1. Haniha zi fao ba wamasindro banua niha Keriso ba Wilifi?

ME LARUGI ira Waulo, Sila, Luka hegöi Timoteo ba mbanua Wilifi, ato niha zi falukha khöra somasi mangila sanandrösa ba turia somuso dödö. Yaʼira si daʼöfa falulu fohalöwö ba wamasindro banua niha Keriso ba mbanua daʼö, ba fefu ndra nifahaʼö si bohou si so ba daʼö labörögö lafalua gangowuloa. Tola manö lafalua daʼö ba nomo Lidia, samösa ndra alawe soböwö.​—Hal. 16:40.

2. Hadia wanandraigö nitaögö mbanua niha Keriso ba Wilifi?

² Lö ara aefa daʼö, alua wanandraigö ba mbanua niha Keriso sawena mufasindro andrö. Idönisi Zatana niha si fatuwu ba zindruhu, ba wanandraigö halöwö niha Keriso si lö faröi andre. Laraʼu Faulo hegöi Sila, laböbözi faoma eu, ba labeʼe ira ba gurunga. Me no laʼefasi ira moroi ba gurunga, lafalukhaisi ba laʼabölöʼö ndra nifahaʼö si bohou andrö si so ba mbanua niha Keriso ba Wilifi. Aefa daʼö, laröi mbanua andrö ira Waulo, Sila hegöi Timoteo, hizaʼi toröi ba daʼö nasa Luka. Iadaʼa, hadia nifalua ira talifusö si so ba mbanua niha Keriso ba Wilifi? Börö wanolo eheha niʼamoniʼö moroi khö Yehowa, ira nifahaʼö si bohou andrö lö tebulö ba wamosumange Yehowa si fao faʼaterou dödö. (Fil. 2:12) Tatu omuso sibai dödö Waulo khöra!

3. Moloʼö Filifi 1:9-11, hadia manö niʼangandröi Waulo?

³ Mato fulu fakhe aefa daʼö, ibeʼe Waulo zura ba mbanua niha Keriso ba Wilifi. Na öbaso zura daʼö, tola öʼila wa iʼomasiʼö sibai Waulo ira talifusönia. Imane ba zurania, ”Omasido sibai falukha khömi fefu, börö me uʼomasiʼö ami simane fangomasiʼö Keriso Yesu ami.” (Fil. 1:8) Isura ba zurania wa  iʼohe ira ba wangandrö. Iʼandrö khö Yehowa enaʼö itugu monönö waʼomasira, latatugöi hadia zabölö moguna ba waʼaurira, laforege enaʼö lö raʼiö ira, lö labaliʼö ira tobali fangala ba niha böʼö, ba lö tebulö ba wamalua satulö. Sura Waulo soroi ba dödö andrö, moguna göi khöda iadaʼa. (Baso Filifi 1:9-11.) Tatutunö dania hadia manö nifatunönia ba hewisa lalada ba wamalua daʼö.

4. (a) Moloʼö 1 Yohane 4:9, 10, hewisa wangoromaʼö Yehowa wa iʼomasiʼö ita? (b) Hawaʼebua waʼomasida khö Lowalangi?

⁴ Iforomaʼö Yehowa wa iʼomasiʼö sibai ita irege ifatenge Nononia ba gulidanö ba mate salahida ba wohöli yaʼita. (Baso 1 Yohane 4:9, 10.) Börö me iʼomasiʼö ita Lowalangi, tefarou göi dödöda ba wangomasiʼö yaʼia. (Rom. 5:8) Hawaʼebua waʼomasida khö Lowalangi? Fanema linia so ba wehede Yesu khö ndra niha Farizaiʼo, ”Omasiʼö Yehowa Lowalangiu moroi siʼaikö ba dödöu, nosou maʼasambua, ba era-erau maʼafefu.” (Mat. 22:36, 37) Lö omasi ita na ha matonga dödöda ba wangomasiʼö Lowalangi. Hizaʼi omasi ita na itugu taʼomasiʼö ia ero maʼökhö. Ifatunö Waulo ba mbanua niha Keriso ba Wilifi enaʼö ”monönö” waʼomasira. Hadia zinangea tafalua enaʼö aro waʼomasida khö Lowalangi?

