1. Hana wa ifagölösi ia Yehowa khö zi samösa ina?

ME GÖTÖ Yesaya, no irai manofu Yehowa ba nono mbanuania, ”Hadia, olifu maö ndra alawe nononia ba mbagi zusu?” Aefa daʼö imane Yehowa, ”Ba he meziwa olifu ira, ba löʼö zui olifu ndraʼo ndraʼugö.” (Yes. 49:15) Si toʼölönia, lö ifagölösi ia Yehowa khö zi samösa ina. Hizaʼi, daʼö nifaluania ba ginötö daʼö. Iforomaʼö Yehowa wa iʼomasiʼö sibai nono mbanuania, simane samösa ina zangomasiʼö ononia. Ato nina si fao tödö ba wehede nifaʼema dalifusöda Jasmin, me imane, ”Me irorogö nononia si samösa ina, tumbu ba gotaluara zinali waʼomasi si lö taya sandrohu faʼaurira.”

2. Hewisa dödö Yehowa na so ndraononia sangaröuʼö yaʼira khönia?

² Iʼila Yehowa na so nononia si no mamöhöli weʼamöi manuriaigö ba si lö omasi fariawö ba mbanua niha Keriso. Andrö, tatu abu sibai dödönia me iʼila wa so ngahönö niha samöhöli halöwö ba wamati * ero röfi.

3. Hadia zomasi Yehowa?

³ Ato ba gotalua ndra talifusöda si no mamöhöli halöwö ba wamati sangawuli ba mbanua niha Keriso. Omuso sibai dödöda ba wanemaʼö yaʼira! Omasi Yehowa na mangawuli ira, ba simane daʼö göi nirasoida. (1 Fet. 2:25) Hadia zi tola tafalua ba wanolo yaʼira enaʼö tola lafuli ira ba mbanua niha Keriso? Fatua lö tabeʼe wanema li ba wanofu andrö, moguna ua aboto ba dödöda hadia mbörö wa so ösa niha samöhöli weʼamöi ba gangowuloa hegöi ba wamalua halöwö fanuriaigö.

4. Hadia zalua khö ndra talifusöda börö me halöwöra zabölö laʼofönaiʼö ba waʼaurira?

⁴ So ösa niha samöhöli halöwö ba wamati börö me halöwöra  zabölö laʼofönaiʼö ba waʼaurira. Imane samösa dalifusöda ira matua sotöi Hung * si toröi ba Asia Tenggara, ”Oya sibai ginötö hegöi faʼabölögu sahori ba wohalöwö. Me föna, uwaʼö tödögu wa itugu mofozu ndraʼo ba wamosumange Yehowa na oya gefegu. Börö daʼö, udouʼö waʼoya ginötö niʼogunaʼögu ba wohalöwö. Lua-luania, asese lö möido ba gangowuloa, ba ba gafuriata, uböhöli weʼamöi ba gangowuloa. Te no iʼogunaʼö gulidanö andre Satana enaʼö mangoloi dödö niha ba lö saʼae lafosumange Yehowa.”

5. Hadia zalua khö zi samösa dalifusöda ira alawe, ba hadia lua-luania?

⁵ So ösa ndra talifusöda zanaögö abula dödö irege tefakao wangera-ngerara. Nehegö duma-duma salua khö dalifusöda ira alawe sotöi Anne si toröi ba Inggris. So dalima ndraononia. Imane, ”No cacat nonogu siakhi iʼotarai me tumbu. Ba gafuriata, muʼefasi moroi ba mbanua niha Keriso nonogu alawe numero tölu, ba so samösa nonogu matua si göna fökhö wangera-ngera. Börö me abu sibai dödögu, uböhöli weʼamöi ba gangowuloa hegöi ba wamalua fanuriaigö. Ba gafuriata, uböhöli wamalua halöwö ba wamati.” Tatu fao ita ba waʼabu dödö me tarongo zalua khö Anne hegöi ösi nomonia, ba hegöi khö ndra talifusöda tanö böʼö si göna abula dödö simane daʼö!

