1. Hadia zomasi ita ba nösi nomoda?

IMANE samösa dalifusöda ira alawe sotöi Pauline, * ”Me awena sibai aboto ba dödögu zindruhu, omasi ndraʼo na fefu nösi nomogu hegöi yaʼo toröi ba Waradaiso dania. Mendrua manö omasido na foʼomogu Wayne hegöi onogu side-ide, fao ira khögu ba wamosumange Yehowa.” Hadia so nösi nomomö si lö nasa mangokhögö faʼaboto ba dödö ba sangomasiʼö Yehowa? Te omasi ndraʼugö simane Pauline, na fao khömö ösi nomomö ba wamosumange Yehowa.

2. Hadia wanofu-nofu nitutunöda ba wamahaʼö daʼa?

² Tebai tafaso nösi nomoda ba wanemaʼö turia somuso dödö. Hizaʼi, tola tabeʼe adöni dödöra ba wamondrondrongo turia somuso dödö moroi ba Zura Niʼamoniʼö. (2 Tim. 3:14, 15) Hana wa moguna tafaʼema duria somuso dödö ba nösi nomoda? Hana wa moguna taforege enaʼö aboto ba dödöda hadia nirasoira? Hadia zinangea tafalua enaʼö nösi nomoda laʼomasi Yehowa? Ba hewisa ndra talifusö ba gangowuloa si farahu yaʼita tola tobali fanolo khöda?

3. Moloʼö 2 Fetero 3:9, hana wa moguna tafaʼema duria somuso dödö ba nösi nomoda?

³ Ba zi lö ara tö, hasambalö tehori gulidanö daʼa ibeʼe Yehowa. Niha niʼorifinia ha ”niha si sökhi amuata somasi manöndra faʼauri si lö aetu”. (Hal. 13:48) Oya ginötö niʼogunaʼöda hegöi faʼabölöda weʼamöi manuriaigö ba niha si lö faʼila khöda. Tatu omasi göi ita na tafaʼema duria somuso dödö ba nösi nomoda enaʼö fao ira khöda ba wamosumange Yehowa. Amada  sebua faʼomasi, Yehowa, ”lö omasi ia na tekiko fazamösa. Omasi ia enaʼö dozi lafalalini gera-erara”.​—Baso 2 Fetero 3:9.

4. Hadia zala si tola manö tafalua ba ginötö manuriaigö ita ba nösi nomoda?

⁴ Moguna tatörö tödöda wa so lala si baga hegöi si lö baga ba wamaʼema turia somuso dödö. Tola manö sökhi lagu wahuhuosada ba ginötö manuriaigö ita ba niha si lö faʼila khöda. Hizaʼi, tola manö lö taʼila taʼangenanöi wehededa ba ginötö tafaʼema duria somuso dödö ba nösi nomoda.

5. Fatua lö tafaʼema duria somuso dödö ba nösi nomoda, hadia zinangea tatörö tödöda?

⁵ Na tatörö tödöda hadia zi no tafalua me awena sibai tafaʼema duria somuso dödö ba nösi nomoda, tola manö maniasa ita börö me ambö baga wamaʼemada khöra. Ibeʼe mene-mene Waulo ba niha Keriso, ”Böi tebulö khömi wangehaogö fehedemi nilau asio, enaʼö sökhi wamondrongo, ba miʼila hewisa wameʼe fanema li zamösana.” (Kol. 4:5, 6) Moguna tatörö tödöda mene-mene daʼa ba ginötö tafaʼema duria somuso dödö ba nösi nomoda. Na löʼö, tola manö tetutu dödöra ba lö omasi ira wamondrongo yaʼita.

6-7. Tutunö sambua duma-duma wa moguna sibai aboto ba dödö zi samösa niha, hadia nirasoi woʼomonia si tenga samosumange Yehowa.

⁶ Moguna aboto ba dödömö hadia nirasoira. Imane Pauline nitutunö moroi yawa, ”Ba wamobörö, ha sanandrösa ba wamati nitutunögu khö woʼomogu. Lö irai matutunö ngawalö si ero maʼökhö.” Hizaʼi, lö oya niʼila Wayne sanandrösa ba Zura Niʼamoniʼö. Andrö wa lö aboto ba dödönia hadia nitutunö Pauline. Ba wamaigi Wayne, awai niʼera-era Pauline ha sanandrösa ba agama. So wa aombö dödö khö Wayne na farahu Pauline ba agama si möi famakiko ba samaelungu yaʼia.

