Faʼaboto ba Dödö Zangahatöʼö Yaʼita khö Lowalangi
Tenga ha faʼabölö niʼokhögö Zomböi yaʼita, hizaʼi oya nasa gamuata si sökhi niʼokhögönia. Omasi ia na fahuwu ita khönia ba aboto ba dödöda haniha ia. (Yohane 17:3; Yakobo 4:8) Daʼö mbörö wa oya ifatunö khöda sanandrösa khönia.
So Döi Zomböi Yaʼita
”Yaʼaboto ba dödö niha wa ha yaʼugö zotöi Yehowa, ha yaʼugö Wondrege Zalawa ba gulidanö maʼasagörö.”—SINUNÖ 83:18.
Sura Niʼamoniʼö zameʼe khöda famahaʼö wa Yehowa andrö Lowalangi sindruhu si ha samösa. Yaʼia zomböi faʼaurida, saliwa-liwa ba danö hegöi banua si yawa awö danö. Ha yaʼia zinangea tafosumange.—Famaʼeleʼö 4:11.
Yehowa Andrö Sebua Faʼomasi
”Lowalangi andrö no faʼomasi.”—1 YOHANE 4:8.
Tola tafahaʼö ita sanandrösa ba gamuata Yehowa moroi ba Zura Niʼamoniʼö hegöi ba ngawalö niwöwöinia. Amuatania siföföna yaʼia daʼö faʼomasi. Fefu hadia ia nifaluania teʼodane-dane ba waʼomasi. Na itugu aboto ba dödöda haniha Yehowa ba itugu monönö göi wangomasiʼöda yaʼia.
Yehowa Andrö Lowalangi Sangefaʼö Sala
”Yaʼugö Lowalangi somasi mangefaʼö sala.”—NEHEMIA 9:17.
Aboto ba dödö Yehowa wa lö moʼahonoa ita. Börö daʼö, ’omasi ia iʼefaʼö zalada’. Na lö tabiniʼö zalada föna Yehowa, maniasa ita, ba taforege enaʼö lö saʼae tafalua zala andrö, faduhu dödöda wa iʼefaʼö zalada. Lö göi ihuku ita börö zala nifaluada ba zilalö.—Sinunö 103:12, 13.
Omasi Yehowa na Mangandrö Ita Khönia
”Ahatö Yehowa ba niha soʼangaröfili yaʼia . . . Ifondrondrongo na muʼao ira wangandrö fanolo.”—SINUNÖ 145:18, 19.
Satua sangomasiʼö ononia, hasambalö wa ifondrondrongo na fahuhuo khönia nononia. Simane daʼö göi Yehowa, hasambalö wa ifondrondrongo na mangandrö ita khönia. Lö iʼandrö khöda wamalua si toʼölö lafalua niha sato na mangandrö ira mazui na taʼogunaʼö nadu ba wamosumange yaʼia.