5. Hadia zinangea tafalua enaʼö itugu taʼomasiʼö Lowalangi?

⁵ Enaʼö tola taʼomasiʼö Lowalangi, moguna aboto ba dödöda ia. Imane Sura Niʼamoniʼö, ”Si lö mangomasiʼö awönia ba lö saboto ba dödönia Lowalangi, börö me Lowalangi andrö no faʼomasi.” (1 Yoh. 4:8) Itutunö Waulo wa tola itugu taʼomasiʼö Lowalangi na taʼokhögö ”waʼaboto ba dödö si tefaudu hegöi fangera-ngera si sökhi” sanandrösa khönia. (Fil. 1:9) Me awena sibai tafahaʼö ita ba Zura Niʼamoniʼö, ibörögö taʼomasiʼö Yehowa hewaʼae lö oya nasa niʼilada sanandrösa khönia. Me no monönö waʼaboto ba dödöda sanandrösa khönia, itugu taʼomasiʼö ia. Andrö, moguna tafahaʼö ita ba taʼangerönusi Zura Niʼamoniʼö, börö me daʼö zabölö moguna ba waʼaurida!​—Fil. 2:16.

6. Moloʼö 1 Yohane 4:11, 20, 21, haniha nasa zinangea taʼomasiʼö?

⁶ Börö me iʼomasiʼö ita Lowalangi, tefarou dödöda wangomasiʼö ndra talifusöda. (Baso 1 Yohane 4:11, 20, 21.) Tola manö so ba dödöda wa lö abua ba wangomasiʼö ndra talifusö, börö me fefu ita samosumange Yehowa ba omasi taʼoʼö mbua-buania si sökhi. Taforege göi ba woloʼö duma-duma Yesu, sangomasiʼö yaʼita irege itehegö nosonia khöda. Hizaʼi sindruhunia, itaria abua khöda ba woloʼö faretania ba wangoromaʼö faʼomasi. Datafaigi duma-duma banua niha Keriso ba Wilifi.

7. Hadia wamahaʼö si tola tahalö moroi ba mene-mene nibeʼe Waulo khö Gewodia hegöi Sitikhe?

⁷ Gewodia hegöi Sitikhe, yaʼira andre ira alawe sowölö-ölö. ’Laforege ba wanuriaigö’ si fao khö Faulo. Hizaʼi, te faʼudu ira irege lö faʼawö ira. Me isura zura Faulo khö niha Keriso ba mbanua Wilifi, itötöi döi Gewodia hegöi Sitikhe ba iʼamenesi ira enaʼö ”hasara dödöra” ba wamosumange Yehowa. (Fil. 4:2, 3) Irasoi Waulo wa moguna ibeʼe mene-mene daʼa ba mbanua niha Keriso maʼafefu, ”Böi miböhöli wamalua fefu hadia ia, ba böi mikökö-kökö mazui fabuʼa-buʼa.” (Fil. 2:14) Mene-mene si sökhi nibeʼe Waulo tobali fanolo khö zi darua ndra talifusö si lö faröi no mege hegöi fefu mbanua niha Keriso enaʼö faoma laforomaʼö waʼomasi.

8. Hana wa tola abua khöda wangomasiʼö ndra talifusöda, ba hewisa ita ba wangasiwai yaʼia?

 ⁸ Itaria abua khöda wangoromaʼö faʼomasi simane salua khö Gewodia hegöi Sitikhe, börö me no taʼosambuaʼö dödöda walömoʼahonoa niha böʼö. Ero maʼökhö tafalua zala. Na taʼosambuaʼö dödöda ba zala niha böʼö, tola abua khöda ba wangomasiʼö yaʼira. Duma-dumania, na olifu zi samösa niha ba wanolo yaʼita ba wangehao Balai Mbanua Lowalangi, tola manö abao dödöda. Na tabörögö tatörö-törö tödöda zala tanö böʼö nifaluania, tola manö itugu abao dödöda khönia. Itugu alö waʼomasida khönia. Na örasoi simane daʼö, moguna öʼangeragö daʼa: Aboto ba dödö Yehowa wa lö moʼahonoa ita hegöi ira talifusöda. Hewaʼae simanö, lö tebulö iʼomasiʼö ita Yehowa hegöi ira talifusöda. Börö daʼö, moguna taʼoʼö waʼomasi Yehowa ba taʼosambuaʼö dödöda ba mbua-bua si sökhi niʼokhögö ndra talifusöda. Na taforege ba wangomasiʼö ndra talifusöda, tola taʼokhögö wahasara dödö.​—Fil. 2:1, 2.

9. Hadia manö ’ngawalö zabölö moguna’ nitutunö Waulo ba zurania ba mbanua niha Keriso ba Wilifi?

⁹ Ibeʼe Yehowa wanuturu lala khö Waulo ba wanutunö ba niha Keriso Wilifi hegöi fefu niha Keriso tanö böʼö, enaʼö ’latatugöi hadia zabölö moguna’. (Fil. 1:10) Ngawalö zabölö moguna yaʼia daʼö, wangamoniʼö töi Yehowa, alua gohitö dödö Yehowa, hegöi faʼatulö ba fahasara dödö ba mbanua niha Keriso. (Mat. 6:9, 10; Yoh. 13:35) Na tabaliʼö fefu daʼö zabölö moguna ba waʼaurida, daʼö dandra wa taʼomasiʼö Yehowa.

