Fawuka wangera-ngera yaʼia daʼö reaksi mboto ba ginötö alua gabula dödö. Oya hormon niʼasogö guto irege molua-lua ia ba mboto. Lua-luania, itugu monönö weʼugu-ugu dödö, tedou tekanan darah, alio sibai wehanu-hanu ba agakandro mbuʼu. Ba zi lö taʼila, sindruhunia no tefaʼanö mbotoda ba wanaögö abula dödö. Na no aefa alua gabula dödö, tola ifuli simane si toʼölö hormon si so ba mbotoda.

Faʼafawuka wangera-ngera yaʼia daʼö reaksi mbotoda enaʼö tola tataögö gabula dödö mazui teʼala. Tebörögö reaksi daʼa moroi ba guto. So guna waʼafawuka wangera-ngera yaʼia daʼö ba wanolo yaʼita ba woʼanemaiʼö wamalua hadia ia na so zalua si lö tadöna-döna. Daʼa nifotöi faʼafawuka wangera-ngera si sökhi. Faʼafawuka wangera-ngera daʼa göi zanolo yaʼita ba wogamö ohitö dödöda mazui ba wanöndra bua si sökhi. Duma-dumania ba ginötö ujian, wawancara ba halöwö, mazui fatandri ba olahraga.

Hizaʼi, na talafo fawuka wangera-ngerada, ambö baga lua-luania mazui tola möi famaʼalada. Tola manö mofökhö ita, alio mofönu, abu dödöda, alio olifu, abua khöda ba wangosambuaʼö fangera-ngerada, mazui alio ataʼu. Tola göi faböʼö gamuata hegöi lagu wahuhuosada ba niha. So ösa niha sangai angetula si fasala ba ginötö fawuka wangera-ngerania. Duma-dumania ilau mabu, iʼogunaʼö narkoba, talafo oya manga, mazui moroko. Ba so göi zi göna depresi, alio marase, mazui tumbu ba dödönia wamunu yaʼia samösa.

Faböʼö-böʼö zalua ba niha si fawuka wangera-ngera. So lua-luania ba mbotoda na fawuka wangera-ngerada ba tola iʼasogö ngawalö wökhö.