1-3. Hadia manö mbörö wa lö tola löʼö laröi halöwöra ndra talifusö sohalöwö safönu inötö?

IMANE Robert hegöi Mary Jo, ”Omuso sibai dödöma ba halöwöma tobali utusan injil. Hizaʼi me no 21 fakhe ndraʼaga ba halöwö andrö, satuama si daöfa itugu atua ba alö waʼabölöra. Lö fatimba khöma ba wondrorogö yaʼira. Hizaʼi, abu sibai dödöma börö me lö tola löʼö maröi halöwö niʼomasiʼöma ba mbanua si no lafataro ndraʼaga.”

² Imane William hegöi Terrie, ”Meʼe ndraʼaga me maʼila wa lö saʼae mafuliga ba mbanua si no lafataro ndraʼaga börö wökhöma. Ba wangai halöwö khö Yehowa ba soi böʼö, no ohitö dödöma iʼotarai me föna. Hizaʼi, iadaʼa tebai saʼae mafalua daʼö.”

³ Imane Aleksey, ”Aboto ba dödöma wa omasi ndra samatörö enaʼö laduhö gödo ndraha ba nahia sohalöwö ndraʼo. Ba me alua daʼö, lö tola löʼö maröi Mbetieli, fefu ndraʼaga abu sibai dödöma.”

4. Hadia wanofu-nofu nitutunöda ba wamahaʼö daʼa?

⁴ Baero nitutunö moroi yawa, ngahönö nösi nomo Mbetieli hegöi niha sohalöwö safönu inötö tanö böʼö, lö tola löʼö laröi halöwöra. * Tola manö abua khö ndra talifusöda si lö faröi andre ba wanaögö faʼatebulö andrö, börö me laʼomasiʼö sibai halöwöra. Hadia zi tola lafalua enaʼö aoha khöra ba wamaudugö lala waʼaurira ba waʼatebulö andrö? Hewisa wanolomö yaʼira? Fanema li moroi ba wanofu daʼö tobali fanolo khöda fefu ba wanaögö faʼatebulö salua ba waʼaurida.

5. Hadia manö lua-luania börö waʼatebulö halöwö?

⁵ Gofu hezo mohalöwö ita, he ba Mbetieli mazui ba halöwö tanö böʼö safönu inötö, si toʼölönia taʼomasiʼö ndra talifusöda si fao khöda ba wangai halöwö hegöi nahia nifataro yaʼita. Tatu abu sibai dödöda na taröi halöwöda. Hasambalö tatörö tödöda ndra talifusöda, ba ataʼu ita na so hadia ia khöra, mendrua manö na mofanö ita ba ginötö so wolohi ba mbanua daʼö. (Mat. 10:23; 2 Kor. 11:28, 29) Aefa daʼö, na findra ita ba mbanua böʼö, tafaudugö waʼaurida ba budaya si bohou, ba tola manö abua khöda wamalua yaʼia. Tola göi alua daʼa na mangawuli ita ba mbanuada samösa. Imane Robert hegöi Mary Jo, ”Lö saʼae toʼölö ndraʼaga ba budayama, ba abua khöma wanuriaigö ba li niʼogunaʼöma samösa. Marasoi wa hulö niha si fatewu ndraʼaga ba mbanuama samösa.” Aefa daʼö, tola manö so ösa ndra talifusöda samuʼa ngawalö zoguna si lö niʼangeragöra ba wamobörö. Tola manö so khöra waʼaombö dödö ba aetu wanötönara. Tobali, hadia zi tola lafalua ndra talifusöda andre?

6. Hewisa enaʼö lö tebulö ahatö ita khö Yehowa?

⁶ Böi tebulö ahatö khö Yehowa. (Yak. 4:8) Hewisa wamaluada daʼö? Moguna sindruhu-ndruhu faduhu dödöda khö Yehowa, börö me yaʼia ”samondrongo fangandrö”. (Zin. 65:3) Imane Zinunö 62:9, ”Mibokai dödömi khönia.” ’Oya zi tola ifalua Yehowa moroi ba niʼandröda hegöi si tola takhalaigö.’ (Ef. 3:20) Tenga ha ibeʼe khöda Yehowa ngawalö hadia ia niʼandröda ba wangandrö. Tola iʼasiwai gabula dödöda moroi ba lala si lö irai takhalaigö.

7. (a) Hadia zanolo yaʼita enaʼö lö tebulö ahatö khö Yehowa? (b) Moloʼö Heberaiʼo 6:10-12, hadia mbuania na lö faröi ita ba wamosumange Yehowa?

