1. Hadia geluaha wangataʼufi Lowalangi, ba hana wa moguna laʼataʼufi Lowalangi niha sangomasiʼö yaʼia?

LAʼOMASIʼÖ Lowalangi ira niha Keriso, ba laʼataʼufi göi ia. So ösa niha sorasoi wa lö ikhamö fangera-ngerara daʼö. Hizaʼi, faʼataʼu nitutunöda andre, tenga faʼataʼu si hokha mbuda. Na iʼataʼufi Lowalangi si samösa niha, eluahania, sindruhu-ndruhu iʼameʼegö tödö ba ifosumange Lowalangi. Lö omasi ia na tekiko wahuwusania khö Lowalangi, andrö wa iforege enaʼö lö ifalua ngawalö gamuata si tola mangafökhöiʼö dödö Lowalangi.​—Zin. 111:10; Gamd. 8:13.

2. Moloʼö fehede Dawido nisura ba Zinunö 86:11, hadia zi dombua ngawalö nitutunöda?

² Baso Zinunö 86:11. Na tabaso ngawua wehede si so ba ayati daʼö, tola taʼila wa aboto ba dödö Dawido wa moguna sibai wangataʼufi Lowalangi. Datatutunö hewisa lalada ba woloʼö duma-duma Dawido. Si oföna, taʼalui hadia manö mbörö wa no sinangea muʼataʼufi döi Lowalangi. Ba si dua, tatutunö hewisa lalada ba wangoromaʼö wa tafosumange döi Yehowa ba waʼaurida sero maʼökhö.

3. Hadia gangilata nitema Moze, si möi fanolonia irege lö mamalö ifosumange döi Lowalangi?

³ Khalaigö hadia nirasoi Moze me so ia bakha ba dögi narö hili, ba itema gangilata sanandrösa ba lakhömi Yehowa sanörö fönania. Imane buku Pemahaman Alkitab, ”Te daʼa zalua fondrege zahöli-höli dödö nirasoi zi samösa niha, fatua lö tohare Yesu.” Tola manö fehede zi samösa malaʼika nirongo Moze andre, ”Yehowa, Lowalangi sahakhö tödö Yehowa ba si no ebua tödö, ba sebolo tödö ba si no fahöna  faʼoböwö, awö wa lö faröi ia, sebua tödö ba ngahönö ngaʼötö ba sameʼe aefa sala ba olalöwa ba horö.” (2 Moz. 33:17-23; 34:5-7) Na itötöi döi Yehowa Moze, tola manö itörö tödönia gangilata andrö. Daʼö mbörö wa ba gafuriata, ibeʼe wamasugi ba dödö ba nono mbanua Lowalangi, yaʼia daʼö iraono Gizaraʼeli, ba ’wangataʼufi Lowalangi, Yehowa, töi andrö, sebua lakhömi ba sataʼu ita’.​—5 Moz. 28:58.

4. Hadia zinangea taʼangerönusi enaʼö itugu tafosumange döi Yehowa?

⁴ Na taʼogunaʼö döi Yehowa, moguna göi taʼangerönusi hewisa ia zindruhunia. Moguna taʼangeragö sanandrösa ba gamuata Yehowa, simane kuaso, faʼatua-tua, faʼatulö, hegöi faʼomasinia. Na taʼangerönusi fefu daʼö hegöi fefu mbua-buania tanö böʼö, itugu tafosumange Yehowa.​—Zin. 77:12-16.

5-6. (a) Hadia geluaha döi Lowalangi? (b) Moloʼö 2 Moze 3:13, 14 hegöi Yesaya 64:8, hadia zi dombua lala niʼogunaʼö Yehowa ba wamalua ohitö dödönia?

⁵ Hadia zaboto ba dödöda sanandrösa ba döi Lowalangi? Ato niha satua-tua si fao tödö wa eluaha döi Yehowa yaʼia daʼö ”Yaʼia Mbörö Wa Alua”. Eluaha döinia andre zamasugi ba dödöda wa lö hadöi zi tola manaisi Yehowa ba wamalua ohitö dödönia ba tola ifalua fefu zomasi dödönia. Hewisa wamaluania daʼö?

