HADIA omasi ötema halöwö ba mbanua niha Keriso hizaʼi iadaʼa tebai nasa ötema? Tola manö niha böʼö zangai halöwö daʼö. Mazui no irai ba zilalö labeʼe khömö halöwö daʼö. Hizaʼi iadaʼa, tola manö lö oya zi tola öfalua börö me no numalö ndröfimö, fökhö, faʼambö ba zoguna, mazui so zi tobali noro dödö ba nomo. Mazui börö me so zi tebulö ba organisasi, tola manö ötehegö aheta ndraʼugö moroi ba halöwö si no ötema. Gofu hadia ia mbörönia, tola manö so ba dödömö wa tebai saʼae oya nifaluamö ba halöwö ba wamati hewaʼae sindruhunia omasi öfalua. Hewaʼae simanö, hewisa lalania enaʼö lö saʼae örasoi waʼide-ide dödö mazui faʼafatö dödö? Hewisa lalania enaʼö lö tebulö so khömö waʼomuso dödö?

Tola tafahaʼö ita moroi ba duma-duma Yohane Samayagö Idanö enaʼö lö tebulö so khöda waʼomuso dödö. Hizaʼi tola manö lö idöna-döna wa abua sibai halöwö ba wamati nitemania. Te lö irai ikhalaigö wa ihorigö ginötönia ba gurunga moroi na ba wamalua halöwö ba wamati. Hizaʼi, lö tebulö so waʼomuso dödö khö Yohane ba lö tebulö irorogö waʼomuso dödönia sandrohu faʼaurinia. Hana wa lö tebulö so khönia waʼomuso dödö? Hewisa göi ita enaʼö lö tebulö so waʼomuso dödö hewaʼae ba ginötö so zameʼe afatö dödöda?

Me ba mbaŵa si Öfa ba ndröfi 29 M, ibörögö halöwönia Yohane si no ibeʼe Yehowa khönia, yaʼia daʼö ba wamaʼanö niha wotemaʼö Mesia. Imane khöra, ”Mifalalini gera-erami, börö me no ahatö Wamatörö Lowalangi ba zorugo.” (Mat. 3:2; Luk. 1:12-17) Ato niha sanemaʼö turia somuso dödö. Tenga ha daʼö manö, ato niha si tohare moroi ba mbanua saröu ba wamondrondrongo turia nifaʼema Yohane, ba ato niha si terou tödö ba wamalalini era-era ba labayagö ira idanö. So göi faʼabarani khö Yohane ba wangumaʼö khö ndra sondröniaʼö agama si hulö niha satulö, wa tehuku ira na lö labulöʼö gamuatara. (Mat. 3:5-12) Me ba mbaŵa si Fulu ba ndröfi 29 M, ifalua halöwö si tohude Yohane ba halöwö ba wamati me ibayagö idanö Yesu. Iʼotarai daʼö, ifaretakö niha Yohane ba woloʼö Yesu, yaʼia daʼö Mesia si no mufabuʼu.​—Yoh. 1:32-37.

Imane Yesu sanandrösa ba halöwö Yohane si faböʼö moroi ba danö böʼö, ”Ba gotalua niha niʼadonogö ndra alawe, lö sabölö ebua moroi khö Yohane  Samayagö Idanö.” (Mat. 11:11) Tatu so waʼomuso dödö khö Yohane börö howu-howu nitemania. Simane Yohane, ato ndra talifusö sorasoi waʼafahöna howu-howu. Sambua duma-dumania yaʼia daʼö talifusöda ira matua sotöi Terry. Yaʼia hegöi foʼomonia Sandra, lahalö halöwö safönu inötö töra 50 fakhe. Imane Terry, ”No irai oya utema halöwö si möi faʼahöli-höli dödö. No irai tobali ndraʼo perintis biasa, ösi nomo Mbetieli, perintis istimewa, satua samasui, pengawas distrik, ba iadaʼa mangawuli tobali perintis istimewa.” Na tatema halöwö ba wamati ba organisasi, hasambalö so khöda waʼomuso dödö. Hizaʼi, simane nifahaʼöda yaʼita ba duma-duma Yohane, moguna taforege enaʼö lö tebulö so khöda waʼomuso dödö ba ginötö tebulö zalua khöda.