6. Hana wa tola iʼaröuʼö ia si samösa niha moroi ba nono mbanua Yehowa, na lö ifalua mene-mene si so ba Kolose 3:13?

⁶ Baso Kolose 3:13. So ösa nono mbanua Yehowa si tetutu tödö khö ndra talifusöra ba wamati. Iwaʼö sinenge sotöi Faulo wa itaria ’so mbörö waʼabao dödöda’ khö ndra talifusöda. Tola manö göi lafalua khöda zi lö atulö. Hizaʼi, na lö mangelama ita, tola tatanögö ba dödöda waʼabao dödö, irege taʼaröuʼö ita ba nono mbanua Yehowa. Nehegö duma-duma salua khö dalifusöda ira matua sotöi Pablo, si toröi ba Amerika Selatan. Lafobahulu ia wa no ifalua gamuata si fasala, ba laheta khönia halöwö ba mbanua niha Keriso. Hadia nifalua Pablo? Imane, ”Mofönu sibai ndraʼo, ba itugu ara itugu uʼaröuʼö ndraʼo ba mbanua niha Keriso.”

7. Hadia zalua na lö aetu-aetu itegu ia tödönia si samösa niha börö zala si no irai ifalua?

⁷ Na no irai ifalua horö si samösa niha, tola manö lö aetu-aetu itegu ia tödönia hewaʼae na no ara ifalua daʼö. Tola manö irasoi wa tebai saʼae iʼomasiʼö ia Yehowa. Hewaʼae na no ifalalini gera-erania, te so ba dödönia wa tenga sinangea farahu ia ba nono mbanua Lowalangi. Daʼö nirasoi dalifusöda ira matua sotöi Francisco. Imane, ”No irai gönado degu-tegu sabeʼe börö me no ufalua gamuata wohorö. Ba wamobörö, lö uböhöli weʼamöi ba gangowuloa, hizaʼi ba gafuriata, so khögu waʼabu dödö ba urasoi wa tenga sinangea na fao ndraʼo khö ndra talifusöda ba wamosumange Yehowa. Itegu-tegu manö ndraʼo tödögu, ba so ba gera-eragu wa lö nasa muʼefaʼö Yehowa zalagu. Ba gafuriata, lö saʼae möi ndraʼo ba gangowuloa hegöi ba wanuriaigö.” Na so ösa ndra talifusöda niʼilamö sangokhögö abula dödö simane si no tatutunö, hewisa dödömö khöra? Hadia fao ndraʼugö ba waʼabu dödö me no öʼila zalua khöra? Ba sabölö moguna, hewisa dödö Yehowa khöra?

8. Hadia iʼolifugö niha si no irai mamosumange yaʼia Yehowa? Tutunö.

⁸ Lö irai iʼolifugö niha si no irai mamosumange yaʼia Yehowa, hewaʼae na ba gafuriata, laböhöli wamalua halöwö ba wamati. Lö göi irai iʼolifugö halöwö ba wamati si no lafalua. (Heb. 6:10) Ibeʼe sambua duma-duma si tofakha ba dödöda sinenge  sotöi Yesaya, ba wangoromaʼö hewisa lala Yehowa ba wondrorogö ono mbanuania. Imane Yesaya, ’Ikubaloi rorogöfönia, simane kubalo; ihagi nono mbiri-biri andrö, iʼohe ba dötöʼania.’ (Yes. 40:11) Börö me Kubalo Sebua ia, hewisa dödö Yehowa na so nono mbiri-birinia si no elungu? Tola taʼila wanema linia ba wehede Yesu khö ndra nifahaʼönia, me imane, ”Hewisa moloʼö yaʼami? Na so zokhö biri-biri si 100 ngaʼeu ba sageu zelungu, hadia lö iröi zi 99 ngaʼeu ba hili ba wangalui si sageu si no elungu andrö? Ba na no isöndra, abölö omuso dödönia wamaigi si sageu andrö moroi ba mbiri-biri si 99 ngaʼeu si lö elungu.”​—Mat. 18:12, 13.

9. Hewisa gubalo si sökhi ba wondrorogö biri-birinia? (Faigi gambara ba guli majalah.)

⁹ Hana wa ifagölösi ia Yehowa khö zi samösa kubalo? Börö me hasambalö iʼameʼegö tödö sibai mbiri-birinia si samösa kubalo si sökhi. Duma-dumania, barani Dawido ba wolawa singo hegöi berua ba wolumöʼö mbiri-birinia. (1 Zam. 17:34, 35) Hasambalö iʼila kubalo si sökhi na so mbiri-birinia si taya. (Yoh. 10:3, 14) Na alua daʼö, hasambalö iröi ba gandra mbiri-birinia tanö böʼö, mazui iʼandrö khö gubalo tanö böʼö ba wozago yaʼira, aefa daʼö möi ia iʼalui mbiri-birinia si no taya andrö. Ibeʼe duma-duma Yesu sanandrösa ba mbiri-biri si no taya, enaʼö aboto ba dödöda zindruhu andre, ”Namagu si so ba zorugo, lö omasi ia na tekiko fazamösa niha simane ono side-ide andre.”​—Mat. 18:14.

