KHÖ ZI NO MONGAMBATÖ
4: Mangefaʼö Sala
HADIA GELUAHANIA
Mangefaʼö sala eluahania taʼolifugö zala nifalua niha böʼö ba lö saʼae abao dödöda khönia. Mangefaʼö sala tenga daʼö geluahania wa taʼosilöʼögö zala nifalua niha böʼö mazui tawaʼö tödöda wa lö irai ifalua zala andrö.
NIWAʼÖ ZURA NIʼAMONIʼÖ: ”Hewaʼae na so mbörö waʼabao dödömi, böi tebulö khömi waʼebolo dödö zamösana ba faoma miʼefaʼö zala nawömi soroi ba dödö.”—Kolose 3:13.
”Na taʼomasiʼö zi samösa niha, lö taʼosambuaʼö dödöda ba zoʼamböta ia, hizaʼi ba wamorege nifaluania ba wamalua si sökhi.”—Aaron.
HANA WA MOGUNA DAʼÖ
Na lö aetu mbao dödöda, tola fawuka wangera-ngerada ba göna ita fökhö. Baero daʼö, tola manö tekiko wongambatöda.
”Samuza inötö, iʼandrö waʼebolo dödö foʼomogu börö me no iʼafökhöiʼö dödögu. Maniasa sibai ndraʼo börö me lö uʼanemaiʼö uʼefaʼö zalania irege lö sökhi wahuwusama. Sindruhunia lö alua zimane daʼö na iʼotarai ba wamobörö uʼefaʼö zalania.”—Julia.
SI TOLA ÖFALUA
ANGERAGÖ ATÖ
Na ifuli afökhö dödöu börö wehede mazui nifalua ngambatöu, sofu khöu samösa:
-
ʼHadia alio sibai tetutu dödögu?’
-
ʼHadia ebua sibai zala si no ifalua irege moguna iʼandrö waʼebolo dödö, mazui hadia tola uʼolifugö manö daʼö?’
FATUNÖISI KHÖ NGAMBATÖU
-
Si toʼölönia, hawaʼara aheta mbao dödöu khö ngambatöu awena öʼefaʼö zalania?
-
Hadia zinangea tafalua enaʼö alio taʼefaʼö zala ngambatöda?
TIPS
-
Na iʼafökhöiʼö dödöda ngambatöda, böi tawaʼö wa iʼodödögö wamalua daʼö.
-
Böi tatanö ba dödöda zala ngambatöda, tatörö tödöda wa ”asese fasala ita fefu”.—Yakobo 3:2.
”Aoha khöda wangefaʼö sala ngambatöda na faoma tafalua zala. Hizaʼi, abölö abua wamalua daʼö na ha yaʼia zi fasala. Moguna so khöda wangide-ngideʼö enaʼö tola taʼefaʼö zala.”—Kimberly.
NIWAʼÖ ZURA NIʼAMONIʼÖ: ”Miʼaliokö miʼasiwai ba gotaluami.”—Mataiʼo 5:25.
Na lö aetu mbao dödöda, tola fawuka wangera-ngerada ba göna ita fökhö. Baero daʼö, tola manö tekiko wongambatöda