⁶ Si oföna, tola tobali Yehowa gofu hadia manö zomasi ia ba wamalua ohitö dödönia. (Baso 2 Moze 3:13, 14.) Asese ifasugi ba dödöda publikasida enaʼö taʼangerönusi zahöli-höli dödö andrö. Baero daʼö, so göi khö Yehowa waʼabölö ba wangogunaʼö ono mbanuania si lö moʼahonoa, ba wamalua ohitö dödönia. (Baso Yesaya 64:8.) Iʼogunaʼö lala si dombua andre Yehowa enaʼö aʼozu gohitö dödönia. Lö hadöi si tola manaisi Yehowa ba wamalua daʼö.​—Yes. 46:10, 11.

7. Hadia zinangea tafalua enaʼö itugu taʼameʼegö tödö ba tafosumange döi Namada si so ba zorugo?

⁷ Hadia zinangea tafalua enaʼö itugu taʼameʼegö tödö ba tafosumange Namada si so ba zorugo? Moguna taʼangerönusi hadia  manö zi no ifalua khöda ba hewisa wanolonia yaʼita ba wamalua ngawalö halöwö. Duma-dumania, na taʼangerönusi sanandrösa ba gomböila dangania, ahöli-höli sibai dödöda börö me Yehowa zamazökhi fefu hadia ia. (Zin. 8:4, 5) Ba na taʼangeragö hewisa wanolo Yehowa yaʼita ba wamalua ohitö dödönia, itugu tafosumange ia. Sindruhu-ndruhu wa no sinangea mufosumange döi Yehowa! Töinia andrö zangoromaʼö fefu mbua-bua Namada, fefu zi no ifalua, hegöi fefu zedöna ifalua.​—Zin. 89:8, 9.

8. Moloʼö 5 Moze 32:2, 3, hadia nitötöna Yehowa ba ndraono mbanuania?

⁸ Fatua lö möi ndraono Gizaraʼeli ba Danö Amabuʼula, ifahaʼö Moze Yehowa sanandrösa ba ngawua wehede si so ba zi sambua sinunö. (5 Moz. 31:19) Aefa daʼö, moguna ifahaʼö ndraono Gizaraʼeli Moze sanandrösa ba zinunö andrö. (Baso 5 Moze 32:2, 3.) Na taʼangerönusi ayati 2 ba 3, ba daʼö taʼila wa lö omasi Yehowa na labiniʼö döinia. Lö omasi ia na ataʼu niha ba wanötöi töinia börö me lawaʼö tödöra wa no niʼamoniʼö sibai daʼö. Sindruhunia, omasi Yehowa na laʼila fefu niha haniha döinia! Tatu no töi si sökhi ba ndraono Gizaraʼeli börö me ifahaʼö ira Moze sanandrösa khö Yehowa hegöi töi sahöli-höli dödö niʼokhögönia. Fefu nifahaʼö Moze andrö, no tobali fangokafu dödöra, simane faʼatoru deu ba ndruʼu. Hewisa wotatugöida enaʼö möi fangokafu dödö niha böʼö lalada ba wamahaʼö?