10. Moloʼö Hezekieli 34:11-16, hadia nifalua Yehowa ba mbiri-birinia si no taya?

¹⁰ Iʼomasiʼö fefu nono mbanuania Yehowa, tefarahu ba daʼö ’nono side-ide’ si no elungu. Iʼogunaʼö zamaʼeleʼö sotöi Hezekieli Yehowa ba wamaʼema buʼusa linia wa hasambalö iʼalui mbiri-birinia si no taya ba itolo ira enaʼö tola ifuli laʼokhögö wahuwusa si sökhi khönia. Itutunö göi hadia manö nifaluania ba wangorifi yaʼira, ba tefaudu sibai daʼö ba nifalua zi samösa kubalo na so mbiri-birinia si no taya. (Baso Hezekieli 34:11-16.) Si oföna, iʼalui mbiri-birinia si no  taya andrö. Te oya ginötö hegöi faʼabölö niʼogunaʼönia ba wamalua daʼö. Aefa daʼö, na no isöndra mbiri-biri si no taya andrö, iʼohe ia mangawuli ba ngawawania. Te lö faʼabölö khö mbiri-biri andrö börö me no mesokho mazui olofo. Si fao faʼasökhi, ibukusi zokhonia andrö kubalo, iluʼi, ba ibeʼe gö. Ira satua sokubaloi, no kubalo ”mbiri-biri Lowalangi”. (1 Fet. 5:2, 3) Daʼö mbörö wa moguna lafalua halöwö simane nifalua zi samösa kubalo, na so niha sangaröuʼö yaʼia moroi ba mbanua niha Keriso. Moguna laʼalui niha andrö, latolo ia enaʼö mangawuli ba ngawawa, ba si fao faʼomasi latolo ia enaʼö ifuli fahuwu khö Yehowa. *

11. Hadia zaboto ba dödö gubalo si sökhi?

¹¹ Kubalo si sökhi, aboto ba dödönia wa itaria tola elungu zi sageu mbiri-biri. Börö daʼö, lö ifalua zi lö sökhi ba mbiri-biri sangaröuʼö yaʼia moroi ba ngawawa. Ba götö Zura Niʼamoniʼö, so ösa nono mbanua Yehowa si no irai mangaröuʼö yaʼira khönia. Datatutunö hadia wamahaʼö si tola tahalö moroi ba lala nifalua Yehowa ba wanolo yaʼira.

12. Hadia nifalua Yehowa khö Yona?

¹² Me ifaretakö Yona Yehowa ba weʼamöi ba Niniwe, lö iʼoʼö daʼö Yona. Hewaʼae simanö, lö iʼanemaiʼö itimbagö Yona Yehowa. Simane samösa kubalo si sökhi, iʼorifi Yona Yehowa ba itolo ia ba wamalua halöwö nibeʼe khönia. (Yo. 2:7; 3:1, 2) Ba gafuriata, iʼogunaʼö zinanö labu Yehowa ba wanolo Yona enaʼö aboto ba dödönia wa no sebua böli waʼauri niha. (Yo. 4:10, 11) Hadia wamahaʼönia khöda? Moguna lö alio awuwu zatua sokubaloi ba wanolo niha si no mamöhöli halöwö ba wamati. Hizaʼi, moguna laforege enaʼö aboto ba dödöra hadia mbörö wa iʼaröuʼö ia si samösa niha moroi ba ngawawa. Ba na no mangawuli niha daʼö khö Yehowa, lö laböhöli ira satua sokubaloi ba wangomasiʼö hegöi ba woʼameʼegö tödö yaʼia.

13. Hadia wamahaʼö si tola tahalö moroi ba nifalua Yehowa khö zanura Sinunö 73?

¹³ Me iʼila wa hulö lö abula dödö ba  waʼauri niha si lö sökhi, irasoi waʼide-ide dödö sanura Zinunö 73. Ibörötaigö aombö dödönia, hadia sindruhu-ndruhu so gunania na ifosumange Yehowa. (Zin. 73:12, 13, 16) Hadia nifalua Yehowa? Lö iʼanemaiʼö mofönu ia khö ndra matua andrö. Baero daʼö, musura wehede ndra matua andrö ba Zura Niʼamoniʼö. Ba gafuriata, aboto ba dödö zanura sinunö andrö wa fahuwusa khö Yehowa zabölö ebua böli moroi ba ngawalö hadia ia. (Zin. 73:23, 24, 26, 28) Hadia wamahaʼönia khöda? Na ibörögö aombö dödö zi samösa niha wa so gunania na ifosumange Yehowa, moguna lö laʼanemaiʼö lahuku ia ira satua sokubaloi ba labeʼe khönia degu-tegu. Hizaʼi, moguna laforege enaʼö aboto ba dödöra hadia mbörö wa so waʼaombö dödö ba niha daʼö. Aefa daʼö, awena tola laʼogunaʼö ayati Zura Niʼamoniʼö ira satua sokubaloi ba wangabölöʼö yaʼia.

