FAMATI tola ibeʼe ita abölö sibai. Duma-dumania, hewaʼae omasi Zatana ba wamakiko fahuwusada khö Yehowa, famati zanolo yaʼita ba ’wanaha nono wana soʼalitö andrö khö Zatana’. (Ef. 6:16) Na taʼokhögö wamati, tola tataögö ngawalö gabula dödö hewaʼae simane hili waʼebuania. Imane Yesu khö ndra nifahaʼönia, ”Na so khömi wamati simane faʼebua hunö sesawi, tola miwaʼö ba hili andre, ’Fawuʼaʼö moroi ba daʼa,’ ba hasambalö tewuʼa ia.” (Mat. 17:20) Tola itugu aro ita na taʼokhögö wamati. Tobali, moguna taʼangeragö wanofu-nofu daʼa: Hadia wamati andrö? Hadia lua-lua wamati andrö ba dödöda? Hewisa enaʼö itugu aro wamatida? Ba haʼökhö zinangeania mamati ita?​—Rom. 4:3.

Famati andrö tenga ha asala faduhu dödöda mazui tawaʼö wa sindruhu Zura Niʼamoniʼö andrö, börö me ”faduhu göi dödö malaʼika si lö sökhi khönia [wa so Lowalangi] ba ataʼu ira si fao fanizi-nizi”. (Yak. 2:19) Na simanö, hadia zindruhunia famati andrö?

Moloʼö Zura Niʼamoniʼö, so dombua geluaha wamati. Si oföna, ”famati andrö ba no faʼaro dödö ba nidöna-döna”. (Heb. 11:1a) Na so khömö wamati, tatu sindruhu-ndruhu faduhu dödömö wa satulö fefu niwaʼö Yehowa ba hasambalö alua. Imane Yehowa ba ndraono Gizaraʼeli, ”Na miʼila miwuʼai nifakhoigu lala zi maʼökhö ba nifakhoigu lala zi bongi, faböi saʼae moluo ba faböi saʼae bongi, ba ginötönia, ba uwuʼai göi wawuʼusa li andrö khögu, khö genonigu Dawido.” (Yer. 33:20, 21) Hadia no irai aombö dödöu na lö hadöi laluo hegöi si bongi börö me lö tumbu luo mazui aekhu luo? Tatu löʼö. Hasambalö faduhu dödömö wa börö hukum alam tola so laluo hegöi si bongi, ba ulidanö ifasui-sui luo. Tatu faduhu göi dödömö wa Somböi fefu huku hasambalö ifalua hadia zi no ifabuʼu!​—Yes. 55:10, 11; Mat. 5:18.

Si dua, famati andrö ”faʼafaduhu dödö ba ngawalö hadia ia zi lö oroma”. Famati mufotöi ia ”faʼafaduhu dödö” hewaʼae lö taʼila hörö hizaʼi sindruhu-ndruhu so ia. (Heb. 11:1b) Hadia duma-dumania? Na manofu khömö zi samösa iraono, ’Hezo tola taʼila wa so nangi?’ Hewaʼae lö irai öʼila nangi, tola öfatunö khönia dandra wa so nangi simane na tahasugö hanu-hanuda, iwuwusi nangi, ba tanö böʼönia. Tandra simane daʼa si tobali fanolo khönia enaʼö aboto ba dödönia wa sindruhu-ndruhu so nangi hewaʼae lö oroma. Simane daʼö göi famati teʼodane-dane ba dandra saro.​—Rom. 1:20.

