Ohitö dödö andrö, tenga ha fangifi mazui somasi-masi dödö. Enaʼö aʼozu gohitö dödöda moguna so nifaluada, tafaudugö lala waʼaurida ba omasi ita wohalöwö.

So gohitö dödö simane ohitö dödö salio mukhamö (tola mukhamö ba zi hauga hari mazui ba zi hauga migu). Si dua, ohitö dödö nikhamö tenga ba waʼara ba tenga göi ba waʼalio (tola mukhamö ba zi hauga waŵa). Si tölu, ohitö dödö sara mukhamö (tola mukhamö ba zi döfi mazui töra). Enaʼö tola ökhamö gohitö dödö si tölu, moguna ua ökhamö gohitö dödö si oföna ba si dua.

Na aʼozu gohitö dödöda, monönö waʼafaduhu dödöda samösa, itugu fahuwu ita ba niha böʼö, ba monönö waʼowua-wua dödöda.

Faʼafaduhu dödöda samösa: Na mofozu ita ba wogamö ohitö dödö side-ide, tola faduhu dödöda ba wogamö ohitö dödö sabölö ebua. Tola göi monönö waʼafaduhu dödöda samösa ba wanaögö abula dödö sero maʼökhö, simane ba wanimbagö fondrönisi dödö moroi khö ndra awöda.

Fahuwusa: Si toʼölönia, omasi niha fariawö ba zangokhögö ohitö dödö hegöi samorege ba wogamö yaʼia. Sambua lala fondrege zi sökhi ba wangaʼaroʼö fahuwusada yaʼia daʼö na faoma taforege ba wogamö ohitö dödö si fagölö.

Faʼohahau dödö: Na no tatatugöi gohitö dödöda ba mofozu ba wogamö yaʼia, tola tasöndra waʼohahau dödö ba faʼahono dödö.

”Omuso dödögu na so gohitö dödögu. Oya zinangea ufalua ba wogamö ohitö dödö andrö. Ba ginötö mofozu ndraʼo ba wogamö si sambua ohitö dödö, umane, ’Tola ufalua daʼa! Aʼozu gohitö dödögu.’ Omuso sibai dödögu.”—Christopher.

NIWAʼÖ ZURA NIʼAMONIʼÖ: ”Niha samaigi-maigi angi ba lö manaru, ba samaigi-maigi lawuo ba lö mamasi.”—Sangombakha 11:4.

Falua daʼa enaʼö tola ökhamö gohitö dödöu.

Tatugöi gohitö dödömö. Sura hadia manö gohitö dödömö ba tatugöi hezo zi oföna ökhamö.

Angeragö. Ba wogamö ohitö dödö, tandraigö falua daʼa:

• Tatugöi hawaʼoya ginötö niʼogunaʼöu ba wogamö yaʼia.

• Angeragö hadia manö zinangea öfalua.

• Angeragö daha-taha si tola manö alua ba hewisa lala ba wangasiwai yaʼia.

Anemaiʼö falua. Böi baloi enaʼö toföfö fefu ba awena öfalua. Angeragö, ’Hadia zi oföna ufalua enaʼö tola ukhamö gohitö dödö andrö?’ Aefa daʼö, anemaiʼö falua. Nehegö hadia manö zi no ökhamö iʼotarai me öbörögö ba wamalua ohitö dödö andrö.

NIWAʼÖ ZURA NIʼAMONIʼÖ: ”Tobali hare lua-lua nikhoi dödö zowölö-ölö.”—Amaedola 21:5.