Lö tebulö so waʼomuso dödö khö Yohane Samayagö Idanö börö me lö iʼosiwawöi halöwö nitemania. Datanehegö duma-duma daʼa. Me no aefa tebayagö idanö Yesu, ibörögö alö soloʼö khö Yohane ba itugu ato soloʼö khö Yesu. Ibörögö so waʼaombö dödö khö ndra nifahaʼö Yohane ba lamane, ”Ibayagö idanö niha iadaʼa, ba fefu niha laʼondrasi ia.” (Yoh. 3:26) Itema lira Yohane, ”Sokhö niʼowalu yaʼia daʼö marafule. Omuso sibai dödö zi fahuwu khö marafule me mozizio ira ba zingania ba larongo wehedenia. Simanö göi ndraʼodo, afönu waʼomuso dödögu.” (Yoh. 3:29) Lö fahindri Yohane khö Yesu ba lö imane tödönia wa halöwö nitemania lö eluaha moroi ba halöwö sebua nitema Yesu. Hizaʼi lö tebulö so waʼomuso dödö khö Yohane börö me lö iʼosiwawöi wa yaʼia ’si fahuwu khö marafule’.

Börö me iʼokhögö mbua-bua si sökhi Yohane, daʼö zanolo yaʼia enaʼö lö tebulö so khönia waʼomuso dödö hewaʼae abua halöwönia. Duma-dumania, tebai ibadu Yohane agu börö me niha Nazir ia iʼotarai me tumbu. (Luk. 1:15) Imane Yesu, ”Simanö göi Yohane, lö manga ba lö mamadu ia.” Andrö wa no öna-öna sibai lala waʼauri Yohane, hizaʼi na Yesu hegöi ira nifahaʼönia, tola lafalua simane si toʼölö nifalua niha sato, tenga simane niha Nazir. (Mat. 11:18, 19) Aefa daʼö, lö irai ifalua Yohane dandra sahöli-höli dödö. Hizaʼi, aboto ba dödönia wa so ösa ira nifahaʼö Yesu, no irai tobali nifahaʼö Yohane, tebeʼe khöra kuaso ba wamalua dandra sahöli-höli dödö. (Mat. 10:1; Yoh. 10:41) Hewaʼae simanö, lö ibaliʼö daʼö Yohane tobali fökhö högönia. Hizaʼi, lö tebulö so khönia waʼaterou dödö ba wamalua halöwö nibeʼe Yehowa khönia.

Na lö taʼosiwawöi halöwö nibeʼe khöda iadaʼa, lö tebulö so khöda waʼomuso dödö. Imane Terry nitutunö moroi yawa, ”Uʼosambuaʼö dödögu ba halöwö nibeʼe khögu.” Me ifuli itörö tödönia sagötö me ihalö halöwö safönu inötö, imane, ”Lö irai so khögu waniasa. Ha sauli nitörö tödö si möi faʼahöli-höli dödö.”

Fefu halöwö mazui noro dödö niʼokhögöda ba organisasi, daʼö no si tohude. Hadia mbörö? Börö me ’si falulu fohalöwö sa ita ba halöwö Lowalangi’, ba no töi sebua daʼö khöda. (1 Kor. 3:9) Na taʼangerönusi daʼa, tola itugu omuso dödöda ba wangai halöwö khö Lowalangi. Faʼomuso dödöda tola muʼamaedolagö ia simane gama-gama sebua böli. Na lö tebulö tarorogö gama-gama daʼö, hasambalö lö tebulö waʼasökhinia. Simanö göi, na lö tebulö taʼangerönusi wa no töi sebua khöda ba wangai halöwö khö Lowalangi, lö tebulö so khöda waʼomuso dödö. Lö omasi ita na tafaedo-faedogö nifaluada ba nifalua niha böʼö. Lö tamane ba dödöda wa abölö sökhi halöwö nibeʼe Yehowa ba niha böʼö moroi ba halöwö nibeʼenia khöda.​—Gal. 6:4.

Te aboto ba dödö Yohane wa lö arara ifalua halöwö nitemania, hizaʼi ba zi lö idöna-döna tebato wamaluania halöwö. (Yoh. 3:30) Me döfi 30 M, mato önö waŵa me no aefa tebayagö idanö Yesu, ibeʼe ba gurunga Yohane Razo Herode. Hizaʼi iforege sibai Yohane ba wanuriaigö. (Mrk. 6:17-20) Hana wa lö tebulö so khönia waʼomuso dödö hewaʼae so khönia fombulöʼö simane daʼö? Börö me iʼosambuaʼö dödönia soʼamakhaita ba wamati.