Börö me famati teʼodane-danö ba dandra saro, moguna khö zi samösa niha enaʼö iʼokhögö ”waʼaboto ba dödö si tefaudu sanandrösa ba zindruhu”. (1 Tim. 2:4) Hizaʼi lö tobönö na ha daʼö manö. Isura Waulo, ”Tefotöi ami niha satulö börö me so wamati ba dödömi.” (Rom. 10:10) Tobali lö tobönö na ha mufaduhusi tödö zindruhu, hizaʼi moguna taʼameʼegö tödö ia. Na iʼameʼegö tödö zindruhu si samösa niha, awena tola iforomaʼö wamati, eluahania moguna ifaudugö nifaluania ba zindruhu. (Yak. 2:20) Hizaʼi na sindruhu-ndruhu  lö iʼameʼegö tödö zindruhu zi samösa niha, gofu hawaʼaro dandra andrö hasambalö lö faduhu dödönia. Aro dödönia ba nifaduhusinia tödö iadaʼa mazui lö tebulö ia ba wamalua hadia zomasi ia. (2 Fet. 3:3, 4; Yud. 18) Daʼö mbörö me götö Zura Niʼamoniʼö, lö fefu niha sangila dandra sahöli-höli dödö tola mamati. (4 Moz. 14:11; Yoh. 12:37) Eheha Lowalangi iʼasogö wamati ha ba niha sangomasiʼö zindruhu.​—Gal. 5:22; 2 Tes. 2:10, 11.

Razo Dawido samösa niha sangokhögö famati saro. (Heb. 11:32, 33) Hizaʼi, lö fefu nösi nomonia laʼokhögö wamati simane yaʼia. Duma-dumania, samuza inötö mofönu Dawido me irongo wa mangoʼaya Goliato. Eliabi gaʼa Dawido siaʼa, iböbögö khö Dawido wa lö baga ohitö dödönia. Daʼö zangoromaʼö wa lö khö Geliabi famati. (1 Zam. 17:26-28) Lö hadöi niha sangokhögö famati iʼotarai me tumbu mazui ondröita moroi ba zatuania. Tatu manö mamati Dawido börö me iʼokhögö wahuwusa si sökhi khö Lowalangi.

Ba Zinunö 27, itutunö Dawido hana wa tola so khönia wamati saro. (Ayati 1) Iʼangerönusi Dawido fefu ngawalö zalua khönia hegöi lala Yehowa ba wolawa fefu nudunia. (Ayati 2, 3) Iʼameʼegö tödö sibai Dawido ose Lowalangi Yehowa. (Ayati 4) Lö tebulö Dawido ba wamosumange Yehowa ba nose Lowalangi si fao ono mbanua Lowalangi tanö böʼö. (Ayati 6) Lö tebulö iʼandrö wanolo khö Yehowa ba wangandrö. (Ayati 7, 8) Omasi göi Dawido na lafahaʼö ia ba lala Lowalangi. (Ayati 11) Ba dödö Dawido, moguna sibai nifotöi wamati irege imane, ”Faduhu dödögu.”​—Ayati 13.

Tola öʼokhögö wamati simane Dawido na öʼoʼö lala wangera-ngera hegöi si toʼölö nifalua Dawido simane niwaʼö ba Zinunö 27. Teʼodane-dane wamati ba waʼaboto ba dödö si tefaudu. Tobali, na asese öfahaʼö ndraʼugö ba Daromali Lowalangi hegöi publikasi si teʼodane-dane ba Zura Niʼamoniʼö, itugu aoha khömö ba wangokhögö famati yaʼia daʼö bua-bua moroi ba geheha Lowalangi. (Zin. 1:2, 3) Ba ginötö öfahaʼö ndraʼugö, beʼe ginötömö ba woʼangerönusi yaʼia. Na so khömö foʼangerönusi, itugu öʼandrö sibai saohagölö khö Yehowa. Na itugu öʼandrö saohagölö, itugu omasi ndraʼugö ba wangoromaʼö famati, simane ba wamosumange yaʼia ba gangowuloa hegöi ba wangombakha ba niha sanandrösa ba wanötöna niʼokhögömö. (Heb. 10:23-25) Tola göi taforomaʼö wamati na ’lö taböhöli wangandrö ba lö adage-dage’. (Luk. 18:1-8) Börö daʼö ’böi taböhöli wangandrö’ khö Yehowa, yafaduhu dödöda wa ’so so sa dödönia ita’. (1 Tes. 5:17; 1 Fet. 5:7) Famati zamarou yaʼita enaʼö so nifaluada, ba nifaluada daʼö göi zangaroʼö famatida.​—Yak. 2:22.

