KHÖ ZATUA
7: Fahaʼö Ira ba Gamuata si Sökhi
HADIA GELUAHANIA
Yaʼami ira satua, tatu no miʼokhögö goi-goi sanandrösa ba waʼauri. Duma-dumania, hadia no miforege enaʼö lö tebulö mitörö zindruhu? Tatu omasi göi ndraʼugö na iʼokhögö goi-goi simane daʼö iraonomö.
Omasi göi ndraʼugö ba wamahaʼö iraonomö enaʼö so khöra waʼowölö-ölö, lö ebua dödö zambuana, ba laʼameʼegö tödö niha böʼö. Sökhi na iʼotarai ba waʼiraono lafahaʼö ira sanandrösa ba gamuata andrö.
NIWAʼÖ ZURA NIʼAMONIʼÖ: ”Fahaʼö nonou ba lala satulö, na atua ia dania ba lö iböhöli wamalua daʼö.”—Amaedola 22:6.
HANA WA MOGUNA DAʼÖ
Ba götö teknologi andre moguna lafahaʼö ndraono ba gamuata si sökhi. Imane si samösa ina sotöi Karyn, ”Gofu hawaʼara manö tola tesöndra wondrönisi dödö si lö baga ba ngawalö fakake elektronik. Tola manö ba ngaima modadao ndraonoma, hizaʼi lafaigi-faigi gambara si lö baga!”
NIWAʼÖ ZURA NIʼAMONIʼÖ: ”Niha si no aro faʼaboto ba dödö . . . no toʼölö mangogunaʼö fangera-ngerania irege tefomaha ba wamaehusi satulö ba si lö atulö.”—Heberaiʼo 5:14.
Moguna muʼangeragö niha böʼö. Farahu ba daʼö wangogunaʼö fehede si no öna-öna (simane na muwaʼö ”tolo” ba ”saohagölö”). Iadaʼa ato niha si lö moʼangeragö niha böʼö börö me arörö ira ba perangkat elektronik.
NIWAʼÖ ZURA NIʼAMONIʼÖ: ”Hadia zomasi ami lafalua khömi niha böʼö, daʼö göi mifalua khöra.”—Luka 6:31.
SI TOLA ÖFALUA
Fahaʼö ndraonomö ba gamuata si sökhi. Duma-dumania, moloʼö ira peneliti wa tola latimbagö gamuata wohorö iraono si bohou ebua, na no tohöna zatua ba wamahaʼö iraonora wa fasala gamuata daʼö.
TIPS: Ogunaʼö duria si bohou ba wamörögö fahuhuosa ba ndraonou sanandrösa ba mbua-bua si sökhi. Duma-dumania, na so duria sanandrösa ba wamunusa, tola ömane khönia, ”Hana wa so niha zamalua simane daʼö? Moloʼö yaʼugö hana wa tola ifalua daʼö?”
”Abua ba ndraono ba wotatugöi hezo zatulö hegöi si fasala na lö irai lafatunö khöra.”—Brandon.
Fahaʼö ndraonomö ba wangoromaʼö amuata si sökhi. Tola mufahaʼö ndraono side-ide ba wangumaʼö ”tolo”, ”saohagölö”, hegöi ba woʼangeragö niha böʼö. Imane buku Parenting Without Borders, ”Na aboto ba dödö ndraono wa so zi tobali noro dödöra ba nösi nomo, ba zekola, hegöi ba zi fasuira, tola manö lafalua zi sökhi soguna ba niha böʼö tenga ha ba zoguna khöra samösa.”
TIPS: Beʼe ba ndraonou halöwö yomo ba nomo enaʼö aboto ba dödöra wa moguna wamalua halöwö soguna ba niha böʼö.
”Na no toʼölö ndraono ba wamalua halöwö yomo ba nomo, lö saʼae tokea ira dania na samuza inötö tenga ba ngai zatuara toröi ira, börö me no toʼölö ira wamalua halöwö daʼö.”—Tara.