10. Hadia zinangea tefalua enaʼö lö mosinegu ita?

¹⁰ Imane göi Waulo enaʼö ”lö mosinegu” ita. Tenga daʼö geluahania wa moguna moʼahonoa ita. Lö irai fagölö ita simane Yehowa soʼahonoa ba sindruhu-ndruhu lö mosinegu. Hizaʼi, ba wamaigi Yehowa ita lö mosinegu na taforege ba wangoromaʼö faʼomasi hegöi ba wotatugöi hadia zabölö moguna. Sambua lala ba wangoromaʼöda faʼomasi yaʼia daʼö na taforege enaʼö lö tobali fangala ita ba niha böʼö.

11. Hana wa tebai tabaliʼö ita börö wangala ba niha böʼö?

¹¹ Lö tola löʼö moguna taʼoʼö fareta enaʼö lö tobali fangala ita ba niha böʼö. Hadia manö si tobali fangala ba niha böʼö? Tola manö börö hiburan nifilida, nukha niʼogunaʼöda mazui halöwöda. Tola manö lö fasala ita ba wamalua daʼö. Hizaʼi na lö fatema daʼö ba dödö side-ide niha böʼö ba möi börö wangalania, no abula dödö sebua daʼö. Iwaʼö Yesu wa abölö sökhi na latawi ba mbagida gara sebua ba latiboʼö ita ba nasi moroi na tobali ita börö wangala ba zi sambua biri-birinia!​—Mat. 18:6.

12. Hadia wamahaʼö si tola tahalö moroi ba duma-duma zi sambua fongambatö si no merintis?

¹² Nehegö hewisa zi sambua fongambatö si no merintis ba wamalua hadia niwaʼö Yesu. Ba mbanua niha Keriso si farahu yaʼira, so sambua fongambatö sawena mubayagö idanö, yaʼira andrö niha mbanua ba sawena teboka hörö. Lamane tödöra wa niha Keriso tebai möi ba bioskop, hewaʼae na ösi filmnia lö hadöi zi lö sökhi. Hizaʼi, tokea dödöra me laʼila zi sambua fongambatö si no merintis möi ba bioskop. Börö daʼö, fatua lö si tefomaha sibai dödö side-ide zi sambua fongambatö sawena tebayagö idanö andrö, lö möi zi sambua fongambatö si no merintis andrö ba bioskop. (Heb. 5:14) Börö me lafalua daʼö, si sambua fongambatö andrö no laforomaʼö wa laʼomasiʼö ndra talifusöra tenga ha ba wehede hizaʼi oroma ba nifaluara.​—Rom. 14:19-21; 1 Yoh. 3:18.

13. Hewisa wa börö yaʼita tola ifalua horö niha böʼö?

 ¹³ Na ifalua zi samösa niha horö börö yaʼita, no tobali ita börö wangala ba niha daʼö. Hana wa tola alua zimane daʼö? Khalaigö zalua andrö. Samösa nifahaʼö ba Zura Niʼamoniʼö, no oya ginötö niʼogunaʼönia ba wamorege enaʼö tola ibato wamadu tuo. Aboto ba dödönia wa moguna iʼaröuʼö ia moroi ba duo. Oya nibulöʼönia ba waʼaurinia irege tebayagö ia idanö. Ba gafuriata, so sambua acara ramah tamah, ibeʼe zokhö omo duo khö dalifusöda si bohou andrö, hewaʼae sindruhunia sökhi gohitö dödönia. Imane sokhö omo, ”Iadaʼa no tebayagö ndraʼugö idanö ba ibeʼe khömö Yehowa waʼabölö moroi ba gehehania. Sambua mbua moroi ba geheha niʼamoniʼö yaʼia daʼö fanaha tödö. Börö me no so khömö wanaha tödö, tatu tola öbadu duo.” Na ifondrondrongo mene-mene si fasala nibeʼe talifusöda daʼö, tola manö ifuli sandru ia ba duo. Daʼö no möi fangabu dödö!