 ⁷ Ifaduhuʼö Pauline göi, wa ba zilalö asese ihorigö ginötönia ba zi tanö owi hegöi ba ngaluo satu mazui migu ba wefao khö ndra talifusö ba gangowuloa, feʼamöi manuriaigö hegöi acara ramah tamah. Imane Pauline, ”Itaria na mangawuli Wayne, lö hadöi niha ba nomo, ba atö yaʼi-yaʼia.” Daʼö mbörö wa irasoi Wayne hulö zi lö hadöi foʼomonia hegöi ononia. Ba lö aboto ba dödönia haniha manö zi fariawö khöra, ba irasoi wa abölö iʼofönaiʼö Pauline fariawö khö ndra awönia si bohou moroi khönia samösa. Ifetaʼu Wayne wa hasambalö ifabali Pauline moloʼö huku. Moloʼö yaʼugö, hadia zinangea ifalua Pauline ba wangoromaʼö wa ifatimbaisi hadia nirasoi woʼomonia?

8. Moloʼö 1 Fetero 3:1, 2, hadia zasesenia lanehegö ösi nomoda?

⁸ Beʼe duma-duma si sökhi. Sasesenia, abölö lanehegö ösi nomoda hadia nifaluada moroi ba niwaʼöda. (Baso 1 Fetero 3:1, 2.) Ba gafuriata awena aboto ba dödö Pauline. Imane, ”Aboto ba dödögu wa iʼomasiʼö ndraʼaga Wayne, ba sindruhunia lö omasi ia na fabali ndraʼaga moloʼö huku. Hizaʼi, me ifetaʼudo wa hasambalö ifabali ndraʼo moloʼö huku, awena aboto ba dödögu wa moguna uʼoʼö mene-mene nibeʼe Yehowa sanandrösa ba wongambatö. Tobali, moroi na asese ufaʼema khönia zindruhu, abölö baga na ubeʼe duma-duma si sökhi ba uforomaʼö daʼö ba nifaluagu.” Lö saʼae ifaso Pauline ba wanutunö Sura Niʼamoniʼö khö Wayne, ibörögö ba wanutunö ngawalö danö böʼö. Iʼila Wayne wa foʼomonia andrö so khönia waʼowu-wua dödö ba ifaigi nononia itugu sökhi ba moloʼö. (Gamd. 31:18, 27, 28) Me iʼila Wayne wa itugu sökhi nösi nomonia börö goi-goi Zura Niʼamoniʼö, ibörögö adöni dödönia ba zindruhu si so ba Daromali Lowalangi  ba omasi ifondrondrongo.​—1 Kor. 7:12-14, 16.

9. Hana wa böi awuwu ita ba wanolo ösi nomoda?

⁹ Böi awuwu ba wanolo nösi nomomö. No ibeʼe khöda Yehowa duma-duma si sökhi. Lö ’adage-dage’ Yehowa ba wameʼe ginötö ba niha enaʼö lafondrondrongo turia somuso dödö ba lasöndra faʼauri si lö aetu. (Yer. 44:4) Ba ifatunö Waulo khö Dimoteo enaʼö böi tebulö ba wanolo niha böʼö si fao faʼanau gölö. Hadia mbörö? Na ifalua daʼö, teʼorifi Dimoteo hegöi niha samondrongo yaʼia. (1 Tim. 4:16) Börö me taʼomasiʼö nösi nomoda, tatu omasi ita enaʼö laʼila zindruhu si so ba Daromali Lowalangi. Fehede hegöi nifalua Pauline ba gafuriatania sameʼe mbua si sökhi ba nösi nomonia. Iadaʼa omuso dödönia börö me foʼomonia no samosumange Yehowa. Yaʼira si darua tobali perintis, ba Wayne tobali satua sokubaloi.

