FADUHU dödöda wa idöniaʼö nono mbanuania Yehowa ba irorogö wamatira sagötö ”ngaluo safuria andre”. (2 Tim. 3:1) Hizaʼi, enaʼö tola tasöndra mbua moroi ba wanuturu lala Yehowa, moguna taʼoʼö niwaʼönia. Tola mufagölösi daʼö ba nifalua ndraono Gizaraʼeli me so ira ba danö si mate. Me luo daʼö, so zinangea lafalua na larongo li dorofe.

Ibeʼe fareta Yehowa khö Moze imane, ”Fazökhi khöu dorofe, dombua, niböbözi, wamazökhiu yaʼia, soguna ba wameʼe tandra ba zato, na lafazawa ira ba golombasewa.” (4 Moz. 10:2) Moguna lafoli dorofe andrö ira ere ba lala si faböʼö-böʼö ba wangoromaʼö hadia zinangea lafalua iraono Gizaraʼeli. (4 Moz. 10:3-8) Iadaʼa, latema wanuturu lala iraono mbanua Lowalangi ba wamalua ngawalö halöwö. Ba artikel daʼa, tatutunö tölu ngawalö wanuturu lala nitemada, ba tafagölösi ia ba li dorofe nifoli ba götö ndraono Gizaraʼeli. (1) Laʼandrö ba ndraono mbanua Lowalangi enaʼö laʼondrasi gangowuloa sebua mazui angowuloa si tohude tanö böʼö. (2) Mukaoni ndra sondröniaʼö si no mufataro ba wanemaʼö famomaha. (3) Muʼandrö ba mbanua niha Keriso maʼafefu enaʼö laʼoʼö gamakhoita si no mubohouni mazui si no muʼatulöʼö.

Na so dombua dorofe nifoli ndra ere, daʼö dandra wa omasi Yehowa enaʼö owulo ”zato fefu” ba mbawandruhö tanö ba gatumbukha nose Lowalangi. (4 Moz. 10:3) Fefu mado, si no mufasafi tobali öfa ngawawa ba si no mamazökhi tendra ba zi fasui nose Lowalangi, tola larongo li dorofe andrö. Niha si toröi ba tendra si lö fandröndröu moroi ba mbawandruhö weʼamöi ba nose Lowalangi, tola iʼanemaiʼö tohare ira ba zi hauga menit. Hizaʼi, niha si toröi ba tendra si fandröndröu, tola manö ara maʼifu laʼogunaʼö ginötö ba moguna laforege ba wangondrasi yaʼia. Hewaʼae na ahatö mazui fandröndröu nahiara, omasi Yehowa na owulo ira fefu ba wamondrondrongo fanuturu lala moroi khönia.

Iadaʼa, lö saʼae owulo ita ba nose Lowalangi. Hizaʼi, lakaoni ita fefu ba wangondrasi angowuloa ba zi sambua regional mazui angowuloa si tohude tanö böʼö. Ba gangowuloa simane daʼö, tola tarongo gangombakhata hegöi fanuturu lala si tohude. Fefu nono mbanua Yehowa si so ba soi si faböʼö-böʼö, laʼondrasi gangowuloa si fagölö. Fefu niha somasi manemaʼö fogaoni ba wangondrasi angowuloa andrö, hasambalö wa larasoi waʼowua-wua dödö. So niha sanörö lala si fandröndröu sibai enaʼö tola laʼondrasi gangowuloa andrö. Hewaʼae simanö, faduhu dödö ndra niha sangondrasi wa fagölö mbua nitemara ba wamorege si no lafalua.

Hewisa göi khö ndra talifusöda si toröi ba nahia si fandröndröu sibai moroi ba nahia wamalua angowuloa sebua? Börö waʼatedou teknologi, tola göi latema mbua na mufalua gangowuloa simane daʼö. Ba tola larasoi wa hulö zi no tohare ira ba nahia wamalua angowuloa. Duma-dumania, me möi zosalahini gödo sebua ba gödo ndraha Benin, lafalua gangowuloa si tohude. Muforomaʼö siaran acara daʼö ba Arlit, Niger, sambua mbanua pertambangan  si so ba Gurun Sahara. So 21 niha zamaigi siaran andrö, tefarahu ba daʼö niha sawena adöni tödö ba zindruhu. Hewaʼae na ba nahia si fandröndröu sibai so ira, larasoi wa hulö no fao ira ba niha sangondrasi, si 44.131 niha waʼato. Isura zi samösa dalifusöda ira matua imane, ”Maʼandrö sibai saohagölö me tola mafaigi siaran gangowuloa andrö ba nahia si so yaʼaga. Daʼö zangoromaʼö wa miʼomasiʼö sibai ndraʼaga.”

Na ha sambua dorofe nifoli ndra ere, ha ira niha si tobali ”högö ndraono Gizaraʼeli” si möi ba nose wamaʼeleʼö. (4 Moz. 10:4) Ba daʼö, latema gangombakhata hegöi famomaha moroi khö Moze. Daʼö zanolo yaʼira enaʼö sökhi wondröniaʼöra madora. Na tefarahu ndraʼugö ba gotalua ndra salawa andrö, tatu öforege enaʼö tohare ndraʼugö ba ötema mbuania.