Me so Yohane ba gurunga, irongo wa itugu tedou halöwö ba wamati nifalua Yesu. (Mat. 11:2; Luk. 7:18) Faduhu dödö Yohane wa Yesu andrö Mesia. Hizaʼi tola manö manofu-nofu dödönia, hewisa wamalua Yesu fefu wamaʼeleʼö sanandrösa ba Mesia nitutunö ba Zura Niʼamoniʼö. Duma-dumania, aboto ba dödö Yohane wa Mesia tobali razo. Tatu, tola manö manofu-nofu dödönia, hadia mamatörö Yesu  ba zi lö ara tö? Börö me lö ara tö mamatörö Yesu, hadia iʼefaʼö ia Yesu moroi ba gurunga? Börö me omasi iʼila hadia nifalua Yesu tobali Mesia, ifatenge darua ndra nifahaʼönia Yohane ba wanofu khö Yesu, ”Hadia yaʼugö niha nifabuʼu Lowalangi andrö, mazui so danö böʼö nibaloima?” (Luk. 7:19) Me mangawuli ndra nifahaʼönia si darua, tatu ihaogö ifondrondrongo Yohane me latutunö khönia wa ifalua Yesu ngawalö dandra sahöli-höli dödö, ba iʼoʼou ira Yesu ba wanutunö khö Yohane, ”Teboka hörö zauʼa, mofanö zombuyu-mbuyu töla, döhö zobou auri, safiso tola larongo li, ifuli auri zi mate, ba larongo niha si numana duria somuso dödö.”​—Luk. 7:20-22.

Tatu te abölöʼö Yohane me irongo hadia nifatunö ndra nifahaʼönia. Hadia nifaʼemara samaduhuʼö wa ifalua Yesu hadia zi no mufaʼeleʼö sanandrösa ba Mesia. Hewaʼae lö iʼefaʼö Yohane Yesu moroi ba gurunga, aboto ba dödö Yohane wa halöwö nifaluania khö Yehowa tenga zaya-zaya gölö. Hewaʼae so ia ba gurunga, lö tebulö so khönia waʼowua-wua dödö.

Simane Yohane, na taʼosambuaʼö dödöda ba ngawalö soʼamakhaita ba wamati, lö tebulö tahalö halöwö khö Yehowa si fao faʼomuso dödö ba faʼebolo dödö. (Kol. 1:9-11) Tola tafalua daʼö na tabaso Zura Niʼamoniʼö ba taʼangerönusi ia. Na tafalua daʼö, tola aboto ba dödöda wa tenga zaya-zaya gölö nifaluada khö Lowalangi. (1 Kor. 15:58) Imane Sandra, ”Ero maʼökhö ubaso sambua faza Sura Niʼamoniʼö, enaʼö itugu ahatö ndraʼo khö Yehowa. Daʼö zanolo yaʼo ba wangosambuaʼö dödögu khönia tenga ba khögu samösa.” Tola göi taʼosambuaʼö dödöda ba gangombakhata sanandrösa ba halöwö fanuriaigö nifalua ndra talifusöda khö Yehowa. Na tafalua daʼö, tobali fanolo khöda ba woʼangeragö hadia zi no ikhamö Yehowa, tenga ba khöda samösa. Imane Sandra, ”Acara si so ba JW Broadcasting^® ero waŵa, sanolo yaʼaga enaʼö ahatö ba organisasi ba lö tebulö so khöma waʼomuso dödö ba wamalua halöwöma.”

Hewaʼae lö arara ifalua Yohane Samayagö Idanö halöwönia khö Yehowa, iforomaʼö ”wehulu dödö hegöi faʼabölönia simane niʼokhögö Gelia”. Ba simane Elia, Yohane andrö ”niha simane yaʼita”. (Luk. 1:17; Yak. 5:17) Na taʼoʼö duma-duma Yohane si lö mangosiwawöi halöwönia ba lö tebulö iʼosambuaʼö dödönia ba wangai halöwö khö Yehowa, tola göi lö tebulö so khöda waʼomuso dödö ba wangai halöwö gofu hadia ia zalua khöda.