1. Hadia zinangea lafalua ira niha Keriso enaʼö larugi gamozua ba wagohisa wanöndra faʼauri?

NIHA Keriso no so ba wagohisa wanöndra faʼauri. Hewaʼae na awena tabörögö fagohi mazui no hauga fakhe so ita ba wagohisa, moguna lö tebulö fagohi ita irugi gamozua. Mene-mene nibeʼe Waulo ba niha Keriso ba Wilifi, möi fangabölöda ba wangasiwai wagohisa andre. Me latema zura Waulo, so ösa ndra talifusö ba mbanua niha Keriso ba abad siföföna si lö faröi ba zi hauga fakhe ba wamosumange Yehowa. Hewaʼae simanö, lö tebulö Waulo wamasugi ba dödöra enaʼö böi laböhöli wagohisa si fao faʼanau gölö. Faulo samösa lö tebulö ia ’fagohi ba wogamö buala’, ba omasi ia enaʼö lö tebulö ira ba woloʼö duma-dumania.​—Fil. 3:14.

2. Hana wa moguna ba mbanua niha Keriso ba Wilifi mene-mene nibeʼe Waulo?

² Moguna ba niha Keriso ba Wilifi mene-mene nibeʼe Waulo. Iʼotarai me tefasindro banua niha Keriso andrö, oya wanandraigö nitaögö ndra talifusö ba daʼö. Tebörögö daʼö me latema gangilata ira Faulo hegöi Sila ba lakaoni ira weʼamöi ”ba Makedonia”. Larugi ba Wilifi arakhagö me döfi 50 M. (Hal. 16:9) Ba daʼö, falukha ira khö zi samösa ira alawe sotöi Lidia, ’somasi mamondrongo niwaʼöra ba ibokai dödönia Yehowa’ ba wanemaʼö turia somuso dödö. (Hal. 16:14) Lö ara aefa daʼö, tebayagö idanö Lidia hegöi si toröi ba nomonia. Hizaʼi, lö ahono dödö Gafökha. Tohare niha si so ba mbanua daʼö, ba laʼohe Waulo hegöi Sila föna ndra samatörö, ba laböbögö khöra wa no lakalirukö mbanua andrö. Lua-luania, laböbözi Faulo hegöi Sila, labeʼe ira ba gurunga, ba lafofanö ira moroi ba mbanua daʼö. (Hal. 16:16-40) Hadia awuwu ira? Löʼö! Hewisa ndra talifusö si so ba mbanua niha Keriso sawena mufasindro? Anau göi gölöra ba tobali ira  duma-duma khöda! Tatu teʼabölöʼö ira moroi ba duma-duma Waulo hegöi Sila.

3. Hadia zaboto ba dödö Waulo, ba hadia wanofu-nofu nitutunöda?

³ Ihalö gangetula Faulo enaʼö lö awuwu. (2 Kor. 4:16) Aboto ba dödönia wa moguna iʼosambuaʼö dödönia ba mbuala nitemania, enaʼö lö faröi ba wamosumange Yehowa irugi gamozua. Hadia wamahaʼö si tola tahalö moroi ba duma-duma Waulo? Ba ginötö iadaʼa, hewisa duma-duma nono mbanua Yehowa si lö faröi sangoromaʼö wa tola anau gölöda hewaʼae oya gabula dödö? Ba hewisa wanötönada ba zi so miföna tola möi fangabölöda enaʼö lö irai awuwu?

4. Hewisa enaʼö lö tebulö Waulo ba wanuriaigö gofu hadia zalua khönia?

⁴ Angeragö zalua khö Waulo me isura zura ba mbanua niha Keriso ba Wilifi. Me lakuru ia ba nomo si so ba Roma, tebai mofanö ia weʼamöi manuriaigö. Hizaʼi, lö tebulö ia manuriaigö ba niha samalukhaisi yaʼia ba isura zura ba mbanua niha Keriso. Iadaʼa göi, ato niha Keriso si tebai wondröi omora börö me no numalö ndröfira mazui mofökhö. Hizaʼi, tola laʼogunaʼö ginötö si so ba wamaʼema turia somuso dödö ba niha si tohare ba nomora. Tola göi lafazökhi zura ba wamaʼema turia somuso dödö ba niha si lö hadöi ba nomo si tebai lafalukhaisi.

