KHÖ ZATUA
6: Fotu
HADIA GELUAHANIA
Ngawua wehede fotu eluahania fanuturu lala mazui famahaʼö. Fotu moroi khö ndra satua farahu ba daʼö ba wanolo iraonora ba wangai angetula si fao faʼatua-tua. Na lö baga gangetula nihalöra, moguna khö ndra satua ba wameʼe fotu enaʼö laʼila hadia zala nifaluara.
HANA WA MOGUNA DAʼÖ
Barö zi hauga wulu fakhe andre arakhagö lö hadöi fotu. So waʼataʼu khö zatua ba wameʼe fotu, ma dania lö faʼafaduhu dödö ba ndraonora ba wangai angetula samösa. Hizaʼi, satua si so faʼatua-tua moguna ibeʼe gamakhoita si tefaudu ba lafomaha ndraonora ba woloʼö si no mufakhoi andrö.
”Moguna labeʼe nola-ola ba ndraono enaʼö lafomaha ira ba wangokhögö fangera-ngera simane satua. Amaedola göfa si lö amuri ndraono na lö labeʼe khöra wotu. Tola manö itörö zi tenga lalania mazui ahöndrö göfa andrö.”—Pamela.
SI TOLA ÖFALUA
Moguna öfalua hadia zi no ötatugöi. Na lö laʼoʼö iraonomö hadia zi no öfakhoi, moguna öhuku ira. Hizaʼi na so khöra woloʼö, böi olifu ndraʼugö ba wosuno yaʼira.
”Ato niha somasi mamadaö ba ginötö andre. Börö daʼö, hasambalö usuno ndraonogu na so khöra woloʼö. Na lasuno ira, aoha khöra ba wanemaʼö tegu-tegu.”—Christine.
NIWAʼÖ ZURA NIʼAMONIʼÖ: ”Hadia nitaru niha sa, daʼö göi nibasinia dania.”—Galatia 6:7.
Böi talafo abeʼe ndraʼugö. Abula dödö side-ide böi muʼohe ba waʼebua. Ba ginötö öbeʼe wotu, moguna öfaudugö daʼö moloʼö faʼalawa ndröfira hegöi hawaʼebua zala nifaluara. Baero daʼö, tola fatema ba dödö ndraono wotu nibeʼeda na moʼamakhaita ia ba zala nifaluara. Duma-dumania, na laʼogunaʼö HP ba zi fasala, moguna lahalö HP andrö ira satua.
”Na lafalua zala iraonogu, utandraigö ba wangiʼila hadia niʼodödögönia ba wamalua daʼö mazui tenga. Sala side-ide nifalua ndraono, faböʼö degu-tegu nibeʼe na ifalua gamuata si lö sökhi si toʼölö ifalua.”—Wendell.
NIWAʼÖ ZURA NIʼAMONIʼÖ: ”Böi miʼandrö wönu ndraonomi enaʼö lö afatö dödöra.”—Kolose 3:21.
Oromaʼö waʼomasi. Abölö aoha ba ndraono ba woloʼö hegöi ba wanemaʼö fotu na aboto ba dödöra wa lafalua daʼö ira satuara börö me laʼomasiʼö ira.
”Me ifalua zala onoma, mafatunö khönia wa omuso dödöma ba ngawalö zi sökhi si no irai ifalua. Mawaʼö khönia wa sala nifaluania andrö tenga daʼö geluahania wa lö mofozu ia ba wamalua si sökhi, asala omasi ia ba wanemaʼö degu-tegu. Ba mafatunö göi khönia wa omasi ndraʼaga wanolo yaʼia.”—Daniel.
NIWAʼÖ ZURA NIʼAMONIʼÖ: ”Faʼomasi andrö no sebolo tödö ba si sökhi tödö.”—1 Korindro 13:4.