Ba mbongi fatua lö mate Yesu, imane khö ndra nifahaʼönia, ”Miʼamati khö Lowalangi ba miʼamati  göi khögu.” (Yoh. 14:1) Tobali, tenga ha khö Yehowa manö mamati ita, moguna göi mamati ita khö Yesu. Hewisa wangoromaʼöda wa mamati ita khö Yesu? Datatutunö tölu lala ba wamalua yaʼia.

Si oföna, baliʼö höli andrö wa no buala moroi khö Lowalangi ba khömö samösa. Imane Faulo, ”Ufaudugö waʼaurigu iadaʼa moloʼö famati khö Nono Lowalangi si no mangomasiʼö yaʼo ba sameʼe faʼaurinia ba khögu.” (Gal. 2:20) Ba ginötö mamati ndraʼugö khö Yesu, daʼö zangoromaʼö wa faduhu dödömö wa höli andrö soguna khömö samösa, tobali dane-dane ba wangefaʼö yaʼugö moroi ba horö, sameʼe khömö fanötöna faʼauri si lö aetu, hegöi si tobali dandra sebua wa iʼomasiʼö ndraʼugö Lowalangi. (Rom. 8:32, 38, 39; Ef. 1:7) Na faduhu dödömö wa höli andrö soguna khömö samösa, tola teʼabölöʼö ndraʼugö ba tola ölawa waʼide-ide dödö.​—2 Tes. 2:16, 17.

Si dua, moguna ahatö ndraʼugö khö Yehowa ba wangandrö. Börö höli nibeʼe Yesu tola mangandrö ita khö Yehowa ”enaʼö tatema waʼahakhö dödö hegöi faʼasökhi dödönia sebua andrö, sanolo yaʼita ba ginötö si tefaʼudu”. (Heb. 4:15, 16; 10:19-22) Fangandrö si tobali fanolo enaʼö tola tataögö wanandraigö.​—Luk. 22:40.

Si tölu, moloʼö khö Yesu. Isura Yohane, ”Niha samati khö Nono isöndra waʼauri si lö aetu ba si lö mamati khö Nono, lö isöndra waʼauri, irasoi wönu Lowalangi sagötö faʼara.” (Yoh. 3:36) Ba ayati daʼa, ibeʼe gamaehuta niha samati hegöi niha si lö moloʼö khö Yesu. Tobali moguna öforomaʼö wa mamati ndraʼugö khö Yesu na öʼoʼö niwaʼönia. Oʼö niwaʼö Yesu ba woloʼö ’oroisa Keriso’ yaʼia daʼö fefu hadia ia nifahaʼönia hegöi faretania. (Gal. 6:2) Tola öʼoʼö göi Yesu na öfalua wanuturu lala nibeʼe ’sawuyu si lö faröi ba satua-tua’. (Mat. 24:45) Na öʼoʼö Yesu, tola itugu teʼabölöʼö ndraʼugö ba wanaögö abula dödö sebua simane teu fabaya angi.​—Mat. 7:24, 25.

Samösa ira matua si no irai muʼao khö Yesu, ”Mamati ndraʼo! Tolodo enaʼö monönö wamatigu nasa!” (Mrk. 9:24) Hewaʼae no mamati ia, aboto ba dödönia nasa wa moguna latolo ia enaʼö itugu mamati ia. Simane ira matua daʼö, itaria moguna latolo ita enaʼö itugu mamati. Ba fefu ita tola taʼaroʼö wamatida irugi iadaʼa. Simane si no tatutunö, tola teʼaroʼö wamatida na tafahaʼö ita ba Daromali Lowalangi ba taʼangerönusi ia enaʼö itugu so khöda wangandrö saohagölö khö Yehowa. Tola göi teʼaroʼö wamatida, na lö tebulö tafosumange Yehowa si fao khö ndra talifusöda si sara lala wamati, tafatunö ba niha böʼö sanandrösa ba wanötöna niʼokhögöda ba lö tebulö ba wangandrö. Na aro wamatida hasambalö tatema howu-howu sebua. Imane Daromali Lowalangi, ”Yaʼami ira talifusö niʼomasiʼö, miʼazökhi ba miʼamoniʼö wamatimi . . . enaʼö ba lumö waʼomasi Lowalangi so ami.”​—Yud. 20, 21.