14. Hewisa gangowuloa tobali fanolo khöda ba wamalua mene-mene si so ba Filifi 1:10?

¹⁴ Angowuloada no tobali fanolo khöda ba woloʼö mene-mene Waulo si so ba Filifi 1:10. Hadia manö lalania? Si oföna, ngawalö nitutunö ba gangowuloa samasugi ba dödöda hadia zabölö moguna khö Yehowa. Si dua, tafahaʼö ita ba wamalua hadia zi no tafahaʼö enaʼö lö mosinegu ita. Ba si tölu, tefarou dödöda ”ba waʼomasi hegöi ba mbua-bua si sökhi”. (Heb. 10:24, 25) Na laʼabölöʼö ita ira  talifusöda, faʼomasida khö Lowalangi hegöi faʼomasida khöra itugu monönö. Na sindruhu-ndruhu taʼomasiʼö Lowalangi hegöi ira talifusöda, taforege enaʼö lö tobali ita börö wangala ba niha böʼö.

15. Hadia geluahania ’itugu tedou wamalua satulö’?

¹⁵ Mangandrö Waulo soroi ba dödö ba niha Keriso ba Wilifi enaʼö ’itugu tedou ira wamalua satulö’. (Fil. 1:11) ’Famalua satulö’ moʼamakhaita ia ba waʼomasi khö Yehowa hegöi ba nono mbanuania, manutunö ba niha böʼö sanandrösa wamatira khö Yesu hegöi fanötönara sahöli-höli dödö. Aefa daʼö, simane niwaʼö ba Filifi 2:15, omasi ita tobali ”haga ba niha gulidanö”. Tefaudu wehede daʼa börö me ifotöi ndra nifahaʼönia ”haga gulidanö”. (Mat. 5:14-16) Ibeʼe fareta Yesu khö ndra soloʼö khönia ba ’wombaliʼö nifahaʼö’, ba iwaʼö khöra wa ’tobali ira samaduhuʼö irugi wondrege danö’. (Mat. 28:18-20; Hal. 1:8) No ’tafalua satulö’ na owölö-ölö ita wamalua halöwö nibeʼe Yesu.

16. Moloʼö Filifi 1:12-14, hewisa wangoromaʼöda wa tobali ita haga hewaʼae abua zalua khöda? (Faigi gambara ba guli majalah.)

¹⁶ Gofu hezoso ita, tola tobali ita haga. Tola manö ba zi sambua inötö tebai tafalua halöwö fanuriaigö. Hizaʼi itaria, tola taʼogunaʼö ginötö daʼö ba wamaʼema turia somuso dödö. Duma-dumania, me lakuru Waulo ba nomo si so ba Roma, isura zurania ba mbanua niha Keriso ba Wilifi. Hewaʼae simane daʼö, tola manuriaigö ia ba niha sozago yaʼia hegöi ba niha samalukhaisi yaʼia. Lö tebulö manuriaigö Waulo si fao faʼaterou dödö hewaʼae so zalua khönia, daʼa zameʼe terou dödö ndra talifusö si so ba daʼö, irege lö tebulö ira ”wangombakha  taromali Lowalangi, ba lö khöra faʼataʼu”.​—Baso Filifi 1:12-14; 4:22.

17. Hana wa ato ndra talifusö si lö tebulö ba wanuriaigö hewaʼae abua zalua khöra?

¹⁷ Simane Faulo, ato ndra talifusö zangoromaʼö faʼabarani. Hewaʼae toröi ira ba soi si lö manehegö halöwö nifaluada, hizaʼi laʼalui lala ba wamaʼema turia somuso dödö. (Mat. 10:16-20) Ba soi daʼö, so samösa zatua samasui iʼandrö khöra enaʼö laʼokhögö nahia fanuriaigö samösa, simane ba nösi nomora samösa, si falazi omo khöra, awöra sekola, awöra wohalöwö hegöi si faʼila khöra. Ba zi dua fakhe, itugu monönö mbanua niha Keriso ba mbanua daʼö. Tola manö lö toröi ita ba mbanua si lö manehegö halöwö nifaluada. Hizaʼi, tola tafahaʼö ita moroi ba duma-duma si sökhi nifalua ndra talifusöda andrö: Tandraigö ba wangalui inötö si tefaudu ba wanuriaigö. Yafaduhu dödömö wa hasambalö ibeʼe khömö waʼabölö Yehowa, enaʼö lö tebulö ndraʼugö ba wanuriaigö hewaʼae so zalua khömö.​—Fil. 2:13.

18. Hadia zinangeania ohitö dödöda?

¹⁸ Ba ginötö si sökhi andre, enaʼö taʼosambuaʼö dödöda wamalua mene-mene nibeʼe Waulo ba zurania ba mbanua niha Keriso ba Wilifi. Tatatugöi ngawalö zabölö moguna, taforege enaʼö lö mosinegu, lö tobali ita börö wangala ba niha böʼö, ba tafalua zatulö. Börö zimanö, itugu monönö waʼomasida, ba tafosumange Namada sebua faʼomasi sotöi Yehowa.