5. Moloʼö Filifi 3:12-14, hadia zi tola manolo Waulo enaʼö iʼosambuaʼö dödönia ba wanötöna nitemania?

⁵ Lö itehegö mangoloi dödönia Faulo ba zi no irai ifalua ba zilalö, hewaʼae sökhi mazui si lö sökhi nifaluania. Imane wangumaʼö wa moguna ’iröi fefu hadia ia’ enaʼö ’iforege ba wokhamö zi so miföna’, eluahania enaʼö mofozu ba wangasiwai fagohisa. (Baso Filifi 3:12-14.) Hadia manö si tola mameʼe mangoloi dödö Faulo? Si oföna, fatua lö si tobali ia niha Keriso, Faulo andre niha Yahudi sangokhögö dadaoma si sökhi, hizaʼi ibaliʼö fefu daʼö tobali ’zasao’. (Fil. 3:3-8) Si dua, hewaʼae irasoi Waulo wa fasala ia börö me no irai ifakao niha Keriso, hizaʼi lö irai itehegö hadia nirasoinia daʼö ba wamöhöli famosumange Yehowa. Ba si tölu, lö irai so ba dödönia ba wamöhöli famosumange Yehowa hewaʼae no oya zi no ifalua. Lö irai tebulö Waulo ba wamalua ngawalö halöwö khö Yehowa hewaʼae no irai lakuru ia, laböbözi, latebu kara, ahöndrö göfa nasi nitörönia, moʼamböta ba gö hegöi ba nukha. (2 Kor. 11:23-27) Gofu hadia waʼamofozu nikhamö Waulo hegöi famakao nitaögönia ba wanuriaigö, aboto ba dödönia wa moguna lö iböhöli wamosumange Yehowa. Tatu simane daʼö göi ita.

6. Hadia manö ösa zinangea taʼolifugö si no ’taröi fefu hadia ia’?

⁶ Hewisa woloʼöda duma-duma Waulo enaʼö taʼolifugö si no ’taröi fefu hadia ia’? So ösa ba gotaluada zamorege ba wolawa dödö si fasala börö horö nifaluania ba zilalö. Na örasoi simane daʼö, moguna öʼosambuaʼö dödömö ba wamahaʼö yaʼugö samösa sanandrösa ba höli nibeʼe Keriso, öʼangerönusi daʼö ba ohe ba wangandrö. Na öfalua daʼö, tola aheta dödö si fasala si lö moguna, börö me aboto ba dödöda wa no iʼefaʼö Lowalangi zala nifaluada ba zilalö. So danö böʼönia nasa si tola tafahaʼö ita moroi khö Waulo. Tola manö so ösa moroi ba gotaluada, sondröi halöwönia sebua gazi enaʼö tola itugu iʼosambuaʼö dödönia ba wamosumange Yehowa. Na daʼö nifaluada, hadia tola taʼolifugö fefu zi no taröi ba zilalö, enaʼö lö taʼomasiʼö harato mazui faʼasana dödö si tola taʼokhögö? (4 Moz. 11:4-6; Zango. 7:10) ’Taröi fefu hadia ia’ tola göi moʼamakhaita daʼa ba ngawalö hadia ia si no irai mofozu tafalua ba wanuriaigö  mazui daha-taha si no irai tataögö. Tatu manö, na taʼangerönusi howu-howu hegöi fanolo moroi khö Yehowa irugi iadaʼa, tola itugu ahatö ita khö Namada. Hizaʼi, böi irai so ba dödöda wa no tobönö nifaluada ba tarasoi wa no oya zi no tafalua khö Yehowa.​—1 Kor. 15:58.

