So siwa ngawalö mbua-bua geheha niʼamoniʼö si no mututunö ba ayati si dombua andre, yaʼia daʼö ”faʼomasi, faʼomuso dödö, faʼohahau dödö, faʼebolo dödö, faʼasökhi dödö, faʼasökhi, famati, falöʼalio mofönu, ba fanaha tödö”. Hizaʼi, tenga daʼö geluahania wa ha mbua-bua daʼö niʼasogö geheha niʼamoniʼö.

Hezo tola taʼila daʼö? Imane Faulo ba ayati 19-21, ”Mbua-bua nösi yaʼia daʼö fohorö, faʼaraʼiö, amuata si lö faʼaila, fanömba adu, fakelemusa, faʼudusa, fasosota, faʼolohu, fönu, fatötöisa, faʼafabali wangera-ngera, foloʼö famahaʼö niha, faʼafökhö dödö, femabu-mabu, famalua owasa si lö sökhi, ba tanö böʼönia.” (Gal. 5:19-21) Nehegö ngawua wehede ”ba tanö böʼönia” niwaʼö Waulo. Daʼa zangoromaʼö wa so nasa gamuata tanö böʼö si farahu ba ”mbua-bua nösi”, duma-dumania simane nitutunö ba Kolose 3:5. Simane daʼö göi zalua me itutunö Faulo zi siwa ngawalö mbua-bua geheha ba Galatia 5:22, 23. Daʼa zangoromaʼö wa so nasa mbua-bua tanö böʼö niʼasogö geheha niʼamoniʼö, baero mbua-mbua si siwa ngawalö nitötöi Waulo.

Enaʼö itugu aboto ba dödöda daʼa, tola tafaehusi mbua niʼasogö geheha niʼamoniʼö ba mbua-bua niʼasogö haga. Imane Faulo ba niha Keriso si so ba Efeso, ’Haga zangaʼasogö ngawalö zi sökhi, faʼatulö, ba sindruhu.’ (Ef. 5: 8, 9) Andrö, sambua mbua-bua niʼasogö haga yaʼia daʼö faʼasökhi. Hizaʼi, tefarahu göi mbua-bua daʼa ba ’mbua-bua geheha’. Daʼa zangoromaʼö wa tola iʼasogö göi eheha niʼamoniʼö ’waʼatulö ba sindruhu’.

Iʼamenesi göi Dimoteo Faulo enaʼö igohi ”zindruhu, famosumange Lowalangi soroi ba dödö, famati, faʼomasi, faʼanau gölö, ba falöʼalio mofönu”. (1 Tim. 6:11) Ba zi önö ngawalö mbua-bua andrö, ha tölu zi tefarahu ba ’mbua-bua geheha’, yaʼia daʼö famati, faʼomasi, ba falöʼalio mofönu. Hizaʼi, tatu moguna khö Dimoteo wanolo moroi ba geheha niʼamoniʼö, enaʼö tola igohi mbua-bua tanö böʼö si tölu ngawalö, yaʼia daʼö sindruhu, famosumange Lowalangi soroi ba dödö, ba faʼanau gölö.​—Fatimbaisi Kolose 3:12; 2 Fetero 1:5-7.

Börö daʼö, bua-bua sinangea laʼokhögö ira niha Keriso tenga ha mbua-bua si siwa ngawalö si no mututunö ba Galatia 5:22, 23. Tola itolo ita eheha Lowalangi ba wondrouʼö bua-bua si siwa ngawalö andrö si no tefarahu ba ’mbua-bua geheha’. Tobali, tola göi itolo ita eheha niʼamoniʼö ba wondrouʼö bua-bua tanö böʼö. Daʼö zanolo yaʼita enaʼö tola tobali ita niha Keriso soʼahonoa ba wamati, ba ’tebohouni gamuatada, nifazökhi moloʼö ohitö dödö Lowalangi, si tefaudu ba waʼatulö ba faʼalöfaröi sindruhu’.​—Ef. 4:24.