1. Hewisa dödö Yehowa na mangawuli khönia mbiri-birinia si no taya?

SIMANE si no tatutunö ba artikel silalö, ifagölösi ia Yehowa simane kubalo si sökhi, soʼameʼegö tödö fefu mbiri-birinia. Me föna, imane Yehowa ba ndraono Gizaraʼeli si no mondröi yaʼia, ”Mifuli ami khögu, ba ufulido khömi.” Irugi iadaʼa, lö si tebulö Yehowa. Imane wangumaʼö, ”Lö irai tebulö ndraʼo.” (Mal. 3:6, 7, Terjemahan Dunia Baru) Iwaʼö Yesu wa omuso sibai dödö Yehowa hegöi ira malaʼikania, na so samösa nono mbanuania sangawuli khönia.​—Luk. 15:10, 32.

2. Hadia nitutunöda ba artikel daʼa?

² Ba artikel daʼa, tatutunö tölu gamaedola Yesu, soʼamakhaita ba niha si no mangaröuʼö yaʼira moroi khö Yehowa. Tatutunö ösa mbua-bua sinangea taforomaʼö ba wanolo mbiri-biri si no taya enaʼö mangawuli ira khö Yehowa. Tatutunö göi hadia mbörö wa omuso sibai dödöda na taforege ba wanolo niha si no mamöhöli halöwö ba wamati.

3-4. Hana wa iforege sibai ira alawe nitutunö ba Luka 15:8-10, ba wangalui kefe logania si no taya?

³ Moguna taforege ba wangalui niha somasi mangawuli khö Yehowa. Ba gamaedola nisura ba Injil Luka, itutunö Yesu sanandrösa khö ndra alawe sangalu-ngalui zi sambua kefe loga drakhma si no taya. Iforege sibai ira alawe andrö ba wangalui kefenia si no taya. Daʼö zabölö tohude ba gamaedola andrö.​—Baso Luka 15:8-10.

⁴ Itutunö Yesu hewisa dödö ndra alawe daʼö me no isöndra gefe loga drakhmania si no taya. Tola manö, nibeʼe ninania gefe loga andrö. Ba zi toʼölö lafalua ira niha Yahudi ba götö Yesu, so ösa ndra ina sameʼe fulu ngawua loga drakhma si tobali buala khö ndraonora alawe ba ngaluo wangowalura. Iʼila ira alawe nitutunö ba gamaedola Yesu andrö wa no atoru gefenia tou ba zalo. Börö daʼö, ifohola wandru ba ihaogö wangosisiʼö zalo nomonia ba wangalui kefe daʼö. Hizaʼi, lö hadöi isöndra, te börö me ambö tara haga wandrunia. Aefa daʼö, ihaogö wamözini omonia maʼafefu. Ba gafuriata, isöndra gefe loga andrö ba gawu-gawu nibözininia. No taki-takile gefe andrö me göna ia haga wandru. Ahono sibai  dödö ndra alawe andrö! Börö me omuso sibai dödönia, ifatunö daʼö khö ndra awönia hegöi si falazi omo khönia.

5. Hana wa lö aoha ba wanöndra niha si no mamöhöli halöwö ba wamati?

⁵ Simane nitutunö ba gamaedola Yesu, moguna so wamorege ba wangalui si no taya. Moguna göi mufalua zimane daʼö ba wanöndra niha si no mangaröuʼö yaʼira moroi ba mbanua niha Keriso. Tola manö, no hauga fakhe laböhöli wamalua halöwö ba wamati. Te no findra ira ba nahia tanö böʼö ba lö hadöi ndra talifusöda ba daʼö si faʼila khöra. Hizaʼi, hasambalö so ba gotaluara somasi mangawuli khö Yehowa. Omasi ira fao khö ndra talifusöra ba wamati ba wamosumange Yehowa simane ba zilalö, hizaʼi tebai lafalua daʼö na lö hadöi sanolo yaʼira.

6. Hewisa lala ndra sanuriaigö ba mbanua niha Keriso ba wangalui niha si no mamöhöli halöwö ba wamati?

⁶ Fefu ndra sanuriaigö ba mbanua niha Keriso, tefarahu ba daʼö ndra satua sokubaloi, perintis, mazui ösi nomo niha samöhöli halöwö ba wamati, tola fao ira ba wangalui niha si no mondröi banua niha Keriso. Hadia so zi fahuwu khömö mazui ösi nomomö si no mamöhöli halöwö ba wamati? Mazui, hadia no irai falukha ndraʼugö ba niha samöhöli halöwö ba wamati me möiʼö manuriaigö ba nomo-omo misa mazui ba nahia sato niha? Fatunö ba niha daʼö, wa na omasi ia lafalukhaisi, tola öʼombakhaʼö khö ndra satua sokubaloi nahia waʼatoröinia mazui numero HP-nia.