7. Moloʼö 1 Korindro 9:24-27, hadia zinangea mufalua enaʼö möna ba wagohisa wanöndra faʼauri? Beʼe duma-duma.

⁷ No irai imane Yesu, ”Miforege.” (Luk. 13:23, 24) Aboto sibai ba dödö Waulo fehede Yesu andrö. Iʼila wa simane Keriso, moguna ifalua wamorege sandrohu faʼaurinia. Andrö wa ifagölösi waʼauri niha Keriso simane si fagohi. (Baso 1 Korindro 9:24-27.) Samösa si fagohi si fao ba watandrisa moguna iʼosambuaʼö dödönia enaʼö irugi gamozua, ba lö itehe mangoloi dödönia ba ngawalö hadia ia. Duma-dumania, oya iadaʼa fatandrisa ba wagohisa nifalua ba kota segebua. Sagötö ba lala wagohisa, oya toko hegöi ngawalö hadia ia si tola mameʼe mangoloi dödö niha si fagohi. Moloʼö yaʼugö, hadia tebato niha si fao ba wagohisa ba wamaigi gama-gama nifamawa ba toko? Na omasi ia möna, tatu lö ifalua daʼö! Ba wagohisa wanöndra faʼauri, moguna tatimbagö ngawalö hadia ia enaʼö lö mangoloi dödöda. Na taʼosambuaʼö dödöda ba wanötönada ba tafalua wamorege simane Faulo, hasambalö tatema mbuala!

8. Hadia zi tölu ngawalö daha-taha nitutunöda?

⁸ Iadaʼa datatutunö tölu ngawalö si tobali daha-tahada ba wamosumange Yehowa, yaʼia daʼö fanötöna si lö nasa alua, alö waʼabölö mbotoda, lö tebulö so gabula dödö. Tatutunö göi duma-duma niha si no mofozu ba wangasiwai daha-taha si tölu ngawalö andrö, ba tola taʼoʼö duma-dumara.​—Fil. 3:17.

9. Hadia lua-luania khöda na lö nasa alua wanötönada?

⁹ Fanötöna si lö nasa alua. Fefu ita tadöna-döna ngawalö zi sökhi si no ifabuʼu Yehowa. Daʼö göi nirasoi Habakuki, si no irai mangumaʼö wa itötöna sibai khö Yehowa ba  wangohori si lö sökhi si so ba Yehuda. Ba ifatunö khönia Yehowa enaʼö ’idöna-döna manö’ si fao faʼafaduhu dödö. (Hab. 2:3) Hizaʼi, na lö manö alua nasa wanötöda, tola manö awuwu ita ba so khöda waʼide-ide dödö. (Gamd. 13:12) Daʼa göi nirasoi ndra talifusöda me mböröta abad si-20. Me luo daʼö ato niha Keriso nibayoini, lamane tödöra wa hasambalö möi ira ba zorugo ba ndröfi 1914. Me lö alua daʼö, hadia nifalua niha si lö faröi me lö nasa alua wanötönara?

10. Hadia nifalua zi sambua fongambatö me lö nasa alua wanötönara?

¹⁰ Datatutunö duma-duma si darua ndra talifusöda si lö faröi sofozu ba wangasiwai daha-taha andrö. Talifusöda Royal Spatz tebayagö idanö me döfi 1908, me 20 fakhe ndröfinia. Faduhu sibai dödönia wa sabata tö möi ia ba zorugo. Me döfi 1911, me ibeʼe li khö zi samösa dalifusöda ira alawe sotöi Pearl, imane, ”Hadia öʼila hadia zalua ba ndröfi 1914? Abölö baga na alio-lio mangowalu ita!” Me lö latema fanötönara me döfi 1914, hadia laböhöli wagohisa ba wanöndra faʼauri? Löʼö, börö me ohitö dödöra tenga ha weʼamöi ba zorugo. Hizaʼi sabölö moguna yaʼia daʼö lö faröi ba wamosumange Yehowa. Lahalö gangetula enaʼö lö tebulö ba wagohisa si fao faʼanau gölö. Ba zi ngafulu fakhe aefa daʼö, lö tebulö Royal hegöi Pearl ba wamosumange Yehowa ba lö faröi ira irugi waʼamatera. Tatu göi ödöna-döna ba ginötö iʼamoniʼö Yehowa töinia moroi ba ngawalö si lö duhu niböbögö khönia, sangoromaʼö wa ha yaʼia sinangea mamatörö ba ifalua fefu zi no ifabuʼu. Yafaduhu dödömö wa hasambalö alua fefu hadia ia si no iwaʼö Yehowa. Gasa-gasa ba wombaloi daʼö, moguna böi tebulö tafosumange Lowalangi ba böi tatehegö so khöda waʼide-ide dödö börö wanötöna si lö nasa alua.

