba wangai halöwö Lowalangi’.​—1 Korindro 15:58.

4. Ifalua hadia zi no ifahaʼö ia. Isura Faulo khö Dimoteo, ”Odödögö woloʼö famahaʼögu, lala waʼaurigu, ohitö dödögu, famatigu, faʼebolo dödögu, faʼomasigu, ba faʼanau gölögu.” (2 Timoteo 3:10) Ifalua Dimoteo hadia zi no ifahaʼö ia, andrö wa oya halöwö nibeʼe khönia.​—1 Korindro 4:17.

Hadia so zi fahuwu khömö si no ara tobali satua sokubaloi si tola öbaliʼö duma-duma? Tom, si no tobali satua sokubaloi ba zi hauga fakhe, itörö tödönia wa so samösa zatua sokubaloi soʼameʼegö tödö ba samomaha yaʼia. Imane, ”Lö aetu manofudo khönia ba ufalua mene-menenia. Daʼa zanolo yaʼo ba wondrouʼö waʼafaduhu dödögu.”

5. Lö mamalö ifomaha ia samösa. Ibeʼe mene-mene Faulo khö Dimoteo, ’Fahaʼö ndraʼugö ba wamosumange Lowalangi soroi ba dödö.’ (1 Timoteo 4:7) Hewaʼae so zamomaha zi samösa atlet, hizaʼi moguna göi nasa ifahaʼö ia samösa. Ifarou Dimoteo Faulo, ”Böi böhöli wangodödögö fombaso föna niha sato, amenesi, ba fahaʼö ira. . . . Daʼö törö-törö tödöu, ba odödögö enaʼö oroma waʼatedoumö ba niha fefu.”​—1 Timoteo 4:13-15.

Moguna göi ödouʼö waʼatua-tuamö. Yatobali ndraʼugö niha nifahaʼö ba Zura Niʼamoniʼö sowölö-ölö, ba öʼila hadia wanuturu lala si bohou moroi ba organisasi. Böi talafo faduhusi tödö waʼaurimö. Böi so ba wangera-ngeramö wa no oya zi no ötörö irege tola öʼasiwai fefu zalua hewaʼae lö öfalua riset. Simane Dimoteo, ”faigi-faigi hewisa ndraʼugö hegöi famahaʼöu”.​—1 Timoteo 4:16.

6. Iʼodaligö geheha Yehowa. Me itutunö Faulo halöwö nifalua Dimoteo, ifasugi ba dödönia, ”Börö geheha niʼamoniʼö si no taʼokhögö, rorogö harato andre si no lafaduhusi tödö khöu.” (2 Timoteo 1:14) Moguna iʼodaligö geheha Lowalangi Timoteo.

Imane Donald si no tobali satua sokubaloi ba zi hauga fakhe, ”Niha si no mutuyu ba wangai halöwö, moguna larorogö wahuwusara khö Lowalangi. Na lafalua daʼö, itugu ’tedou-dou waʼabölöra’. Na laʼandrö geheha Lowalangi ba ladouʼö wamalua mbua-bua geheha, tola tobali ira howu-howu khö ndra talifusöra.”​—Zinunö 84:8; 1 Fetero 4:11.

No sambua famarou dödö ba wamaigi wa ira satua sokubaloi hegöi enoni sawena mutuyu, simane yaʼugö, si lö mamalö wondrouʼö ba wangai halöwö khö Yehowa. Imane Jason si no mutötöi moroi yawa, ”Sagötö tobalido satua sokubaloi, oya wamahaʼö nihalögu ba itugu tedou waʼafaduhu dödögu. Iadaʼa, uʼokhögö waʼomuso dödö ba halöwögu ba no sambua halöwö si tohude daʼö ba wamaigigu!”

Hadia lö tebulö ödouʼö zi tola öfalua? Tobali ndraʼugö howu-howu khö ndra talifusö, na öʼoʼö duma-duma Dimoteo.