KHÖ ZI BOHOU EBUA
9: Jati Diri
HADIA GELUAHANIA
Jati diri moʼamakhaita ia ba mbua-bua, nifaduhusi tödö, hegöi amuata. Eluahania, daʼö zotatugöi haniha ndraʼugö sindruhunia.
HANA WA MOGUNA DAʼÖ
Na öʼokhögö jati diri, lö alio mangiwa dödöu ba zi no öfaduhusi tödö, ba lö alio tedönisi dödöu khö ndra awö-awöu.
”Ato niha hulö simane patung si no mufezizio ba toko samawa nukha. Lö laʼila lafili samösa hadia nukha somasi lafake, hizaʼi niha böʼö zotatugöi.”—Adrian.
”No ufahaʼö ndraʼo wa moguna so khögu waʼaro dödö ba zi no ufaduhusi tödö hewaʼae itaria abua ba wamalua yaʼia. Na urasoi waʼahono dödö fariawö khö ndra awö-awögu börö me lö laʼosiwawöi hadia nifaduhusigu tödö, eluahania yaʼira andrö si fahuwu si sökhi.”—Courtney.
NIWAʼÖ ZURA NIʼAMONIʼÖ: ”Böi mifaomagö ami ba niha gulidanö ba götö daʼa. Hizaʼi, mibulöʼö lala wangera-ngerami.”—Roma 12:2.
SI TOLA ÖFALUA
Angeragö atö, ’Hewisa ndraʼo sindruhunia iadaʼa?’ ba ’Hewisa ndraʼo dania ba zi so miföna?’ Enaʼö öʼila wanema linia, haogö angeragö hadia manö zi tohude si no öʼokhögö, soʼamböta ndraʼugö, hegöi nifaduhusimö tödö. Ba beʼe wanema li moroi ba wanofu andre.
Si tohude si no öʼokhögö: Hadia waʼatua-tua mazui nekhe-nekhe danga niʼokhögögu? Hadia zi tohude niʼokhögögu? (Duma-dumania: Hadia tola mufaduhusi tödö ndraʼo ba wangogunaʼö inötö? Hadia so khögu wanaha tödö? Hadia owölö-ölö ndraʼo? Hadia so khögu waʼoböwö?) Hadia ngawalö zi sökhi si no irai ufalua?
TIPS: Hadia abua khöu ba wangalui amuata si sökhi niʼokhögömö? Tandraigö sofu khö zatuamö mazui si fahuwu khöu hadia gamuata si sökhi niʼokhögömö si no irai laʼila ba hadia mbörö wa lawaʼö zimanö.
NIWAʼÖ ZURA NIʼAMONIʼÖ: ”Yamufareso nifaluania zamösana, ba omuso dödönia ba nifaluania andrö, tenga börö me ifaedo-faedogö ia ba niha böʼö.”—Galatia 6:4.
Soʼamböta ndraʼugö: Hadia gamuata sinangea ubulöʼö? Hawaʼara zasesenia alio tedönisi dödögu ba wamalua sala? Hadia moguna uforege nasa enaʼö so khögu wanaha tödö?
NIWAʼÖ ZURA NIʼAMONIʼÖ: ”Na tawaʼö, ’Lö horöda,’ eluahania no talimo ita.”—1 Yohane 1:8.
Nifaduhusimö tödö: Hadia wamahaʼö sanandrösa ba gamuata sinangea uʼoʼö ba hadia mbörö? Hadia faduhu dödögu wa so Lowalangi? Hana wa faduhu dödögu? Hadia manö gamuata si lö sökhi andrö, ba hana wa uwaʼö zimanö? Moloʼö yaʼo, hewisa waʼauri niha ba zi so miföna?
NIWAʼÖ ZURA NIʼAMONIʼÖ: ”Irorogö ndraʼugö faʼaboto ba dödö, ba ilumöʼö ndraʼugö fangera-ngera si sökhi.”—Amaedola 2:11.
Te Göi Adöni Dödöu
FANEMA LI MOROI BA ZI 10 WANOFU ZI BOHOU EBUA
Haniha Ndra’odo?
Törö tödöu hadia zi sökhi ni’okhögöu, abölö, ola-ola, ba ohitö dödö zanolo ya’ugö ba wangai angetula si tefaudu ba ginötö so wanandraigö.