11-12. Hadia tola lö faröi ita ba wamosumange Yehowa hewaʼae alö waʼabölöda? Beʼe duma-duma.

¹¹ Alö waʼabölö mbotoda. Tenga simane si fagohi sindruhu, niha si fagohi ba wanöndra faʼauri lö moguna iʼokhögö waʼabölö mboto. Ato nono mbanua Yehowa si terou tödö nasa, ba omasi labeʼe zabölö sökhi khö Yehowa hewaʼae alö waʼabölöra. (2 Kor. 4:16) Duma-dumania talifusöda Arthur Secord, no 88 fakhe ndröfinia ba no mohalöwö ia ba Mbetieli ba zi 55 fakhe. Me luo daʼö, no alö waʼabölönia. Samuza inötö, tohare dalifusöda ira alawe ba wondrorogö hegöi ba wanolo dalifusöda Secord. Talifusöda ira alawe andrö ifaigi-faigi dalifusöda Secord si so ba warate ba isuno dalifusöda Secord börö me no oya nifaluania khö Yehowa. Iboho mbawania dalifusöda Secord ba ifaigi dalifusöda ira alawe. Imane, ”Hadia nifaluada lö moguna sibai  daʼö. Hizaʼi sabölö moguna iadaʼa, lö faröi ita ba wangai halöwö khönia.”

¹² Te no ara öfosumange Yehowa ba zi hauga fakhe, hizaʼi iadaʼa tola manö lö oya zi tola öfalua simane nifaluamö ba zilalö börö me no alö waʼabölömö. Hizaʼi böi ide-ide dödömö. Yafaduhu dödömö wa lö olifu Yehowa ba iʼandrö saohagölö ba zi no öfalua ba zilalö si fao faʼalöfaröi. (Heb. 6:10) Törö tödömö wa famosumange hegöi faʼomasida khö Yehowa lö teʼodaligö daʼö moroi hawaʼoya nifaluada ba wanuriaigö. Tola taforomaʼö wa taʼomasiʼö Yehowa na tabeʼe zabölö sökhi khönia, lö tebulö owua-wua dödöda, ba tatörö tödö wanötönada. (Kol. 3:23) Aboto ba dödö Yehowa wa moʼamböta ita ba lö itötöna khöda töra moroi ba zi tola tafalua.​—Mrk. 12:43, 44.

13. Hadia zalua khö Anatoly hegöi Lidiya, ba hewisa daʼö möi fangabölöda ba wamosumange Yehowa hewaʼae oya gabula dödöda?

¹³ Lö tebulö so gabula dödö. So ösa nono mbanua Yehowa sanau ölö ba wanaögö abula dödö hegöi folohi irugi ngafulu fakhe. Duma-dumania, me awena 12 fakhe ndröfi Anatoly Melnik, * labeʼe ba gurunga bapania ba laʼoloiʼö ba Siberia, faʼaröunia töra 7.000 kilometer moroi ba nomonia si so ba Moldova. Döfi aefa daʼö, Anatoly, mamania, kake hegöi nenenia, laʼoloiʼö göi ira ba Siberia. Ba gafuriata, me tola saʼae möi ira ba gangowuloa, latörö tanö faʼaröunia 30 kilometer, cuacania mosalju ba okafu sibai. No göi irai lakuru dalifusöda Melnik, tölu fakhe faʼara. Fabali ia khö woʼomonia Lidiya hegöi ononia ono alawe side-ide si döfi faʼebua. Hewaʼae itaögö abula dödö ba zi hauga fakhe, lö faröi Anatoly hegöi ösi nomonia ba wamosumange Yehowa. Iadaʼa no 82 fakhe ndröfi Anatoly. Mohalöwö ia tobali Panitia Cabang ba zi sambua soi si so ba Asia Tengah. Simane Anatoly hegöi Lidiya, yalötebulö ita fefu ba wameʼe sabölö sökhi khö Yehowa ba anau gölöda simane si no tafalua ba zilalö.​—Gal. 6:9.

