1. Hadia zangoromaʼö wa oböwö Yehowa?

BA WAMOBÖRÖ, ha samö-samösa Yehowa. Aefa daʼö, ihalö gangetula ba wameʼe buala faʼauri ba niwöwöinia satua-tua, ba zorugo hegöi ba gulidanö. Yehowa no ”Lowalangi somuso tödö”, omasi ia ibeʼe khöda zi sökhi. (1 Timoteo 1:11; Yakobo 1:17) Omasi Yehowa na tasöndra waʼomuso dödö, andrö wa ifahaʼö ita enaʼö oböwö.​—Roma 1:20.

2, 3. (a) Hana wa ohahau dödöda na oböwö ita? (b) Hadia nitutunöda ba wamahaʼö daʼa?

² Ifazökhi niha Lowalangi si fakhili-khili khönia. (1 Moze 1:27) Eluahania, ifazökhi ita Yehowa si fao bua-bua niʼokhögönia. Enaʼö tola tasöndra waʼohahau dödö sindruhu hegöi howu-howu moroi khö Yehowa, moguna taʼoʼö duma-dumania. Moguna taʼameʼegö tödö niha böʼö ba taforomaʼö waʼoböwö. (Filifi 2:3, 4; Yakobo 1:5) Hadia mbörö? Börö me simanö daʼö womböwöi Yehowa ita.  Hewaʼae lö moʼahonoa ita, tola taʼoʼö Yehowa ba taforomaʼö waʼoböwö.

³ Tatutunö dania hadia wamahaʼö nihalöda moroi ba Zura Niʼamoniʼö sanandrösa ba waʼoböwö. Tafahaʼö ita hana wa omuso dödö Yehowa na oböwö ita. Tafahaʼö göi ita hewisa waʼoböwö möi fanoloda ba wamalua halöwö nibeʼe Yehowa khöda ba hana wa ohahau dödöda na oböwö ita. Tatutunö göi, hana wa böi mamalö taforomaʼö waʼoböwö.

4, 5. Hadia duma-duma nibeʼe Yehowa hegöi Yesu sanandrösa ba waʼoböwö, ba hana wa moguna taʼoʼö ira?

⁴ Omasi Yehowa na taʼoʼö ia, andrö wa omuso dödönia na oböwö ita. (Efeso 5:1) Omasi göi Yehowa na ohahau dödö niha. Taʼila daʼö ba lala womböwöinia yaʼita safönu faʼahöli-höli dödö. Ifazökhi göi gulidanö si sökhi sibai hegöi fefu zameʼe khöda faʼowua-wua dödö. (Zinunö 104:24; 139:13-16) Andrö, no tafosumange Yehowa na taʼalui lala ba wangomusoiʼö tödö niha böʼö.

⁵ Tola göi taʼoʼö Yesu, duma-duma soʼahonoa sanandrösa ba lala wangoromaʼö zi samösa niha faʼoböwö. Imane, ”Simane Ono niha, tenga si möi mangoni, no si möi enoni, sameʼe nosonia höli zato.” (Mataiʼo 20:28) Ifarou göi niha Keriso sinenge sotöi Faulo, ”Miʼokhögö wangera-ngera ba amuata daʼa ba waʼaurimi, simane niʼokhögö Keriso Yesu . . . Iröi dadaomania hegöi niʼokhögönia, ifagölösi ia simane sawuyu, ba tobali ia niha.” (Filifi 2:5, 7) Andrö, datasofu khöda samösa, ’Hadia tola uforege nasa ba woloʼö duma-duma Yesu?’​—Baso 1 Fetero 2:21.

6. Hadia nifahaʼö Yesu ita moroi ba duma-duma niha Zamaria si sökhi tödö? (Faigi gambara ba wamobörö wamahaʼö.)

⁶ Omuso dödö Yehowa na taʼoʼö duma-dumania soʼahonoa hegöi Yesu. Tola tafalua daʼö na taʼameʼegö tödö niha böʼö ba taʼalui lala ba wanolo yaʼira. Iforomaʼö Yesu wa moguna sibai daʼö me itutunö sanandrösa ba niha Zamaria si sökhi tödö. (Baso Luka 10:29-37.) Ifahaʼö ndra soloʼö khönia wa moguna latolo niha böʼö gofu haniha ira mazui hezo moroi mbanuara. Hadia itörö tödömö hana wa itutunö daʼö Yesu? Börö me so samösa niha Yahudi zanofu khönia, ”Haniha zindruhunia nawögu andrö?” Fanema li Yesu, daʼö zamahaʼö yaʼita wa moguna oböwö ita simane niha Samaria na omasi ita taʼomusoiʼö dödö Yehowa.