7. Hadia wamahaʼö si tola öhalö ba nitutunö dalifusöda satua sokubaloi sotöi Thomas?

⁷ Hadia manö zinangea lafalua ira satua sokubaloi ba wangalui niha somasi mangawuli khö Yehowa? Nehegö hadia niwaʼö Thomas, * samösa satua sokubaloi si toröi ba Spanyol. So töra 40 niha waʼato ndra Samaduhuʼö si no itolo irege lafuli ira ba mbanua niha Keriso. Imane Thomas, ”Ba wamobörö, manofu ndraʼo khö ndra talifusöda sangila, hezo nahia waʼatoröi ndra talifusöda si no mamöhöli halöwö ba wamati. Mazui, manofu ndraʼo khö ndra sanuriaigö, hadia lö olifu ira ndra talifusöda si no mamöhöli weʼamöi ba gangowuloa. Ato ndra talifusöda somasi manolo yaʼo, börö me larasoi wa no tefarahu ira ba wangalui niha si no mamöhöli halöwö ba wamati. Aefa daʼö, ba ginötö uʼondrasi ndra talifusöda si no mamöhöli halöwö ba wamati, usofu hewisa duria ndraonora hegöi ösi nomora tanö böʼö. Ba zilalö, te so ösa ba gotaluara sasese molohe iraonora ba gangowuloa. Ba tola manö, so ba gotalua ndraonora andrö zi no tobali sanuriaigö. Tola göi mutolo ira enaʼö mangawuli khö Yehowa.”

8. Moroi ba gamaedola nibeʼe Yesu sanandrösa khö zi samösa iraono sofanö moroi ba nomo, nisura ba Luka 15:17-24, hadia nifalua zi samösa ama khö nononia si no mamalalini era-era?

⁸ Hadia manö mbua-bua sinangea taʼokhögö enaʼö tola tatolo niha si no mamöhöli halöwö ba wamati ba lafuli ira khö Yehowa? Tola tafahaʼö ita moroi ba gamaedola nibeʼe Yesu sanandrösa khö zi samösa iraono sofanö moroi ba nomo. (Baso Luka 15:17-24.) Itutunö Yesu wa ba gafuriata, aboto ba dödö nono daʼö wa fasala nifaluania ba ihalö gangetula enaʼö ifuli ia ba nomo. Fagohi namania ba wanemaʼö ononia andrö ba italagui ia si fao faʼomasi, irege aboto ba dödö nononia wa iʼomasiʼö ia amania. Maniasa sibai dödö nono daʼö ba so ba gera-erania wa tenga sinangea na lafotöi ia ono namania. Me itutunö nösi dödönia, ihaogö ifondrondrongo daʼö amania si fao foʼameʼegö tödö. Aefa daʼö, iʼaroʼö dödö nononia wa mutemaʼö ia ba nomo andrö si tobali ono, tenga tobali sohalöwö. Andrö, ifalua sambua gowasa sebua amania andrö, ba ibeʼe mbaru si sökhi khö nononia si no mamalalini era-era.

9. Hadia manö mbua-bua sinangea taʼokhögö ba wanolo niha si no mamöhöli halöwö ba wamati enaʼö mangawuli ira khö Yehowa? (Faigi kotak ” Lala ba Wanolo Niha Somasi Mangawuli khö Yehowa”.)

 ⁹ Hulö simane ama nitutunö ba gamaedola andrö Yehowa. Iʼomasiʼö ndra talifusöda si no mamöhöli halöwö ba wamati ba omasi ia na mangawuli ira khönia. Na taʼoʼö duma-duma Yehowa, tola tatolo niha si no mamöhöli halöwö ba wamati enaʼö lafuli ira khö Lowalangi. Ba wanolo yaʼira, moguna taforomaʼö waʼebolo dödö, foʼameʼegö tödö, hegöi faʼomasi. Hana wa moguna taforomaʼö mbua-bua daʼö, ba hewisa wamaluada yaʼia?

10. Hana wa moguna so khöda waʼebolo dödö ba ginötö tatolo zi samösa niha enaʼö ifuli ia khö Yehowa?

¹⁰ Moguna ginötö enaʼö tola mangawuli zi samösa niha khö Yehowa. Daʼö mbörö wa moguna so khöda waʼebolo dödö. Ato niha si no mamöhöli halöwö ba wamati sanutunö wa tola ifuli terou dödöra ba wamalua halöwö ba wamati me no hauga kali möi ndra satua sokubaloi hegöi ira talifusöda ba mbanua niha Keriso ba wangondrasi yaʼira. Imane talifusöda ira alawe sotöi Nancy moroi ba Asia Tenggara, ”So samösa zi fahuwu khögu ba mbanua niha Keriso sanolo yaʼo. Iʼomasiʼö ndraʼo simane faʼomasinia khö gaʼania sindruhu. Ifasugi ba dödögu sanandrösa ba zi sökhi si no irai matörö. Ba me ututunö khönia nösi dödögu, ifondrondrongo ndraʼo si fao faʼebolo dödö. Baero daʼö, lö khönia faʼaombö dödö ba wameʼe khögu mene-mene. Iforomaʼö wa yaʼia andrö sindruhu si fahuwu, somasi manolo yaʼo ba ginötö moguna.”