9. Hewisa wa tola fao ita ba wangamoniʼö töi Yehowa?

⁹ Ba ginötö manuriaigö ita ba nomo-omo mazui ba nahia sato niha, tola taʼogunaʼö Zura Niʼamoniʼö ba wamatunö ba niha sanandrösa ba döi Lowalangi, yaʼia daʼö Yehowa. Tola tabeʼe khöra publikasi mazui taforomaʼö khöra video hegöi tanö böʼönia si so ba situs webda samolakhömi töi Yehowa. Ba nahiada wohalöwö, ba zekola, mazui ba wofanöda tola manö so ginötö khöda ba wamatunö ba niha böʼö sanandrösa khö Lowalangida sebua faʼomasi ba tafatunö khöra hewisa mbua-buania. Tola tatutunö khöra sanandrösa ba gohitö dödö Lowalangi ba niha hegöi ba gulidanö andre, irege aboto ba dödöra wa iʼomasiʼö sibai ira Lowalangi. Ba ginötö tafatunö ba niha böʼö zindruhu sanandrösa khö Namada safönu faʼomasi, no fao ita ba wangamoniʼö töi Lowalangi. Tatolo niha böʼö enaʼö laʼila wa oya sibai walimosa si no larongo sanandrösa khö Lowalangi. No fangokafu dödöra wamahaʼö Zura Niʼamoniʼö nifatunöda khöra.​—Yes. 65:13, 14.

10. Ba ginötö tafahaʼö niha böʼö, hana wa lö obönö na ha sanandrösa ba huku mazui amakhoita Lowalangi nifahaʼöda khöra?

¹⁰ Ba ginötö tadöniaʼö wamahaʼö ba Zura Niʼamoniʼö, omasi ita tatolo niha nifahaʼöda enaʼö aboto ba dödönia döi Yehowa ba iʼogunaʼö döi daʼö. Baero daʼö, omasi göi tatolo ira enaʼö laʼila hewisa zindruhunia Yehowa andrö. Hadia mofozu ita ba wamalua daʼö na ha sanandrösa ba huku hegöi amakhoita Lowalangi nifahaʼöda khöra? Tola manö aboto ba dödö niha nifahaʼöda ba Zura Niʼamoniʼö sanandrösa ba huku Lowalangi, ba iwaʼö tödönia wa sökhi sibai huku andrö. Hizaʼi, hadia terou dödönia ba woloʼö niwaʼö Yehowa börö waʼomasinia khö Lowalangi? Törö tödömö wa laʼila göi huku Lowalangi ira Adamo ba Khawa, hizaʼi tenga soroi ba dödöra ba wangomasiʼö Yehowa, sameʼe huku andrö. (1 Moz. 3:1-6) Andrö, lö obönö na ha sanandrösa ba huku mazui amakhoita Lowalangi nifahaʼöda ba niha böʼö.

11. Ba ginötö tafahaʼö huku hegöi amakhoita Lowalangi ba niha nifahaʼöda, hewisa wanoloda yaʼia enaʼö itugu iʼomasiʼö Yehowa?

¹¹ Sindruhu-ndruhu wa moguna sibai  khöda huku hegöi amakhoita Yehowa. (Zin. 119:97, 111, 112) Hizaʼi, enaʼö iʼila daʼö niha nifahaʼöda, moguna aboto ba dödönia wa ifazökhi fefu gamakhoita andrö Yehowa börö me iʼomasiʼö ita. Börö daʼö, tola tasofu khönia, ”Moloʼö yaʼugö hana wa ibeʼe gamakhoita andre Lowalangi? Ba daʼa, hadia wamahaʼö si tola tahalö sanandrösa ba gamuata Lowalangi?” Na tatolo niha nifahaʼöda ba Zura Niʼamoniʼö enaʼö laʼangerönusi sanandrösa khö Yehowa ba laʼomasiʼö döi Lowalangi, itugu alio tofakha ba dödöra wamahaʼö nifaʼemada. Tenga ha huku nibeʼe Lowalangi niʼosinangegö niha nifahaʼöda hizaʼi iʼomasiʼö göi Yehowa, sameʼe fefu huku andrö. (Zin. 119:68) Itugu tedou wamatira, ba itugu tefaʼanö ira ba wanaögö fanandraigö si no amaedola galitö.​—1 Kor. 3:12-15.