⁷ Enaʼö lö tebulö ahatö ita khö Yehowa, moguna tabaso Zura Niʼamoniʼö ba taʼangerönusi ia. Imane samösa dalifusöda ira matua si no irai tobali utusan injil, ”Lö tebulö ndraʼaga ba wamalua famahaʼö yomo ba nomo hegöi ba wamaʼanö waö-waö halöwö ba gangowuloa, simane si toʼölö mafalua ba mbanua nifataro ndraʼaga me mböröta.” Aefa daʼö, moguna owölö-ölö ita ba wefao manuriaigö khö ndra talifusö ba mbanua niha Keriso sawena farahu ita. Lö irai iʼolifugö Yehowa niha si lö faröi ba wamosumange yaʼia, hewaʼae na iadaʼa lö oya zi tola lafalua simane me mböröta.​—Baso Heberaiʼo 6:10-12.

8. Hewisa wehede ba 1 Yohane 2:15-17 möi fanoloda ba woʼöna-önaiʼö faʼaurida?

⁸ Moguna öʼöna-önaiʼö waʼaurimö. Ba gulidanö Satana, ato niha saombö tödö ba zoguna. Hizaʼi, böi tehegö waʼaombö dödö daʼö  irege öböhöli wamosumange Yehowa. (Mat. 13:22) Tola manö sökhi ohitö dödö nawöda hegöi ösi nomoda mazui niha böʼö ba ginötö lafarou ita wangalui kefe sebua, enaʼö so khöda waʼohahau dödö. Hizaʼi, böi fondrondrongo ira. (Baso 1 Yohane 2:15-17.) Faduhusi tödö Yehowa, si no fawuʼu li wa hasambalö ibönökhi fefu zoguna khöda ba wamati, nirasoida, hegöi zoguna khöda ba waʼauri ”ba ginötö si tefaudu”.​—Heb. 4:16; 13:5, 6.

9. Moloʼö Gamaedola 22:3, 7, hana wa moguna tatimbagö foʼömö si lö moguna, ba hadia zanolo yaʼita ba wangai angetula si fao faʼatua-tua?

⁹ Böi moʼömö na lö moguna. (Baso Gamaedola 22:3, 7.) Ba ginötö findra ita ba mbanua böʼö, tola manö oya gefe niʼogunaʼöda, ba tola manö tefali ita ba gömö. Enaʼö lö alua daʼö, böi öli gama-gama na sindruhu-ndruhu lö moguna khömö irege öfiza gefe mazui kefe soʼono. Ba ginötö abu dödöda, simane ba ginötö tarorogö nösi nomoda sofökhö, tola manö abua khöda ba wotatugöi hawaʼebua gefe nifizada. Na alua zimane daʼa, törö tödömö wa ”fangandrö si fao fangalulu” tola tobali fanolo khömö ba wangai angetula si fao faʼatua-tua. Ifondrondrongo gangandröwamö Yehowa ba ibeʼe khömö waʼahono dödö si tola ’wondrorogö dödömö awö gera-eramö’. Buania tola so khömö waʼahono dödö ba woʼangeragö hadia zinangea öfalua.​—Fil. 4:6, 7; 1 Fet. 5:7.

10. Hewisa enaʼö taʼokhögö si fahuwu ba mbanua niha Keriso sawena farahu ita?

¹⁰ Rorogö wahuwusa si sökhi khö ndra talifusö si sara lala wamati hegöi ba nösi nomomö. Tutunö nirasoimö hegöi daha-taha nitaögömö khö zi fahuwu khömö, mendrua manö na yaʼira si no irai manaögö abula dödö simane nitaögömö. Na öfalua daʼö tola so khömö waʼahono dödö. (Zango. 4:9, 10) Böi tebulö fahuwu ndraʼugö khö ndra talifusö ba mbanua niha Keriso si farahu ndraʼugö ba zilalö. Hizaʼi, moguna öʼalui si fahuwu khömö tanö böʼö ba mbanua niha Keriso sawena farahu ndraʼugö. Na omasi ndraʼugö so zi fahuwu khömö, moguna göi öbaliʼö ndraʼugö si fahuwu si sökhi. Hewisa wamalua yaʼia? Tutunö zi sökhi zalua khömö me öhalö halöwö khö Yehowa. Na öfalua daʼö, tola göi so khöra waʼomuso dödö simane nirasoimö. Tola manö so ösa ndra talifusö ba mbanua niha Keriso, ambö aboto ba dödöra hana wa öʼomasiʼö halöwö safönu inötö. Hizaʼi, tola manö göi so ösa ndra talifusö somasi mangila ba somasi fahuwu khömö. Hizaʼi, böi talafo oya ötutunö waʼamofozu si no irai ökhamö mazui lala wangera-ngera si lö tefaudu nirasoimö.