14. Hana wa moguna mutolo Elia, ba hewisa lala Yehowa ba wanolo yaʼia?

¹⁴ No irai moloi zamaʼeleʼö sotöi Elia börö me igohi ia Ratu Izebela. (1 Raz. 19:1-3) Iwalinga hatö yaʼia zamaʼeleʼö si toröi, ba hulö lö eluaha halöwö si no irai ifalua ba zilalö. Abu sibai dödönia irege omasi ia mate. (1 Raz. 19:4, 10) Hewaʼae simanö, lö mofönu khönia Yehowa. Hizaʼi, iʼaroʼö dödö Elia wa hasambalö so zi fao khönia. Iʼaroʼö göi dödö Elia Yehowa wa tola iʼodaligö waʼabölö Lowalangi ba oya nasa halöwö sinangea ifalua. Me itutunö nösi dödönia Elia, ifondrondrongo ia Yehowa si fao faʼasökhi dödö. Aefa daʼö, ibeʼe khönia Yehowa ngawalö halöwö si bohou. (1 Raz. 19:11-16, 18)  Hadia wamahaʼönia khöda? Fefu ita, mendrua manö ndra satua sokubaloi, moguna taforomaʼö waʼasökhi dödö ba nono mbanua Lowalangi. Niha samöhöli halöwö ba wamati, tola manö itutunö khö ndra satua sokubaloi wa so zabao dödönia. Mazui, iwaʼö wa tenga sinangea itema wangefa sala moroi khö Yehowa. Gofu hadia ia niwaʼönia, moguna lahaogö lafondrondrongo ia ira satua sokubaloi. Aefa daʼö, laforege ba wangaroʼö tödö mbiri-biri si taya andrö wa iʼomasiʼö ia Yehowa.

15. Moloʼö Yohane 6:39, hewisa dödö Yesu ba mbiri-biri Namania?

¹⁵ Hewisa zinangeania ita ba mbiri-biri Lowalangi si no taya? No ibeʼe khöda duma-duma si sökhi Yesu sanandrösa ba daʼö. Aboto ba dödönia wa no sebua böli ba wamaigi Yehowa fefu mbiri-birinia, daʼö mbörö wa iforege ba wanolo ’ndraono Gizaraʼeli si hulö mbiri-biri selungu’ enaʼö lafuli ira khö Yehowa. (Mat. 15:24; Luk. 19:9, 10) Börö me kubalo si sökhi ia, iforege göi Yesu enaʼö lö hadöi si taya ba gotalua mbiri-biri Yehowa.​—Baso Yohane 6:39.

16-17. Hewisa zinangeania ndra satua sokubaloi ba niha si no mamohöli halöwö ba wamati? (Faigi kotak “ Nirasoi Mbiri-biri si No Taya”.)

¹⁶ Iʼandrö Faulo khö ndra satua sokubaloi ba mbanua niha Keriso si so ba Efeso enaʼö laʼoʼö duma-duma Yesu. Imane, ”Mitolo zambö faʼabölö, ba böi olifu ami wehede Zoʼaya Yesu me iwaʼö, ’Ohahau dödö ba wameʼe moroi ba wanema.’” (Hal. 20:17, 35) Ayati daʼa zangoromaʼö wa laʼokhögö noro dödö si tohude ira satua sokubaloi ba wondrorogö iraono mbanua Yehowa. Imane samösa satua sokubaloi sotöi Salvador si toröi ba Spanyol, ”Börö me kubalo ba wamati ndraʼo, faduhu dödögu wa omasi Yehowa na urorogö mbiri-birinia.”

¹⁷ Fefu niha si no mututunö ba artikel andre, no latema wanolo irege tola lafuli ira khö Yehowa. Iadaʼa, ato göi ndra talifusöda si no mamöhöli halöwö ba wamati somasi mamalua daʼö. Ba artikel aefa daʼa, tatohugö ba wanutunö hewisa lalada ba wanolo yaʼira enaʼö mangawuli khö Yehowa.