12. Hadia mbörö wa mamodombua dödö Dawido, ba hadia lua-luania?

¹² Moguna sibai göi wehede tanö böʼö nisura Dawido ba Zinunö 86:11, imane, ”Osambalöʼö dödögu.” Sagötö faʼaurinia, aboto ba dödö Dawido wa alio sibai mamodombua dödö niha. Samuza inötö, me mozizio Dawido yawa ba dete nomo, iʼila samösa ndra alawe si mondri. No mangowalu ndra alawe sotöi Baseba andrö. Hewisa dödö Dawido ba ginötö daʼö? Aboto ba dödö Dawido wa no ibeʼe gamakhoita Yehowa ba nono mbanuania, ”Böi isö woʼomo nawöu.” (2 Moz. 20:17) Hizaʼi, lö iböhöli Dawido ba wamaigi-maigi ira alawe andrö. Omasi ia ba wangomusoiʼö dödö Yehowa, hizaʼi iʼisö göi ndra alawe andrö. No mamodombua dödönia. Hewaʼae na iʼomasiʼö ba iʼataʼufi Yehowa ba zi sandrohu faʼaurinia, hizaʼi ba ginötö daʼö, so ösa gamuata fondrege zi lö sökhi nifalua Dawido. Börö horönia andrö, no iʼobousi döi Yehowa. No göi ifakao waʼauri niha si lö fasala, simane ösi nomonia.​—2 Zam. 11:1-5, 14-17; 12:7-12.

13. Hezo tola taʼila wa lö saʼae mamodombua dödö Dawido?

¹³ Itema Dawido wotu moroi khö Yehowa, ba ifuli iʼokhögö wahuwusa si sökhi khö Lowalangi. (2 Zam. 12:13; Zin. 51:4-6, 19) Tatu itörö tödö Dawido fefu wamakao hegöi abula dödö niʼasogönia börö me no mamodombua dödönia. Fehede Dawido ba Zinunö 86:11, tola mufoʼeluaha ia tobali: ”Beʼe khögu dödö si lö mamodombua.” Hadia itolo Dawido Yehowa ba wangosambalöʼö tödönia, mazui enaʼö lö mamodombua dödönia? Tatu manö. Ba gafuriata, itutunö Sura Niʼamoniʼö wa ”adölö dödönia khö Lowalanginia, Yehowa”.​—1 Raz. 11:4; 15:3.

14. Hadia wanofu sinangea taʼangerönusi, ba hadia mbörö?

 ¹⁴ Tola tobali famarou dödöda duma-duma salua khö Dawido andre. Hizaʼi, no sambua famangelama göi daʼa ba ndraono mbanua Lowalangi iadaʼa. Lö omasi ita tafalua zala simane nifaluania. Hewaʼae na no ara tafosumange Yehowa mazui löʼö, moguna taʼangerönusi wanofu andre: ’Hadia no uforege ba wolawa Satana enaʼö lö mamodombua dödögu?’

15. Na taʼila gambara si tola mondrönisi tödöda ba woʼangeragö amuata fohorö, hewisa wa tola möi folumöʼöda wangataʼufi Lowalangi?

¹⁵ Duma-dumania, hadia nifaluamö na öʼila gambara ba TV mazui ba Internet sondrönisi tödömö ba woʼangeragö amuata fohorö? Tola manö öwaʼö tödömö wa tenga pornografi daʼö. Hizaʼi, tola iʼogunaʼö daʼö Satana enaʼö mamodombua dödömö. (2 Kor. 2:11) Gambara andrö hulö simane fato niʼogunaʼö ba wanila eu sesolo. Na awena sakali muhawiagö wato, lö iʼanemaiʼö asila geu andrö. Hizaʼi, na no hauga kali muhawiagö ia, hasambalö asila geu andrö ba gafuriata. Simane daʼö göi, na tafaigi gambara sondrönisi tödöda ba woʼangeragö ngawalö zoʼamakhaita ba wohorö, te lö iʼanemaiʼö oroma hadia lua-luania. Hizaʼi ba gafuriata, tola mamodombua dödöda irege tafalua horö ba faröi ita khö Yehowa. Börö daʼö, böi tehegö tefaʼamöi ba dödömö ngawalö zi lö tefaudu! Böi tebulö osambalöʼö dödömö ba wangataʼufi töi Yehowa!

