Na falulu fohalöwö zi sambua fongambatö, amaedola pilot ba kopilot ira si so fahasara dödö. Hewaʼae na so gabula dödöra, foʼomo ira matua hegöi ira alawe faoma laʼangeragö nawöra tenga ha yaʼira samösa.

NIWAʼÖ ZURA NIʼAMONIʼÖ: ”Tenga saʼae darua ira, hizaʼi ha sambua boto.”—Mataiʼo 19:6.

”Faʼohahau dödö ba wongambatö tenga ha famorege zi samösa niha. So wamorege khö woʼomo ira matua hegöi ira alawe.”—Christopher.

Na lö hadöi fahasara dödö ba wongambatö, faoma fabuʼa-buʼa ira khö nawöra ba wangalui haniha zatulö ba si sala, tenga ba wangasiwai abula dödö. Lua-luania, abula dödö side-ide tobali ebua.

”Sambua lala ba wanöndra faʼohahau dödö ba wongambatö, yaʼia na faoma falulu fohalöwö ira. Na lö khöma fahasara dödö foʼomogu, eluahania ha awö ba mbateʼe daʼö tenga si sambua fongambatö. Sindruhu sa, sambua omo ndraʼaga foʼomogu, hizaʼi lö khöma fahasara dödö ba wangai angetula sabölö moguna.”—Alexandra.

ANGERAGÖ ATÖ

• Hadia so ba dödögu wa gazigu wohalöwö ”ha khögu samösa”?

• Ba ginötö ulau molombase, hadia moguna ufandröndröu ndraʼo moroi khö woʼomogu?

• Hadia lö omasi ndraʼo fahuwu ba nösi nomo woʼomogu hewaʼae sindruhunia ahatö ia ba nösi nomonia?

FATUNÖISI KHÖ NGAMBATÖU

• Hadia manö nifaluada sangoromaʼö wa no falulu fohalöwö ita?

• Hadia manö nasa zinangea tabulöʼö?

• Hadia zinangea tafalua enaʼö itugu tedou wahasara dödöda?

TIPS

• Na lö fahasara dödö ba wongambatö, amaedola zi fabumanu solawa awönia. Hadia zinangea mifalua enaʼö famai ami simane si sambua tim?

• Moroi na ömane, ’Hewisa enaʼö möna ndraʼo?’ tandraigö angeragö, ’Hewisa enaʼö möna ndraʼaga?’

”Lö moguna miʼalui haniha zatulö ba si sala. Hizaʼi sabölö moguna yaʼia daʼö na so khöda waʼohahau dödö ba fahasara dödö ba wongambatö.”—Ethan.

NIWAʼÖ ZURA NIʼAMONIʼÖ: ”Miʼangeragö zoguna ba niha böʼö, tenga ha soguna khömi manö.”—Filifi 2:3, 4.