KHÖ ZATUA
5: Fahuhuosa
HADIA GELUAHANIA
Na faoma lafaehagö nösi dödöra ira satua hegöi iraono, eluahania sökhi wahuhuosa ba gotaluara.
HANA WA MOGUNA DAʼÖ
Abua sibai na fahuhuo ba ndraono si bohou ebua. Me iraono ira, omasi sibai ira fahuhuo. Hizaʼi me no ebua-bua ira, ha fataria fahuhuo ira irege abua khöu ba wangiʼila hadia niʼera-erara hegöi nirasoira. Hewaʼae ba wamaigiu lö omasi ira fahuhuo khöu, sindruhunia sa omasi ira fahuhuo.
SI TOLA ÖFALUA
Fahuhuo ba ndraonomö ba ginötö somasi ira. Tola manö awena omasi ira fahuhuo ba zi talu mbongi.
”Te omasi tamane wangumaʼö, ’Hana wa awena ötutunö iadaʼa? Mamaʼökhö fao ita!’ Na omasi fahuhuo ndraonoda khöda, no si sökhi sibai daʼö. Latötöna ira satua ba ndraonora enaʼö lö labiniʼö nösi dödöra.”—Lisa.
”Lö omasido na alawa mbongi wemörögu. Hizaʼi, urasoi wa abölö omasi latutunö nösi dödöra iraonogu na no talu mbongi.”—Herbert.
NIWAʼÖ ZURA NIʼAMONIʼÖ: ”Böi ha soguna khönia iʼangeragö zamösana, hizaʼi soguna ba niha böʼö.”—1 Korindro 10:24.
Böi mangoloi dödöu. Imane si samösa ama, ”Itaria ba ginötö fahuhuo ndraonogu, ba danö böʼö so wangera-ngeragu ba laʼanemaiʼö laʼila daʼö!”
Hadia no irai alua khöu zimane daʼö? Ba ginötö fahuhuo ndraʼugö ba ndraonou, bunu TV ba böi röröʼö ba HP-mö. Haogö fondrondrongo niwaʼönia ba böi osiwawöi hadia nidunö-dunönia, hewaʼae ba wamaigiu si lö eluaha nidunö-dunönia andrö.
”Moguna tafaduhuʼö ba dödö ndraonoda wa taʼameʼegö tödö nirasoira. Na lö tafalua daʼö, tola manö labiniʼö nösi dödöra mazui laʼandrö wanolo ba niha böʼö.”—Maranda.
”Böi talafo abeʼe ita hewaʼae lö tefaudu lala wangera-ngera ndraonoda.”—Anthony.
NIWAʼÖ ZURA NIʼAMONIʼÖ: ”Mifaigi hewisa lala wamondrongomi.”—Luka 8:18.
Böi tatugöi ginötö hegöi lala ba wamalua fahuhuosa. Itaria abölö aoha ba ndraono ba wamaehagö ösi dödöra na lö fatahö wedadaora khö zatuara.
”Maʼogunaʼö ginötö ba wahuhuosa na so ndraʼaga yawa ba moto. Börö me modadao ia ba ngaigu tenga fönagu, abölö aoha khönia ba wahuhuosa.”—Nicole.
Tola göi öʼogunaʼö ginötö wemanga ba wahuhuosa ba ndraonou.
”Ba ginötö manga ndraʼaga ba zi bongi, faoma madunö-dunö hadia zalua ba zi maʼökhö daʼö, he si lö baga hegöi sangaʼasogö faʼomuso dödö. Itugu aro wahuwusama ba maʼila hadia zinangea mafalua na alua gabula dödö ba nösi nomoma.”—Robin.
NIWAʼÖ ZURA NIʼAMONIʼÖ: ”Yamuʼalioʼö wamondrongo, böi yamufahulö wehede.”—Yakobo 1:19.
Te Göi Adöni Dödöu
FAMAHA’Ö ZURA NI’AMONI’Ö
Fanolo khö Ndra si Bohou Ebua hegöi Sagawuyu Boto
Alui hewisa Zura Niʼamoniʼö ba wanolo si bohou ebua hegöi sagawuyu boto ba ngawalö zalua ba waʼaurira hegöi abula dödö sasese alua khöra.
