Hadia mbörö wa lö hadöi niha nitehegö ba wo-posting publikasi Zamaduhuʼö Yehowa ba situs Web böʼö mazui ba media sosial?

So ösa niha sangumaʼö wa tola la-copy mazui la-posting publikasida ba situs Web böʼö mazui ba media sosial börö me lö taʼandrö gefe na tabeʼe ia ba niha. Hizaʼi, no tobali abula dödö sebua daʼö ba no mangosiwawöi Lala Wangogunaʼö * (faigi nisura ba gahe zura) situs Webda. Simane si no musura ba Lala Wangogunaʼö andrö, lö hadöi niha nitehegö ba wameʼe ’gambara, buku elektronik, sinunö, foto, teks, video, mazui artikel ba Internet Konten zi no tefaʼanö ba situs Web andre (situs Web, situs file-sharing, mazui jejaring sosial)’. Hana wa moguna gamakhoita daʼö?

Fefu zi no tehenaigö ba situs Webda so hak cipta eluahania so huku zolumöʼö. Moguna sibai daʼa enaʼö lö laʼogunaʼö daʼö ba zi sala. Niha si no mondröi sindruhu mazui niha böʼö somasi mamakiko halöwöda, lahalö publikasida, labeʼe ba situs Webra enaʼö tedönisi dödö ndra Samaduhuʼö Yehowa hegöi niha böʼö. Lafazökhi situs simane daʼö, enaʼö aombö dödö niha ba organisasida. (Zinunö 26:4; Gamaedola 22:5) So göi zangogunaʼö publikasida mazui logo jw.org ba iklan, aplikasi elektronik hegöi ba gamawaöra. Hizaʼi, börö me taʼokhögö hak cipta hegöi merek dagang, so dane-dane khöda ba wanimbagö enaʼö lö laʼogunaʼö daʼö ba zi sala. (Gamaedola 27:12) Hizaʼi, lö itolo ita pengadilan na so niha nitehegöda, hewaʼae ira talifusöda daʼö, ba wo-posting publikasida ba situs Web böʼö mazui ba wangogunaʼö logo jw.org ba gamawaöra.

So deʼalania na tenga moroi ba jw.org ta-download publikasi. Ha khö ndra ’sawuyu si lö faröi ba satua-tua’ ibeʼe halöwö Yehowa ba wangaʼasogö gö wamati. (Mataiʼo 24:45) Ha situs resmi daʼa niʼogunaʼö ndra ’sawuyu’ ba wangaʼasogö gö wamati, yaʼia daʼö www.pr418.com, tv.pr418.com, ba wol.pr418.com. Ha tölu göi aplikasi resmi niʼokhögöda ba perangkat elektronik, yaʼia daʼö JW Language^®, JW Library^®, ba JW Library Sign Language^®. Ba situs hegöi ba aplikasi daʼa, lö hadöi iklan mazui fefu zoʼamakhaita ba gulidanö Zatana. Na so gö wamati ba situs Web hegöi aplikasi tanö böʼö, no sambua teʼala daʼö börö me tola manö no labulöʼö nösinia.​—Zinunö 18:27; 19:9.

Na labeʼe publikasida ba situs Web si tola lakomentari niha, tola laʼogunaʼö daʼö niha si no mondröi sindruhu hegöi niha si fatuwu khöda, ba wangoʼaya organisasi Yehowa. So ösa ndra talifusöda, tedönisi dödöra fabuʼa-buʼa ba niha simane daʼö, irege teʼoʼaya döi Yehowa. Lö tefaudu na ba Internet taʼatulöʼö lala wangera-ngera zi samösa niha hegöi ba wanolo yaʼia enaʼö aboto ba dödönia zindruhu. (1 Timoteo 6:3-5; 2 Timoteo 2:23-25) So göi ösa niha samazökhi situs Web hegöi media sosial sangogunaʼö töi organisasida mazui töi ndra Boto Solohe. Hizaʼi, falimosa daʼö. Lö hadia anggota Boto Solohe sangokhögö situs Web pribadi mazui media sosial.

Na tafarou niha ba wamokai jw.org, no tatuhini ba wanuriaigö ”turia somuso dödö”. (Mataiʼo 24:14) Itugu mubohouni situs Web hegöi aplikasida. Omasi ita na fefu niha latema mbua moroi ba daʼö. Tobali, tola taʼogunaʼö e-mail mazui link ba wokirim publikasi elektronik si so ba situs Webda. Na tafalua daʼö, no tabeʼe wanuturu lala ba niha enaʼö laʼondrasi gumbu si hasambua si no ifaduhusi tödö Yehowa khö ndra ’sawuyu si lö faröi ba satua-tua’.