Iadaʼa, tenga ”salawa” ndra satua sokubaloi, ba lö göi lafatörö ngawawa mbiri-biri Lowalangi nikubaloira. (1 Fet. 5:1-3) Hizaʼi, laforege sibai ba wokubaloi ngawawa mbiri-biri si so ba mbanua niha Keriso. Andrö, tatu omasi ira ba wanema fogaoni ba wangondrasi famomaha, simane ba Sekolah Pelayanan Kerajaan. Ba zekola andrö, latema wamomaha ira satua sokubaloi sanandrösa hewisa lala enaʼö itugu sökhi wamaluara halöwö soʼamakhaita ba mbanua niha Keriso. Lua-luania, itugu aro wamati fefu nösi mbanua niha Keriso. Hewaʼae na lö muʼondrasimö zekola simane daʼö, tola ötema mbua moroi khö ndra satua sokubaloi si no mangondrasi yaʼia.

Na faböʼö-böʼö li dorofe nifoli ndra ere, eluahania omasi Yehowa na findra ndraono Gizaraʼeli ba nahia tanö böʼö. (4 Moz. 10:5, 6) Ba ginötö findra ira, toföfö sibai wamaluara daʼö. Hizaʼi, te moguna wamorege ba wamalua yaʼia. Itaria, so zambö terou tödö findra ba nahia tanö böʼö. Hadia mbörö?

Te so ndraono Gizaraʼeli sorasoi wa no asese sibai findra ira. So göi zambö terou tödö börö me lö laʼila irugi hawaʼara toröi ira ba zi sambua nahia. Itaria, ha ”sara wongi” toröi ira ba daʼö. Hizaʼi itaria göi toröi ira ’dua wongi ba ma sara waŵa, ba ma ara moroi andrö’. (4 Moz . 9:21, 22) Sagötö wofanöra, hauga kali moguna findra ira? Itutunö 4 Moze faza 33 wa moguna findra ira mato 40 kali.

Itaria, lafasindro nosera iraono Gizaraʼeli ba nahia si haumö. Börö me ba ”danö si mate andrö sebolo sibai ba sataʼu ita” so ndraono Gizaraʼeli, tatu omuso dödöra na lasöndra nahia si haumö simane daʼö. (5 Moz. 1:19) Te daʼa mbörö wa so ösa zaombö tödö wa lö saʼae lasöndra nahia si sökhi simane daʼö na findra ira.

Na irugi inötö wofanö, te so ösa mado sinangea mombaloi hawaʼara ginötö wofanöra. Fefu ira, larongo li dorofe si faböʼö-böʼö, hizaʼi lö iʼanemaiʼö mofanö ira fefu ba ginötö si fagölö. Na larongo li dorofe si oföna mufoli, mado samazökhi ose tanö ba gatumbukha zinangea mofanö, yaʼia daʼö mado Yehuda, Isasari, ba Sebuloni. (4 Moz. 2:3-7; 10:5, 6) Na no aefa mofanö zi tölu mado andrö, lafoli dorofe ira ere ba zi mendrua kali ba li si faböʼö-böʼö. Daʼa zi tobali tandra wa moguna mofanö zi tölu mado samazökhi ose tanö raya. Lö laböhöli lafalua daʼö ira ere irege mofanö fefu ndraono Gizaraʼeli.

Na so wombulöʼö ba organisasi, tola manö abua khöu ba wanemaʼö yaʼia. Tola manö ambö faʼabölöu börö me oya sibai waʼatebulö. Mazui, te no sana dödöu ba zi sambua gamakhoita ba lö omasiʼö na tebulö daʼö. Tola manö moguna öforege ba wangokhögö faʼebolo dödö enaʼö tola öfaudugö waʼaurimö ba waʼatebulö andrö. Hewaʼae simanö, na taforege ba wanemaʼö hegöi ba woloʼö yaʼia, tola manö awena aboto ba dödöda wa moguna khöda waʼatebulö andrö ba taʼila wa omuso dödö Yehowa khöda.

Ba götö Moze, ibeʼe wanuturu lala Yehowa ba ndra matua, ba ndra alawe, hegöi iraono si zuta faʼato ba wanörö danö si mate. Na lö fanolo hegöi fanuturu lala moroi khö Yehowa, lö mofozu waʼaurira. Iadaʼa, ibeʼe göi khöda Yehowa wanuturu lala, enaʼö tola mofozu ita ba wanörö ngaluo safuria safönu ametaʼuö. Börö wanolo moroi khö Yehowa, itugu aro wamatida ba itugu aro wahuwusada khönia. Andrö, tatu omasi ita ba woloʼö niwaʼö Yehowa simane nifalua ndraono Gizaraʼeli, soʼanemaiʼö mamalua niʼandrö Lowalangi na larongo li dorofe!