14. Hadia zinangea ifalua Waulo enaʼö tola isöndra mbuala?

¹⁴ Faduhu dödö Waulo wa hasambalö iʼasiwai fagohisania ba isöndra mbuala. Börö me yaʼia niha Keriso nibayoini, idöna-döna ”buala moroi khö Lowalangi yaʼia daʼö fogaoni ba zorugo”. Hizaʼi enaʼö tola isöndra mbuala andrö, aboto ba dödönia wa moguna  lö tebulö ia ba ’wagohisa’. (Fil. 3:14) Ibeʼe wamatimbaisi Faulo si möi faʼadöni dödö ba wanolo banua niha Keriso ba Wilifi enaʼö lö tebulö teʼosambuaʼö dödöra ba wanötönara.

15. Hewisa Waulo ba wamasugi dödö niha Keriso ba Wilifi enaʼö lö tebulö ”fagohi” si fao faʼanau gölö?

¹⁵ Ifasugi ba dödö mbanua niha Keriso ba Wilifi Faulo, wa yaʼira ono mbanua sauri ba zorugo. (Fil. 3:20) Hana wa moguna latörö tödöra daʼö? Me götö daʼö, ato niha zomasi tobali ono mbanua Romawi börö me oya hare nitemara. * Hizaʼi, abölö ebua hare nitema niha Keriso nibayoini, börö me ono mbanua sauri ba zorugo ira. Abölö sökhi tobali ono mbanua sauri ba zorugo moroi na tobali ono mbanua Romawi! Börö daʼö, ibeʼe mene-mene Waulo ba mbanua niha Keriso ba Wilifi enaʼö ’lafaudugö mbua-buara ba duria somuso dödö sanandrösa khö Keriso’. (Fil. 1:27) Iadaʼa, niha Keriso nibayoini tobali ira duma-duma si sökhi, börö me lö tebulö anau gölöra ba wanöndra mbuala faʼauri si lö aetu ba zorugo.

16. Moloʼö Filifi 4:6, 7, hadia zinangea tafalua he sauri ba zorugo mazui ba gulidanö?

¹⁶ Hewaʼae na taʼokhögö wanötöna ba zorugo mazui ba gulidanö, moguna böi tebulö ita ba wagohisa si fao faʼanau gölö enaʼö tola tasöndra mbuala andrö. Gofu hadia zalua khöda, moguna taʼolifugöʼö hadia ia zi no taröi. Ba lö göi tatehegö hadia ia si tola mondrönisi yaʼita irege taböhöli wamosumange Yehowa. (Fil. 3:16) Tola manö lö nasa alua hadia zi no tatötöna, mazui alö waʼabölöda tenga simane ba zilalö. Tataögö abula dödö mazui folohi ba zi hauga fakhe. Gofu hadia nitaögömö, ’böi busi dödöu hadia ia’. Ombakhaʼö khö Lowalangi ba andrö wanolo moroi khönia, ba ibeʼe khömö waʼahono dödö si töra moroi ba nikhalaigömö.​—Baso Filifi 4:6, 7.

17. Hadia nitutunöda ba wamahaʼö fönada?

¹⁷ Niha si fagohi iforege ba wagohisa me arakhagö irugi amozua wagohisa. Simane daʼö göi ita, moguna taʼosambuaʼö dödöda ba mbuala nitemada na taʼasiwai wagohisa ba wanöndra faʼauri. Moguna lö tebulö ita wamalua daʼö si fao famorege. Hadia zinangea tafalua enaʼö lö tebulö wagohisa ba wamalua satulö? Famahaʼö aefa daʼa sanolo yaʼita enaʼö ’tola tatatugöi hadia zabölö moguna’.​—Fil. 1:9, 10.