7. Hewisa wangoromaʼöda waʼafaduhu dödöda wa lala nifalua Yehowa zabölö sökhi? Tutunö.

⁷ Moguna göi oböwö ita börö me moʼamakhaita daʼö ba zalua ba Kabu Edena. Iwaʼö Satana wa ohahau dödö Gadamo ba Khawa na lö laʼoʼö niwaʼö Yehowa ba ha yaʼira samösa niʼangeragöra. Iʼalui dana khönia Khawa ba omasi ia tobali simane Lowalangi. Iʼalui dana khönia Adamo ba abölö iʼomusoiʼö dödö Khawa moroi na iʼomusoiʼö dödö Lowalangi. (1 Moze 3:4-6) Lö sökhi lua-luania. Ba daʼa oroma wa lö hadöi niha sohahau tödö na ha tana khönia iʼalui. Hizaʼi, na tenga tana khöda taʼalui ba oböwö ita, no taforomaʼö  waʼafaduhu dödöda wa lala nifalua Yehowa zabölö sökhi.

8. Hana wa no sinangea laʼangeragö niha böʼö ira Adamo ba Khawa?

⁸ Hewaʼae ba wamobörö ha Adamo ba Khawa zi so ba Kabu Edena, sinangea menaʼö laʼangeragö niha böʼö. Hadia mbörö? No ibeʼe khöra halöwö Yehowa enaʼö lafönui gulidanö ba labaliʼö daʼö tobali faradaiso. (1 Moze 1:28) Sinangea menaʼö na omasi Gadamo ba Khawa ohahau dödö ndraonora ba zi so miföna, simane Yehowa somasi na ohahau fefu dödöra. Tola falulu fohalöwö ira ba wombaliʼö faradaiso gulidanö andre. No halöwö sebua daʼö!

9. Hana wa hasambalö ohahau dödö niha ba ginötö mohalöwö ira ba wombaliʼö faradaiso gulidanö?

⁹ Niha soʼahonoa moguna göi falulu fohalöwö ira khö Yehowa ba wombaliʼö faradaiso gulidanö andre hegöi ba wamalua somasi ia. Na lafalua daʼö, tola lakhamö ngaluo wolombasenia. (Heberaiʼo 4:11) Khalaigö hawaʼasökhi ba hawaʼomuso dödö wamalua halöwö daʼö! Ifahowuʼö ira Yehowa na lö laʼalui dana khöra ba laʼameʼegö tödö niha böʼö.

10, 11. Hadia zanolo yaʼita ba wamalua halöwö fanuriaigö hegöi ba wombaliʼö niha tobali nifahaʼö?

¹⁰ Iadaʼa, ibeʼe khöda halöwö si  tohude Yehowa. Omasi ia na manuriaigö ita ba tabaliʼö niha tobali nifahaʼö. Ba wamalua halöwö daʼa, moguna taʼameʼegö tödö niha böʼö. Sindruhunia, tola tafalua daʼö ha na taʼokhögö gohitö dödö satulö: faʼomasi khö Yehowa hegöi niha böʼö.

¹¹ Iwaʼö Faulo wa yaʼia hegöi niha Keriso tanö böʼö ba abad siföföna, no tobali ’si falulu fohalöwö khö Lowalangi’ börö me manuriaigö ira ba lafahaʼö zindruhu. (1 Korindro 3:6, 9) Iadaʼa, tola tobali ita ’si falulu fohalöwö khö Lowalangi’ na oböwö ita wameʼe inötö, faʼabölö hegöi okhötada ba wamalua halöwö fanuriaigö nibeʼe Lowalangi khöda. No töi sebua daʼö!

12, 13. Hadia manö howu-howu nitemamö na öbaliʼö niha tobali nifahaʼö?