11. Hadia zinangea öfalua enaʼö lö tebulö so waʼomuso dödö ba wongambatömö?

¹¹ Na öröi halöwömö börö me mofökhö woʼomomö, böi ötahigö ia. Ba na yaʼugö samösa zofökhö, böi ötahigö ndraʼugö, ba böi so ba wangera-ngeramö wa no öbeʼe afatö dödö woʼomomö. Törö tödömö wa yaʼami si darua ”sambua boto” ba no fawuʼu li ami föna Yehowa wa faoma mirorogö nawömi gofu hadia ia zalua. (Mat. 19:5, 6) Na öröi halöwömö  börö me lö ödöna-döna manabina woʼomomö, moguna iʼila nonomö wa abölö moguna ia moroi ba halöwö nifaluamö ba zilalö. Faduhuʼö ba dödö nonomö wa yaʼia ”okhöta” nibeʼe Lowalangi. (Zin. 127:3-5) Aefa daʼö göi, tutunö khönia zalua khömö ba zilalö me öhalö halöwö safönu inötö. Na öfalua daʼö, tola göi tefarou dödönia ba wangai halöwö safönu inötö.

12. (a) Hewisa wanoloda ndra talifusö sangai halöwö safönu inötö enaʼö lö tebulö ira ba halöwöra? (b) Na latema halöwö si bohou, hewisa wanoloda yaʼira enaʼö aoha khöra ba wamaudugö lala waʼaurira?

¹² Oya mbanua niha Keriso hegöi ira talifusöda, omasi ira ba wanolo ndra talifusö sohalöwö safönu inötö enaʼö lö tebulö ira ba wangai halöwö. Hewisa wanolo yaʼira? Moguna lafarou dödö ndra talifusö sangai halöwö safönu inötö, enaʼö lö tebulö ira ba halöwöra. Mazui, tola manö labeʼe zoguna khöra. Baero daʼö nasa, na fandröndröu nahia waʼatoröira moroi ba nösi nomora, ira talifusö si so ba mbanuara samösa tola latolo nösi nomora. (Gal. 6:2) Na ira talifusöda sangai halöwö safönu inötö latema halöwö si bohou ba lafataro ira ba mbanua niha Keriso si farahu ndraʼugö, böi irai so ba dödömö wa tebeʼe khöra halöwö daʼö börö me no lafalua zala mazui ambö ira ba wamalua halöwö nifaluara ba zilalö. * Hizaʼi, tolo ira enaʼö aoha khöra ba wamaudugö lala waʼaurira. Temaʼö ira soroi ba dödömö ba suno ira ba halöwö si no lafalua, hewaʼae na iadaʼa lö oya zi tola lafalua simane ba zilalö börö wökhöra. Moguna enaʼö itugu aboto ba dödömö ira. Fahaʼö ndraʼugö moroi khöra börö me no oya waʼaboto ba dödö nitemara, famomaha, hegöi salua khöra.

13. Hadia wanolo si tola tabeʼe khö ndra talifusö sanema halöwö si bohou?

 ¹³ Ba wamobörö, ira sangai halöwö safönu inötö sanema halöwö si bohou, tola manö moguna khöra wanolo moroi khömö ba wangalui nahia waʼatoröira, transportasi, halöwö, hegöi ngawalö zoguna tanö böʼönia. Tola manö göi moguna khöra informasi sanandrösa ba zoguna khöra si ero maʼökhö, simane ba wamuʼa listrik hegöi idanö. Hizaʼi, sabölö moguna khöra yaʼia daʼö foʼameʼegö tödö moroi khöda. Tola manö laforege ba wanaögö abula dödö sanandrösa ba wökhö mazui ba wondrorogö nösi nomora sofökhö. Mazui abu dödöra börö me mate niha niʼomasiʼöra. * Hewaʼae lö laforomaʼö, tola manö abu dödöra börö me latörö tödöra ndra talifusö ba mbanua si farahu yaʼira ba zilalö. Tola manö fawuka wangera-ngerara ba si toʼölönia moguna ginötö enaʼö ifuli so khöra waʼomuso dödö.