16. Na so zondrönisi tödöda ba wamalua amuata si fasala, hadia manö wanofu-nofu sinangea taʼangerönusi?

¹⁶ Tenga ha gambara niʼogunaʼö Zatana ba wondrönisi tödöda enaʼö taʼangeragö gamuata fohorö. Oya nasa danö böʼö niʼogunaʼönia ba wondrönisi tödöda. Hadia zinangea tafalua? Tola manö tawaʼö tödöda wa lö fasala sibai daʼö. Duma-dumania, tola manö taʼangeragö zimane daʼa: ’Lö salania  na ufalua daʼa. Lö saʼatö iʼanemaiʼö laʼefasi ndraʼo.’ Lala wangera-ngera si fasala daʼö. Hizaʼi si sökhinia, moguna taʼangeragö wanofu-nofu daʼa: ’Hadia iʼogunaʼö daʼa Satana enaʼö mamodombua dödögu? Na uʼoʼö gisö-isö dödögu si fasala, hadia tola teʼobousi döi Yehowa börö nifaluagu andrö? Na ufalua daʼa, hadia itugu ahatö ndraʼo khö Lowalangi mazui tekiko wahuwusagu khönia?’ Angerönusi wanofu-nofu andrö. Andrö waʼatua-tua ba wangandrö enaʼö tola ötörö zindruhu ba wameʼe fanema li. (Yak. 1:5) Daʼö zolumöʼö yaʼugö moroi ba wondrönisi dödö nibeʼe Zatana. Itugu aoha khöu ba wanimbagö fondrönisi dödö si fao faʼabarani, simane me itimbagö Yesu wondrönisi dödö moroi khö Zatana, me imane, ”Betaʼögö Satana!”​—Mat. 4:10.

17. Hana wa lö sökhi lua-luania na mamodombua dödöda? Beʼe duma-duma.

¹⁷ Lö sökhi lua-luania na mamodombua dödöda. Khalaigö atö zi sambua tim sepak bola si lö fahasara dödö. So ba gotaluara zomasi-masi nisuno, so zi lö moloʼö goi-goi si no mufakhoi, ba so göi zolawa pelatih. Na simane daʼö ira, tatu tebai möna ira ba watandrisa. Hizaʼi, na so khöra wahasara dödö, tola itugu aoha khöra ba wokalaisi lawara. Hulö simane tim si so fahasara dödö ndraʼugö na öʼosambalöʼö gera-eramö hegöi tödömö ba wamosumange Yehowa. Törö tödömö wa omasi Zatana na mamodombua dödömö. Omasi ia na öʼangeragö ba öʼokhögö gisö-isö dödö si fasala, hewaʼae na öʼila wa lö omasi Yehowa na öfalua daʼö. Hizaʼi, böi tehegö mofozu Zatana irege mamodombua dödömö! Na omasiʼö öfosumange Yehowa, moguna öfalua daʼö soroi ba dödö.​—Mat. 22:36-38

18. Simane nitutunö ba Mikha 4:5, hadia gangetula nihalömö?

¹⁸ Simane Dawido, angandrö khö Yehowa, ”Osambalöʼö dödögu ba wangataʼufi töimö andrö.” Forege ba wamalua hadia zi no ötutunö ba wangandrömö. Ero maʼökhö, foromaʼö ba gangetula nihalömö, sebua mazui side-ide, wa öfosumange döi Yehowa niʼamoniʼö. Na öfalua daʼö, tola öfolakhömi döi Yehowa. (Gamd. 27:11) Ba tola göi tawaʼö wehede niwaʼö zamaʼeleʼö sotöi Mikha, ”No töi Lowalangida Yehowa, ba wanöröda lalada, götö-götö waʼara!”​—Mi. 4:5.