11. Hana wa moguna taforomaʼö woʼameʼegö tödö ba ginötö tatolo niha niʼafökhöiʼö tödö?

¹¹ Foʼameʼegö tödö, tola muʼamaedolagö ia simane dalu-dalu si tola mamadöhö faʼafökhö nirasoi zi samösa niha. So ösa niha samöhöli halöwö ba wamati börö me tetutu dödöra khö zi samösa dalifusöda ba mbanua niha Keriso.  Ba zi hauga fakhe, lö nasa si taya ba dödöra daʼö, andrö wa lö omasi ira mangawuli ba mbanua niha Keriso. Te so ösa ba gotaluara zangumaʼö wa no lafalua khöra zi lö atulö. Börö daʼö, te omasi ira na so niha samondrondrongo yaʼira ba samorege ba wangiʼila hadia zindruhunia nirasoira. (Yak. 1:19) Imane samösa dalifusöda ira alawe sotöi María, si no irai mamöhöli halöwö ba wamati, ”Omasido na so zamondrondrongo yaʼo, sondrara tödögu na urasoi waʼabu dödö, sanolo yaʼo ba sameʼe khögu mene-mene ba ginötö si tefaudu.”

12. Hana wa tola muʼamaedolagö waʼomasi Yehowa andrö simane sinali?

¹² Itutunö Sura Niʼamoniʼö wa faʼomasi Yehowa ba nono mbanuania, tola muʼamaedolagö ia simane sinali. Hadia mbörö? Angeragö duma-duma daʼa: Khalaigö atö na no arakhagö alömö ndraʼugö ba nasi. Abölö-bölö mbade ba okafu sibai nidanönia. Aefa daʼö, so niha yawa ba göfa samazaumba khöu gama-gama si tola ögogohe enaʼö lö ahöndrö ndraʼugö. Tatu öʼandrö sibai saohagölö ba daʼö. Hizaʼi, na ha daʼö wanolo nitemamö lö tola teʼorifi ndraʼugö. Moguna so niha samazaumba khöu sinali ba idöni ndraʼugö moroi ba nidanö. Imane Yehowa sanandrösa ba ndraono Gizaraʼeli si no elungu ba wamati, ”No udöni ira sinali, simane niʼogunaʼö niha, fesu faʼomasi.” (Hos. 11:4) Daʼö göi nirasoi Yehowa ba niha si no mamöhöli halöwö ba wamati hegöi ba niha sanaögö abula dödö ba faʼaombö dödö. Omasi ia enaʼö laʼila wa iʼomasiʼö ira ba itolo ira enaʼö mangawuli ira khönia. Tola iʼogunaʼö ndraʼugö Yehowa ba wanolo niha böʼö irege tola larasoi wa iʼomasiʼö ira Yehowa.

13. Tutunö sambua duma-duma sangoromaʼö wa faʼomasi andrö tola tobali fanolo khö zi samösa niha enaʼö mangawuli ia khö Yehowa.

¹³ Moguna taʼaroʼö dödö niha si no mamöhöli halöwö ba wamati wa iʼomasiʼö ira Yehowa ba  taʼomasiʼö göi ira. Imane talifusöda Pablo, nitutunö ba artikel silalö, si no mamöhöli halöwö ba wamati ba zi töra 30 fakhe faʼara, ”Ba zihulö wongi me mofanö ndraʼo moroi ba nomo, falukha ndraʼo khö dalifusöda ira alawe si no atua. Sökhi sibai gamuatania, ba fahuhuo ia khögu si fao faʼomasi. Ibörögö ulau meʼe, hulö ndraono side-ide. Ututunö khönia wa te nifatenge Yehowa ia ba wahuhuosa khögu. Ba ginötö daʼö, uhalö gangetula enaʼö mangawuli ndraʼo khö Yehowa.”

