”Samuza maʼökhö, so samösa gasiwagu zombörögö faʼudusa khögu. Ugogohe mbaginia ba utögi. Edöna ubunu ia.”​—Paul.

”Alio sibai mofönudo ba nomo, hewaʼae ha abula dödö side-ide daʼö. Ba ginötö mofönudo, tola ufakiko fefu gama-gama si so ba zi fasuigu.”​—Marco.

Tola manö, lö tafalua zimane daʼö. Hizaʼi, itaria abua khöda ba wangokhögö fanaha tödö. Hadia mbörö? Dane-dane si oföna yaʼia daʼö börö me no taʼokhögö horö ondröita moroi ba niha siföföna, Adamo. (Rom. 5:12) Simane Paul hegöi Marco, so ösa niha sagalio mofönu. So göi niha sorasoi wa abua khöra ba wangokhögö fangera-ngera si sökhi. Duma-dumania, laʼera-era manö hadia ia zangaʼasogö faʼataʼu mazui sangaʼasogö khöra faʼide-ide dödö. Tanö böʼönia, so ösa niha sorasoi wa abua khöra ba wolawa isö-isö dödöra ba wamalua fohorö, ba wamadu tuo, mazui ba wangogunaʼö narkoba.

Na lö tafatörö wangera-ngerada, isö-isö dödö, hegöi amuatada, tola manö lö sökhi lua-luania. Hizaʼi, lö alua daʼö na taforege ba wangokhögö fanaha tödö. Datatutunö zi tölu wanofu andre si tobali fanoloda ba wondrouʼö amuata fanaha tödö: (1) Hadia wanaha tödö andrö? (2) Hana wa moguna sibai daʼö? (3) Hewisa wondrouʼöda amuata daʼa, si no tefarahu ba ’mbua-bua geheha’? (Gal. 5:22, 23) Aefa daʼö, tatutunö hadia manö zinangea tafalua na itaria abua khöda ba wangokhögö fanaha tödö.

Niha sangokhögö fanaha tödö, lö iʼanemaiʼö ifalua fefu zomasi dödönia. Hizaʼi, itaha dödönia enaʼö lö iwaʼö mazui ifalua gamuata si fatuwu khö Lowalangi.

Yesu zi tobali duma-duma ba wangokhögö fanaha tödö. Imane Sura Niʼamoniʼö, ”Me laʼoʼaya ia ba lö isulöni. Me lafakao ia, lö ifangaha wolawa. Hizaʼi, itouʼö fefu ba danga Zanguhuku satulö.” (1 Fet. 2:23) Duma-dumania, me so Yesu ba döla geu famakao, tola itaha dödönia me na laʼoʼaya ia ira udunia. (Mat. 27:39-44) No irai göi iforomaʼö wanaha tödö ba ginötö manofu-nofu khönia ndra sondröniaʼö ba agama ba wangalui lala enaʼö fasala Yesu na fahuhuo. (Mat. 22:15-22) Ba me so ösa niha Yahudi sofönu ba sedöna mohaluni yaʼia faoma kara, lö ilawa ira Yesu. Hizaʼi, ”ibiniʼö ia ba iröi gosali”.​—Yoh. 8:57-59.

Hadia tola taʼoʼö duma-duma Yesu hewaʼae na lö moʼahonoa ita? Tola. Imane sinenge sotöi Fetero, ’No itaögö wamakao Keriso salahimi ba no iröi khömi duma-duma enaʼö mihaogö wanara lahenia.’ (1 Fet. 2:21) Daʼö mbörö wa tola taʼoʼö sibai duma-duma Yesu sanandrösa ba wangokhögö fanaha tödö. Hana wa moguna sibai daʼö?

Na omasi ita taʼomusoiʼö dödö Yehowa, moguna taʼokhögö wanaha tödö. Hewaʼae na no ara tafosumange Yehowa si fao faʼalöfaröi, tola tekiko  wahuwusada khönia na lö taʼokhögö wanaha tödö sanandrösa ba gamuata hegöi fehededa.

Nehegö duma-duma Moze. Me götö waʼaurinia, no ”sebolo sibai tödö Moze andrö, moroi ba niha böʼö fefu ba gulidanö”. (4 Moz. 12:3) Ba zi ngafulu fakhe faʼara, iʼokhögö wanaha tödö Moze ba ndraono Gizaraʼeli sokökö-kökö. Hizaʼi ba zi samuza inötö, tebai saʼae itaha dödönia Moze. Ba ginötö daʼö, mukökö-kökö ndraono Gizaraʼeli börö me ambö nidanö. Mofönu Moze ba ihangöi soi andrö imane, ”Mifondrondrongo, yaʼami sabeʼe tandro! Hadia maʼila maö mafalua ba gara andre gömi idanö?”​—4 Moz. 20:2-11.

Lö mofozu Moze ba wangokhögö fanaha tödö. Lö iforomaʼö wa Yehowa zangaʼasogö idanö andrö faoma tandra sahöli-höli dödö. (Zin. 106:32, 33) Lua-luania, lö itehegö khönia Yehowa ba weʼamöi ba Danö Amabuʼula. (4 Moz. 20:12) Tola manö, maniasa Moze sandrohu faʼaurinia ba zala si no ifalua andrö.​—5 Moz. 3:23-27.