10. Hana wa moguna so khöda waʼebolo dödö?

¹⁰ Faʼebolo dödö. Ba ginötö tabulöʼö waʼaurida ba zomasi Lowalangi, tola manö abua ba nösi nomoda ba wanemaʼö hadia nifaduhusida tödö hegöi lala waʼaurida si bohou. Sasesenia, si oföna sibai lanehegö yaʼia daʼö wa lö saʼae fao ita khöra ba gowasa agama hegöi ba politik. Tola manö ba wamobörö, so moroi ba gotalua nösi nomoda sofönu khöda. (Mat. 10:35, 36) Hizaʼi böi awuwu ita. Na lö saʼae tafuli tatolo ira enaʼö aboto ba dödöra hadia nifaduhusida tödö, hulö no tahuku ira wa lö saʼae lasöndra waʼauri si lö aetu. Lö ibeʼe khöda Yehowa halöwö ba wanguhuku yaʼira. Ibeʼe halöwö andrö khö Yesu. (Yoh. 5:22) Na so khöda waʼebolo dödö, tola manö ba gafuriata omasi ira wamondrongo yaʼita.​—Faigi kotak ” Ogunaʼö Situs Webda ba Wamahaʼö”.

11-13. Hadia wamahaʼö nihalömö moroi ba nifalua Alice khö zatuania?

¹¹ Okhögö waʼasökhi dödö, hizaʼi yaʼaro ndraʼugö ba gangetulamö. (Gamd. 15:2) Nehegö zalua khö Alice. Satuania fao ba politik ba lö laʼokhögö agama. Ifahaʼö ia Alice sanandrösa khö Yehowa me toröi ia ba nahia saröu moroi khö zatuania. Aboto ba dödönia wa moguna iʼanemaiʼö ifatunö sanandrösa ba nifaduhusinia tödö. Imane, ”Na taradö-radö ba wanutunö ba nösi nomoda hadia nifaduhusida tödö si bohou, tola manö abua khöra ba wanemaʼö daʼö.” Iʼalui lala alice ba wangalui duho si tola adöni dödö zatuania simane duho sanandrösa ba waʼomasi. Aefa daʼö, isura zura khö zatuania ba ifatunö hadia niwaʼö Zura Niʼamoniʼö sanandrösa ba duho daʼö ba isofu mbua gera-erara. (1 Kor. 13:1-13) Iʼandrö saohagölö khö zatuania börö me no laʼebuaʼö ba larorogö ia, ba ifaʼoheʼö buala khöra. Me manörö ia khö ndra satuania, iforege sibai ba wanolo mamania ba nomo. Ba wamobörö, lö omasi zatuania me ifatunö Alice hadia nifaduhusinia tödö si bohou.

¹² Me so Alice ba nomo zatuania, lö tebulö ia ba wombaso Sura Niʼamoniʼö. Imane Alice, ”Awena aboto ba dödö mamagu wa moguna sibai khögu Zura Niʼamoniʼö.” Omasi bapa Alice ba wangalui hadia niwaʼö Zura Niʼamoniʼö, enaʼö aboto ba dödönia lala wangera-ngera nononia si no tebulö, ba omasi iʼalui zala si so ba Zura Niʼamoniʼö. Imane Alice, ”Ubeʼe khö bapagu Zura Niʼamoniʼö ba usura ba daʼö wehedegu khönia.” Hadia mbuania? Lö isöndra bapa Alice zala si so ba Daromali Lowalangi. Hizaʼi, tofakha sibai ba dödönia hadia zi no ibaso.

¹³ Hewaʼae na göna ita folohi, moguna so khöda waʼasökhi dödö ba aro ita ba gangetula nihalöda. (1 Kor. 4:12b) Anau gölö Alice hewaʼae göna ia folohi moroi khö mamania. Imane, ”Me tebayagö ndraʼo idanö, iwaʼö khögu mamagu ’ono durahako’.” Hadia nifalua Alice? ”Lö tebulö ndraʼo ba wanutunö sanandrösa ba agamagu si bohou. Si fao famosumange, ufatunö khöra wa no  uhalö gangetula tobali Samaduhuʼö Yehowa ba lö tebulö ndraʼo ba gangetulagu. Utandraigö uhaogö ufatunö khö mamagu wa uʼomasiʼö ia, irege malau meʼe. Aefa daʼö, urino önia gö sami. Iʼotarai daʼö, aboto ba dödö mamagu wa börö Zura Niʼamoniʼö tola tobali ndraʼo niha si sökhi.”