14. Moloʼö amaedola nisura ba Luka 15:4, 5, hadia zinangea ifalua si samösa kubalo na no isöndra mbiri-birinia si taya?

¹⁴ Moguna lö aetu-aetu tatolo ba tafarou dödö ndra talifusöda si no mamöhöli halöwö ba wamati. Simane iraono nitutunö ba gamaedola Yesu, tola manö lö alio taya waʼafökhö nirasoira. Baero daʼö, börö me no irai farahu ira ba gulidanö Zatana, tola manö lö aro ira ba wamati. Andrö wa moguna tatolo ira ba wangaroʼö famatira khö Yehowa. Ba gamaedola Yesu sanandrösa ba mbiri-biri si taya, itutunö Yesu wa ibeʼe ba galisinia mbiri-biri andrö kubalo ba iʼohe ia mangawuli ba ngawawa. Oya ginötö hegöi faʼabölö niʼogunaʼö gubalo andrö ba wangalui mbiri-birinia si no taya. Hewaʼae simanö, aboto ba dödönia wa so nasa zinangea ifalua. Börö me lö faʼabölö khö mbiri-biri daʼö, moguna iforege kubalo andrö ba wolohe yaʼia mangawuli ba ngawawa.​—Baso Luka 15:4, 5.

15. Hewisa lalada ba wanolo niha sambö faʼabölö enaʼö tola mangawuli ira khö Yehowa? (Faigi kotak ” Sambua Fakake Sebua Böli”.)

¹⁵ Tola manö oya ginötö hegöi faʼabölö niʼogunaʼöda ba wanolo niha samöhöli halöwö ba wamati enaʼö tola lataögö gabula dödö si tobali fanaisira ba wamosumange Yehowa mangawuli. Hizaʼi, börö wanolo moroi ba geheha Yehowa, Taromalinia, hegöi publikasi si no ihenaigö organisasi, tola tatolo ira ba wangaroʼö fahuwusara khö Yehowa. (Rom. 15:1) Hewisa  lalada ba wamalua daʼö? Imane samösa dalifusöda si no ara tobali satua sokubaloi, ”Na no lahalö gangetula ira talifusöda si no mamöhöli halöwö ba wamati wa omasi ira mangawuli ba mbanua niha Keriso, te moguna lafuli lafahaʼö ira ba Zura Niʼamoniʼö.” * Na yaʼugö nituyu ba wamalua daʼö, moguna ötema halöwö andrö si fao faʼomuso dödö. Imane nasa talifusöda andrö, ”Niha sondröniaʼö famahaʼö ba Zura Niʼamoniʼö andrö, moguna tobali ia si fahuwu si sökhi irege lö alawö niha nitolonia ba wanutunö ösi dödönia.”

16. Hezo tola taʼila wa latolo ita ira malaʼika?

¹⁶ Oya zi no irai alua sangoromaʼö wa latolo ita ira malaʼika ba wanöndra niha si no mamöhöli halöwö ba wamati somasi mangawuli khö Yehowa. (Fam. 14:6) Nehegö duma-duma salua khö zi samösa dalifusöda moroi Ekuador sotöi Silvio, si no mamöhöli halöwö ba wamati. Iʼandrö wanolo moroi khö Yehowa ba wangandrö enaʼö tola mangawuli ia ba mbanua niha Keriso. Me lö nasa sawai mangandrö ia, so darua zatua sokubaloi si so föna mbawandruhö nomonia. Me tohare ira, omasi ira ba wameʼe fanolo soguna khönia.

17. Hadia nirasoida na tatolo niha si no mamöhöli halöwö ba wamati?

¹⁷ Ebua sibai waʼomuso dödö nirasoida na tatolo niha si lö aro ba wamati, enaʼö tola mangawuli ira khö Yehowa. Nehegö hadia nitutunö Salvador, samösa perintis samorege ba wanolo niha si no mamöhöli halöwö ba wamati. Imane, ”Asöndru sibai dödögu ero na uʼangeragö niha samöhöli halöwö ba wamati, si no mangawuli khö Yehowa. Omuso dödögu börö me no falulu fohalöwö ndraʼo khö Yehowa ba wanolo ono mbanuania enaʼö tola laheta ira moroi ba gulidanö Zatana ba mangawuli ira khö Yehowa.”​—Hal. 20:35.

18. Hadia zi tola lafaduhusi tödö ira niha si no mamöhöli halöwö ba wamati?

¹⁸ Hewaʼae na no öböhöli halöwö ba wamati, moguna faduhu dödömö wa lö tebulö iʼomasiʼö ndraʼugö Yehowa. Omasi ia na mangawuli ndraʼugö khönia. Tola manö oya wamorege zinangea öfalua enaʼö tola öfuli ndraʼugö khö Yehowa. Hizaʼi, simane ama nitutunö ba gamaedola Yesu, itötöna sibai wangawulimö Yehowa, ba hasambalö itemaʼö ndraʼugö si fao faʼomuso dödö na öfuliʼö khönia.