¹² Tola tasöndra waʼomuso dödö sebua na oböwö ita ba wameʼe inötö hegöi faʼabölöda ba wanuriaigö hegöi ba wamahaʼö niha. Daʼö nirasoi ndra talifusöda sato samahaʼö niha ba Zura Niʼamoniʼö. Omuso sibai dödöda na taʼila so niha nifahaʼöda sangila hadia zindruhu nifahaʼö Zura Niʼamoniʼö, ladouʼö wamatira, labulöʼö waʼaurira ba ibörögö latutunö ba niha böʼö hadia zi no lafahaʼö ira. Omuso göi dödö Yesu me ’mangawuli ndra nifahaʼönia si 70 ba wanuriaigö si fao faʼomuso dödö’ börö me oya zi sökhi nirasoira.​—Luka 10:17-21.

¹³ Ira talifusöda ba zi sagörö ulidanö omuso dödöra me laʼila duria moroi ba Zura Niʼamoniʼö möi fanolo niha böʼö ba wangokhögö faʼauri sabölö sökhi. Duma-dumania, omasi inönö ginötönia talifusöda ira alawe sawuyu-wuyu sotöi Anna ba wamalua halöwö khö Yehowa. * (Faigi nisura ba gahe zura.) Andrö wa findra ia ba mbanua si so ba Eropa Timur, sabölö ato moguna zanuriaigö. Isura, ”Oya ginötö ba wamahaʼö niha ba Zura Niʼamoniʼö ba daʼa ba omasido sibai. Omuso sibai dödögu ba wangai halöwö daʼa. Me mangawulido ba nomo, lö saʼae inötögu ba woʼangeragö abula dödögu samösa. Uʼangeragö niha nifahaʼögu, abula dödö hegöi faʼaombö-aombö dödöra. Uʼangeragö lala ba wanolo hegöi ba wamarou tödöra. Itugu faduhu dödögu wa abölö ’ohahau dödö ba wameʼe moroi ba wanema.’”​—Halöwö Zinenge 20:35.

14. Hewisa enaʼö tola örasoi waʼomuso dödö ba wanuriaigö hewaʼae lö lafondrondrongo niha?

¹⁴ Hewaʼae so niha zi lö omasi mamondrondrongo ba ginötö manuriaigö ita, tola omuso dödöda börö me no tabeʼe khöra ginötö ba wamondrondrongo turia somuso dödö. Omasi Yehowa na tafalua simane niʼandrönia khö Hezekieli, ”Taromaligu öfaʼema khöra, he lafondrondrongo, ba he löʼö.” (Hezekieli 2:7; Yesaya 43:10) Andrö, gofu hewisa wanemaʼöra, iʼameʼegö tödö Yehowa nifaluada. (Baso Heberaiʼo 6:10.)  Imane samösa talifusöda ira matua sanandrösa ba wanuriaigönia, ”Yaʼaga zananö, zombuwui ba maʼandrö si fao fanötöna enaʼö idouʼö waʼomasira Yehowa.”​—1 Korindro 3:6.

15. Hadia oböwö ita ha ba niha soʼameʼegö tödö yaʼita? Tutunö.

¹⁵ Omasi Yesu na oböwö ita, börö me daʼö zameʼe khöda faʼohahau dödö. Na oböwö ita, oböwö göi khöda niha. Börö daʼö ifarou ita, ”Böi tebulö mibeʼe ba niha, ba labeʼe göi khömi. Labeʼe dania khömi sambua fanuʼa safönu ba kandre-kandremi, nifasösö, nifadögö ba fahöna. Börö me suʼa-suʼa niʼanuʼaʼömi ba laʼanuʼaʼö göi khömi dania.” (Luka 6:38) Tatu manö, na oböwö ndraʼugö, te so niha si lö moʼameʼegö tödö. Hizaʼi, hewaʼae lö laʼameʼegö tödö nifaluamö, böi böhöli ba wamuala. Yafaduhu dödömö wa hasambalö so mbua si sökhi na oböwö ndraʼugö.