14. Hana wa tebai tatehegö ba nösi nomoda ba wombulöʼö gangetula nihalöda ba wamosumange Yehowa?

¹⁴ Tola manö lö laʼanemaiʼö aboto ba dödö nösi nomoda wa moguna sibai khöda ba wamosumange Yehowa. Duma-dumania me ihalö gangetula Alice tobali perintis ba lö igohi halöwö somasi zatuania, ifuli meʼe mamania. Hizaʼi so waʼaro dödö khö Alice. Imane, ”Na awuwu ita ba zi sambua ngawalö, tola manö ba lala tanö böʼö itugu latandraigö ita nösi nomoda. Andrö wa moguna so khöda waʼaro dödö, ba böi tebulö so khöda waʼasökhi dödö ba nösi nomoda. Na tafalua daʼö, tola manö so ösa moroi ba nösi nomoda somasi wamondrongo.” Daʼö zalua khö Alice. Iadaʼa zatuania si darua tobali perintis, ba bapania tobali satua sokubaloi.

15. Moloʼö Mataiʼo 5:14-16 hegöi 1 Fetero 2:12, hewisa ”mbua-bua si sökhi” nifalua niha böʼö tola möi fanolo ösi nomoda?

¹⁵ Iʼogunaʼö Yehowa ”mbua-bua si sökhi” nifalua ono mbanuania ba wondröniaʼö niha khönia. (Baso Mataiʼo 5:14-16; 1 Fetero 2:12.) Na tenga Samaduhuʼö Yehowa foʼomomö, hadia no irai falukha ia khö ndra talifusö si so ba gangowuloa si farahu ndraʼugö? Pauline nitutunö moroi yawa, asese ikaoni ndra talifusö ba nomonia enaʼö itugu aboto ba dödö Wayne yaʼira. Itutunö Wayne hewisa zi samösa dalifusöda ba wameʼe khönia  faʼaboto ba dödö hewisa zindruhunia Samaduhuʼö Yehowa. Imane, ”Talifusöda ira matua andrö, ihalö cuti maʼö-maʼökhö moroi ba naha wohalöwönia ha enaʼö möi ia ba nomogu ba wefao khögu wamaigi si fatandrisa ba olahraga si so ba TV. Me luo daʼö imane tödögu, ’Yaʼia niha si toʼölö!’”

16. Hana wa moguna takaoni nösi nomoda weʼamöi ba gangowuloa?

¹⁶ Sambua lala si sökhi ba wanolo nösi nomoda yaʼia daʼö takaoni ira weʼamöi ba gangowuloada. (1 Kor. 14:24, 25) Angowuloa si oföna si fao Wayne yaʼia daʼö Fanörö Tödö. Omasi möi ia börö me tefalua ia aefa wangawulinia moroi ba nahia wohalöwö, ba lö arara tefalua acara andrö. Imane, ”Lö aboto ba dödögu hadia nitutunö ba huhuo sebua andrö, hizaʼi lö olifu ndraʼo niha si so ba daʼö. Latemaʼö ndraʼo ba latabedo. Tola uʼila wa soroi ba dödöra wamalua yaʼia. So sambua fongambatö, baga sibai lagura khö Pauline.” Asese latolo Pauline hegöi ononia ba ginötö angowuloa hegöi na manuriaigö. Ba gafuriata omasi Wayne enaʼö itugu aboto ba dödönia hadia zawena ifaduhusi tödö Pauline, andrö iwaʼö khö woʼomo ira matua zi sambua fongambatö no mege, enaʼö lafahaʼö ia ba Zura Niʼamoniʼö.

17. Ba ginötö hadia tebai tatahigö yaʼita samösa, hizaʼi hana wa moguna taforege ba wanolo ösi nomoda?

¹⁷ Tatu tatötöna enaʼö omasi fefu nösi nomoda ba wefao khöda wamosumange Yehowa. Hizaʼi, tola manö so moroi ba gotalua nösi nomoda si lö omasi mamosumange Yehowa, hewaʼae no taforege ba wanolo yaʼira enaʼö tobali nono mbanua Lowalangi. Na daʼö zalua khömö, böi ötahigö ndraʼugö ba gangetula nihalöra. Ba tebai tafaso ira ba wanemaʼö hadia nifaduhusida tödö. Hizaʼi, törö tödömö wa tola laʼila ösi nomomö wa so khömö waʼomuso dödö ba wamosumange Yehowa, ba ebua lua-luania khöra daʼa. Ohe ira ba wangandrö. Na fahuhuoʼö khöra enaʼö si fao faʼasökhi dödö. Ba forege ba wanolo yaʼira! (Hal. 20:20) Yafaduhu dödömö wa ifahowuʼö Yehowa fangodödögö nifaluamö!