Hadia wamahaʼönia khöda? Hewaʼae na no ara tafosumange Yehowa, tebai tawaʼö wehede si lö sökhi ba niha sangandrö fönuda mazui ba niha sinangea muʼamenesi. (Ef. 4:32; Kol. 3:12) Sindruhu sa, na itugu tedou ndröfida, tola manö abua khöda ba wangokhögö faʼebolo dödö. Hizaʼi, törö tödömö duma-duma Moze. Lö omasi ita tafakiko döi si sökhi niʼokhögöda föna Yehowa, ha börö me lö taʼokhögö wanaha tödö. Börö daʼö, hewisa lalada ba wondrouʼö bua-bua si sökhi andre?

Andrö geheha niʼamoniʼö ba wangandrö. Hana wa moguna tafalua daʼö? Fanaha tödö no bua-bua geheha niʼamoniʼö moroi khö Lowalangi, ba omasi Yehowa ba wameʼe ehehania ba niha sangandrö khönia. (Luk. 11:13) Iʼogunaʼö gehehania niʼamoniʼö Yehowa ba wameʼe faʼabölö soguna khöda. (Fil. 4:13) Itolo göi ita ba wondrouʼö mbua-bua tanö böʼö si farahu ba mbua-bua geheha, simane faʼomasi. Faʼomasi zanolo yaʼita irege aoha khöda ba wangokhögö fanaha tödö.​—1 Kor. 13:5.

Timbagö fefu hadia ia zi tobali daha-taha khömö ba wangokhögö fanaha tödö. Duma-dumania, timbagö situs web hegöi hiburan sangoromaʼö ngawalö zi lö tefaudu. (Ef. 5:3, 4) Sindruhunia, moguna tatimbagö fefu hadia ia zi tola mondrönisi tödöda ba wamalua amuata si fasala. (Gamd. 22:3; 1 Kor. 6:12) Duma-dumania, na alio tedönisi dödö zi samösa niha ba wamalua amuata fohorö, te moguna ihalö gangetula enaʼö lö ifaigi film mazui ibaso mbuku soʼamakhaita ba wakawasa.

 Tola manö abua khöda ba wangokhögö fanaha tödö. Hizaʼi, na lö mamalö taforege ba wangokhögö daʼö, hasambalö ibeʼe Yehowa waʼabölö soguna khöda. (2 Fet. 1:5-8) Itolo ita enaʼö tola tafatörö wangera-ngerada, fehededa, hegöi amuatada. Daʼö nirasoi Paul hegöi Marco, nitutunö ba wamobörö duho andre. Iadaʼa, tenga saʼae niha salio mofönu ira. Nehegö göi zi no irai alua khö dalifusöda ira matua salio mofönu na molohe moto, si no irai faʼudu ba niha solohe moto tanö böʼö. Hadia nifaluania ba wombulöʼö amuatania andrö? Imane, ”Ero maʼökhö, ulau mangandrö soroi ba dödö. Ufahaʼö göi ndraʼo ba duho sanutunö sanandrösa ba wanaha tödö ba utanögö ba dödögu ösa ayati si tola manolo yaʼo. No ufalua daʼa ba zi hauga fakhe faʼara. Hewaʼae simane daʼö, ero sihulö wongi, lö tebulö ufasugi ba dödögu wa moguna uʼokhögö wanaha tödö. Ba na no fazazi ndraʼodo, uhulöʼö ndraʼo wofanö enaʼö lö mangaösö-ngaösödo ba wolohe moto.”

Itaria, lö mofozu ita ba wangoromaʼö fanaha tödö. Na alua daʼö, tola manö aila ita ba wangandrö khö Yehowa. Hizaʼi sindruhunia, moguna talau mangandrö ba ginötö simane daʼö. Börö daʼö, anemaiʼö angandrö khö Yehowa. Andrö khö Yehowa enaʼö iʼefaʼö zalamö ba itolo ndraʼugö. Aefa daʼö, halö gangetula enaʼö lö öfuli öfalua daʼö ba zi so miföna. (Zin. 51:11-13) Hasambalö ifondrondrongo Yehowa wangandrö nifaʼemamö soroi ba dödö. (Zin. 102:18) Ifasugi ba dödöda sinenge sotöi Yohane wa do Nono Lowalangi andrö, ”tola iʼefaʼö fefu horöda”. (1 Yoh. 1:7; 2:1; Zin. 86:5) Törö tödömö wa iʼamenesi ndraono mbanuania Yehowa enaʼö lö mamalö laʼefaʼö zala niha böʼö. Andrö wa tola faduhu dödöda wa iʼefaʼö zalada Yehowa.​—Mat. 18:21, 22; Kol. 3:13.

Lö omasi Yehowa me lö iforomaʼö wanaha tödö Moze ba danö si mate. Hewaʼae simanö, iʼefaʼö zalania Yehowa. Ba itutunö Sura Niʼamoniʼö wa ebua sibai wamati Moze andrö, ba moguna taʼoʼö duma-dumania. (5 Moz. 34:10; Heb. 11:24-28) Hewaʼae na lö itehegö khö Moze ba weʼamöi ba Danö Amabuʼula, hasambalö itehegö khönia Yehowa ba wangokhögö faʼauri si lö aetu ba gulidanö Faradaiso. Tola göi auri ita irugi zi lö aetu na lö mamalö taforege ba wondrouʼö fanaha tödö.​—1 Kor. 9:25.