KHÖ ZI BOHOU EBUA
11: Owölö-ölö
HADIA GELUAHANIA
Niha sowölö-ölö omasi sibai ia wamorege fohalöwö ba wombönökhi soguna khönia samösa hegöi ba wanolo niha böʼö hewaʼae halöwönia andrö tenga halöwö si tehöngö.
HANA WA MOGUNA DAʼÖ
He omasi ita mazui löʼö, oya zi tobali noro dödö ba waʼauri andre. Iadaʼa ato niha si lö omasi mohalöwö. Hizaʼi, na owölö-ölö ita oya mbua nitemada.—Sangombakha 3:13.
”Me no uforege wohalöwö, omuso dödögu ba so khögu waʼahono dödö. Faʼahono dödö andre zameʼe famomaha khögu enaʼö uforege wohalöwö. Baero daʼö, na so khöda waʼowölö-olö, tola sökhi döida ba niha.”—Reyon.
NIWAʼÖ ZURA NIʼAMONIʼÖ: ”Oi so gunania waʼerege dödö ba wohalöwö.”—Amaedola 14:23.
SI TOLA ÖFALUA
Moguna wamorege enaʼö tola ösöndra waʼomuso dödö ba halöwömö. Börö daʼö, tandraigö falua daʼa.
Forege enaʼö sökhi wamaluamö fefu halöwömö. Falua halöwömö soroi ba dödö simane halöwö ba nomo, ba wohalöwögöigö PR, mazui ba wangalui soguna. Na sökhi wamaluamö zi sambua halöwö, forege wamalua daʼö nasa enaʼö itugu sökhi. Duma-dumania, aliokö ba wangasiwai halöwö andrö. Na itugu onekhe ita ba wamalua halöwö, tola tasöndra waʼomuso dödö.
NIWAʼÖ ZURA NIʼAMONIʼÖ: ”Hadia no irai öʼila niha sonekhe ba halöwö dangania? Föna razo-razo mozizio ia, tenga föna niha si toʼölö manö.”—Amaedola 22:29.
Angeragö hadia mbuania ba niha böʼö. Na sökhi wamaluada halöwö si no tebeʼe khöda, tatu so mbuania ba niha böʼö. Duma-dumania, na owölö-ölö ita ba wamalua halöwö yomo ba nomo, no taʼalösi halöwö nifalua nösi nomoda.
NIWAʼÖ ZURA NIʼAMONIʼÖ: ”Ohahau dödö ba wameʼe moroi ba wanema.”—Halöwö Zinenge 20:35.
Falua zi töra moroi ba zi no laʼandrö khöu. Na so halöwö nibeʼe khöu, böi ha asala öfalua daʼö. Falua ia töra moroi ba zi no laʼandrö khöu. Na öfalua halöwö daʼö töra moroi ba zi no laʼandrö khöu, eluahania tenga niha böʼö zamatörö faʼauriu. Tatu omuso dödömö ba wamalua halöwö andrö.—Mataiʼo 5:41.
NIWAʼÖ ZURA NIʼAMONIʼÖ: ”Enaʼö aoha gölöu wamalua si sökhi, ba tenga nifaso.”—Filemo 14.
Faudugö halöwö hegöi inötömö ba zi tola öfalua. Faʼowölö-ölö wohalöwö tenga daʼö geluahania lö khönia folombase. Niha sowölö-ölö andrö omasi ia ba wamalua halöwö, hizaʼi so göi ginötönia molombase.
NIWAʼÖ ZURA NIʼAMONIʼÖ: ”Sökhi zi sagokhö faʼahono dödö moroi na dua gokhö waʼerege dödö ba famorege ba wolohi angi.”—Sangombakha 4:6.
