KHÖ ZI NO MONGAMBATÖ
3: Famosumange
HADIA GELUAHANIA
Na faoma lafosumange nawöra yaʼira si sambua fongambatö, lö tebulö laʼomasiʼö nawöra hewaʼae fataria lö khöra fahasara dödö. Imane buku Ten Lessons to Transform Your Marriage, ”Lö fatandro ira ba mbua wangera-ngerara samösa, hizaʼi faoma lafatunöisi na so gabula dödö. Faoma lafondrondrongo mbua gera-era nawöra si fao famosumange ba laʼalui lala ba wangasiwai abula dödö andrö”.
NIWAʼÖ ZURA NIʼAMONIʼÖ: ”Faʼomasi andrö . . . lö iʼalui dana khönia.”—1 Korindro 13:4, 5.
”Uʼameʼegö tödö sibai woʼomogu ira alawe ba wangoromaʼö wa ufosumange ia ba lö ufalua zi tola mangafökhöiʼö tödönia mazui si möi famakiko wongambatöma.”—Micah.
HANA WA MOGUNA DAʼÖ
Na lö hadöi famosumange ba gotalua zi no mongambatö, lua-luania faoma latahigö nawöra, lafatörö-törö li, mazui laʼoʼaya woʼomora. Moloʼö ira peneliti, daʼö fefu zi tobali tandra wa lö ara tö tekiko wongambatöra.
”Na tafatörö-törö li mazui tawaʼö wehede si möi fangoʼaya woʼomoda ira alawe enaʼö maʼiki niha, tola manö irasoi waʼide-ide dödö ba lö saʼae ifaduhusi tödö ita. Lua-luania tekiko wongambatöda.”—Brian.
SI TOLA ÖFALUA
ANGERAGÖ ATÖ
Haogö nehegö hewisa wehede hegöi nifaluamö ba zi samigu. Aefa daʼö angeragö:
-
ʼHawaʼasese usalaikö woʼomogu ba usuno ia?’
-
ʼHadia manö nifaluagu ba wangoromaʼö wa ufosumange woʼomogu?’
FATUNÖISI KHÖ NGAMBATÖU
-
Hadia wehede hegöi amuata somasi ita irege tarasoi wa ifosumange ita foʼomoda?
-
Hadia wehede mazui amuata sangoromaʼö wa lö ifosumange ita foʼomoda?
TIPS
-
Sura tölu ngawalö lala nifalua ngambatöu enaʼö örasoi wa ifosumange ndraʼugö. Aefa daʼö, andrö khö ngambatöu enaʼö ifalua göi zimane daʼö. Beʼe khönia hadia nisuramö, ba ibeʼe göi khöu hadia nisurania. Ba miforege wamalua hadia zi no musura andrö.
-
Sura hadia manö gamuata niforomaʼö ngambatöu sadöni dödöu ba fatunö khönia wa öʼandrö sibai saohagölö ba gamuatania andrö.
”Na sindruhu-ndruhu ufosumange woʼomogu ira matua, uforomaʼö moroi ba nifaluagu wa uʼameʼegö tödö sibai ia ba omasido na omuso dödönia. Tenga balazi ufalua zahöli-höli dödö. Itaria moroi ba ngawalö zide-ide he ba wehede hegöi nifaluagu, tola irasoi wa ufosumange ia.”—Megan.
Rahu-rahunia, lö ibönö na ha öforomaʼö wa no öforege wamosumange ngambatöu, hizaʼi moguna göi irasoi wa öfosumange ia.
NIWAʼÖ ZURA NIʼAMONIʼÖ: ”Mifalua waʼomasi, faʼahakhö dödö, faʼasökhi dödö, fangide-ngideʼö, falöʼalio mofönu, ba faʼebolo dödö.”—Kolose 3:12.