16. Haʼökhö manö oböwö ita, hadia mbörö?

¹⁶ Niha sangoromaʼö faʼoböwö soroi ba dödö, lö itötöna zulö. Imane Yesu, ”Na öfalua gowasa, kaoni niha si numana, sombuyu-mbuyu töla, sakela-kela ba sauʼa. Omuso dödöu börö me tebai lasulöni khöu.” (Luka 14:13, 14) Imane göi Sura Niʼamoniʼö, ”Si sökhi tödö, ba falukha howu-howu” ba ”Yaʼahowu zi so ba dödö niha si numana.” (Gamaedola 22:9; Zinunö 41:2) Oböwö ita börö me so khöda waʼomasi ba wanolo niha böʼö.

17. Hadia manö zi tola tabeʼe enaʼö tasöndra waʼohahau dödö?

¹⁷ Me itötöi Faulo wehede Yesu wa abölö ”ohahau dödö ba wameʼe moroi  ba wanema”, nitutunönia tenga ha sanandrösa ba niʼokhögöda. Tola göi tabeʼe wamarou dödö, mene-mene moroi ba Zura Niʼamoniʼö hegöi fanolo si tefaudu. (Halöwö Zinenge 20:31-35) Moroi ba wehede hegöi nifaluania, ifahaʼö ita Faulo wa moguna oböwö ita ba wameʼe inötö, faʼabölö, foʼameʼegö tödö hegöi faʼomasida.

18. Hadia niwaʼö ndra peneliti sanandrösa ba waʼoböwö?

¹⁸ Ira peneliti si no mamahaʼö yaʼira ba gamuata niha, lawaʼö wa so waʼohahau dödö ba niha na mamuala ira. So sambua artikel zangumaʼö wa itugu ohahau dödö niha na lafalua zi sökhi ba niha böʼö. Lawaʼö ira peneliti wa itugu moʼeluaha waʼaurida na tatolo niha böʼö. Andrö, so ösa ndra sagatua-tua, lafarou niha enaʼö lafalua halöwö ba wanolo niha irege lö mofökhö ira ba lasöndra waʼohahau dödö. Hizaʼi, tenga sawena tarongo daʼa. No iwaʼö khöda Yehowa, Somböi yaʼita safönu faʼomasi, wa tola ohahau dödöda na mamuala ita.​—2 Timoteo 3:16, 17.

19, 20. Hana wa omasi ndraʼugö ba wangoromaʼö faʼoböwö?

¹⁹ Niha ba zi fasuida ha tana khöra laʼalui, irege abua khöda ba wangoromaʼö faʼoböwö. Ibeʼe khöda wamasugi ba dödö Yesu wa so dombua goroisa sabölö ebua yaʼia daʼö fangomasiʼö Yehowa soroi ba dödö, noso, fangera-ngera hegöi faʼabölöda, ba taʼomasiʼö nawöda simane fangomasiʼöda yaʼita samösa. (Mareko 12:28-31) Ba wamahaʼö daʼa, no tafahaʼö ita wa niha sangomasiʼö Yehowa hasambalö laʼoʼö ia. Oböwö sibai Yehowa hegöi Yesu. Lafarou ita enaʼö taʼoʼö duma-dumara börö me laʼila wa daʼö zameʼe khöda faʼohahau dödö sindruhu. Na oböwö ita khö Lowalangi hegöi ba niha böʼö, no tafosumange Yehowa ba tola tatema mbuania hegöi niha böʼö.

²⁰ Tatu no öfalua zabölö sökhi ba wangoromaʼö faʼoböwö hegöi ba wanolo niha böʼö, mendrua manö ndra talifusöda ba wamati. (Galatia 6:10) Na lö mamalö öfalua daʼö, laʼameʼegö tödö ba laʼomasiʼö ndraʼugö niha, ba ohahau dödömö. Imane Sura Niʼamoniʼö, ”Sebua tödö, ba niʼabusoiʼö, ba sangokafui tödö nawönia, ba niʼokafui tödö dania.” (Gamaedola 11:25) Ba waʼauri hegöi fanuriaigö, oya lala si tola tafalua ba wangoromaʼö faʼasökhi dödö, faʼoböwö ba lö taʼalui dana khöda. Ba wamahaʼö aefa daʼa, tatutunö nasa lala tanö böʼö.