14. Hewisa ndra sanuriaigö ba wanolo samösa dalifusöda ira alawe ba wamaudugö lala waʼaurinia ba halöwö si bohou?

¹⁴ Tola göi ötolo ira ba wamaudugö lala waʼaurira na öfaogö ira ba wanuriaigömö hegöi ba wangabölöʼö yaʼira moroi ba duma-dumamö. Imane samösa dalifusöda ira alawe si no mangai halöwö khö Yehowa ba zi hauga fakhe ba soi böʼö, ”Ba soi nifataro ndraʼo me mböröta, ero maʼökhö ufahaʼö niha ba Zura Niʼamoniʼö. Hizaʼi, na manuriaigö ndraʼo iadaʼa ba nahia si bohou, abua sibai khögu ha ba wombaso ayati Zura Niʼamoniʼö mazui ba wangoromaʼö video. Hizaʼi, ira sanuriaigö si so ba daʼa, laʼohe ndraʼo ba wefao khöra ba niha nifalukhaisira hegöi nifahaʼöra ba Zura Niʼamoniʼö. Börö me uʼila ndra talifusö si lö faröi ba sowölö-ölö ba wamahaʼö niha ba Zura Niʼamoniʼö, itugu terou dödögu ba wanuriaigö ba mbanua daʼö. Fefu daʼa sameʼe khögu mangawuli so waʼomuso dödö.”

15. Hewisa enaʼö ötema mbua si sökhi moroi ba halöwömö si bohou?

¹⁵ Tola ötema mbua si sökhi ba halöwömö si bohou. Böi angeragö wa tebeʼe khömö halöwö si bohou börö me no öfalua zala, ba böi so ba dödömö wa iadaʼa lö moʼeluaha ndraʼugö. Angeragö hewisa Yehowa ba wanolo ndraʼugö iadaʼa ba böi tebulö ba wanuriaigö. Oʼö duma-duma  niha Keriso si lö faröi me ba abad siföföna. Gofu hezoso manö so ira ”laturiaigö duria somuso dödö moroi ba daromali Lowalangi ba mbanua nirugira”. (Hal. 8:1, 4) Na lö tebulö ndraʼugö manuriaigö, tola ötema mbua si sökhi. Duma-dumania, so ösa ndra perintis nifofanö moroi ba zi sambua soi irege findra ira ba soi sahatö. Ba soi nirugira andrö, ato sibai muʼogunaʼö zanuriaigö ba li niʼilara. Ba zi hauga waŵa oya kelompok sawena mufasindro sangogunaʼö li daʼö ba itugu monönö manö waʼatonia.

16. Hewisa enaʼö so khömö waʼomuso dödö ba nahia si bohou nifataro ndraʼugö?

¹⁶ Imane Zura Niʼamoniʼö, ”Fangabeʼeda waʼomuso dödö andrö ba khö Yehowa.” (Neh. 8:10) Faʼomuso dödö sebua khöda yaʼia daʼö moroi ba wahuwusa si sökhi khö Yehowa, tenga moroi ba halöwöda, hewaʼae na taʼomasiʼö sibai halöwö daʼö. Börö daʼö, böi tebulö wefao khö Yehowa, andrö waʼatua-tua moroi khönia, fanuturu lala, hegöi fotuhini moroi khönia. Törö tödömö wa öʼomasiʼö halöwö me mböröta börö me soroi ba dödömö ba wanolo niha si so ba mbanua daʼö. Iadaʼa, moguna sindruhu-ndruhu öfalua halöwö si no lafataro ndraʼugö ba nahia si bohou, ba faigi hewisa Yehowa ba wanolo yaʼugö ba wangomasiʼö halöwö nifaluamö andrö.​—Zango. 7:10.

17. Hadia zinangea tatörö tödöda sanandrösa ba halöwöda iadaʼa?

¹⁷ Moguna tatörö tödöda wa tafosumange Yehowa sagötö faʼara, hizaʼi halöwöda iadaʼa ha gasa-gasa. Ba gulidanö si bohou, tola manö fefu ita tatema halöwö si faböʼö-böʼö moroi ba halöwöda iadaʼa. Aleksey nitutunö moroi yawa, iwaʼö wa faʼatebulö halöwö nifaluania samaʼanö yaʼia ba waʼatebulö salua ba zi so miföna. Imane, ”Iʼotarai mböröta, aboto ba dödögu wa Yehowa hegöi ulidanö si bohou sindruhu-ndruhu so ia, hizaʼi awena iadaʼa sindruhu-ndruhu ahatö ndraʼo khö Yehowa ba faduhu dödögu wa gulidanö si bohou so ba ndrundruma hörö.” (Hal. 2:25) Gofu hadia ia halöwöda, lö tebulö ita wefao khö Yehowa. Lö irai iröi ita, ba hasambalö ibeʼe khöda wanolo enaʼö lö tebulö ba wamosumange yaʼia si fao faʼomuso dödö, gofu hezo so manö so ita.​—Yes. 41:13.