Tobali duma-duma zatua ba ndraonora na lafalua hadia nifahaʼöra. Duma-dumania, öfahaʼö ndraonou enaʼö lö falimo ira. Hizaʼi, hewisa na so niha si tohare ba nomou ba ömane ba ndraonou, ”Waʼö manö lö hadöi bapagu ba nomo”. Na alua zimane daʼö, tatu abua khönia ba wanörö sindruhu.

”Lö manötöna zatua ba ndraono ba wamalua hadia niwaʼöra na yaʼira samösa lö lafalua zimane daʼö. Simane busa sanisiö idanö simanö göi ndraono, lagoʼö fefu hadia niwaʼö hegöi nifalua zatuara. Ba fabuʼa ira na laʼila faböʼö nifaluada moroi ba nifahaʼöda.”—David.

NIWAʼÖ ZURA NIʼAMONIʼÖ: ”Miwaʼö, ’Böi anagö,’ hizaʼi hana wa managö ami?”—Roma 2:21.

Fehede hegöi nifalua zatua ebua sibai lua-luania ba ndraono moroi ba wondrönisi dödö nifalua ndra awöra. Eluahania, satua zabölö tefaudu ba wamahaʼö iraonora. Börö daʼö moguna khö zatua ba wamalua hadia zi no lafahaʼö.

”Hewaʼae no ngaotu kali muwaʼö ba ndraono, lö taʼila hadia lafondrondrongo mazui löʼö. Hizaʼi, ba ginötö lö tafalua hadia zi no tawaʼö, iʼanemaiʼö laʼila daʼö. He taʼila he löʼö, asese lanehegö iraono hadia nifaluada.”—Nicole.

NIWAʼÖ ZURA NIʼAMONIʼÖ: ”Faʼatua-tua si otarai moroi yawa . . . lö mamini tödö.”—Yakobo 3:17.

Sofu khöu samösa. Hadia film sasese öfaigi? Hewisa wehedeu hegöi amuatamö khö ngambatöu hegöi iraonomö? Hewisa niha si fariawö khöu? Hadia öʼameʼegö tödö niha böʼö? Rahu-rahunia, na öʼandrö ba ndraonomö ba wamalua hadia ia, hadia no oföna öfalua zimane daʼö?

”Yaʼo hegöi foʼomogu lö maʼoʼou ndraonoma ba woloʼö amakhoita si no mafazökhi na lö oföna mafalua ia.”—Christine.

Andrö waʼebolo dödö na no öfalua zala. Aboto ba dödö ndraonou wa lö moʼahonoa ndraʼugö. Na lö aila ndraʼugö ba wangandrö faʼebolo dödö khö ngambatöu hegöi khö ndraonomö me öfalua zala, no öfahaʼö ndraonomö andrö enaʼö lö aetu latörö zindruhu hegöi ba wangokhögö fangide-ngideʼö.

”Moguna laʼila iraono na tawaʼö fasala ita ba taʼandrö waʼebolo dödö. Na lö tafalua daʼö, lö tefahaʼö ira ba wamatunö na so zala nifaluara.”—Robin.