Faʼaboto ba Dödö Zameʼe Fanötöna
No ifabuʼu khöda Lowalangi wa lö ara tö ihaogö gulidanö andre enaʼö itugu sökhi. Iheta wangabu dödö ba ohahau dödö niha ba gulidanö. (Sinunö 37:11) Hana wa faduhu dödöda ba zi no ifabuʼu andrö? Börö me ”Lowalangi andrö tenga simane niha si falimo-limo”. (4 Moze 23:19) Datafaigi hadia manö nifalua Zomböi yaʼita.
Tehori Dania Niha si Lö Sökhi
”Hewaʼae tedou niha si lö sökhi simane duʼu ba monönö waʼato niha si lö sökhi, hasambalö wa tehori ira sagötö faʼara.”—SINUNÖ 92:7.
Simane nitutunö ba artikel moroi furi, itugu lö sökhi gulidanö andre. Hizaʼi, lö ahöli-höli dödöda börö me no ifatunö khöda Sura Niʼamoniʼö sanandrösa ba daʼö. Moloʼö 2 Timoteo 3:1-5, itugu lö sökhi gamuata niha ba ”ngaluo safuria” andre. Hadia ngaluo safuria andrö? Daʼö ngaluo safuria ba niha si lö moloʼö niwaʼö Lowalangi. Ba zi lö ara tö, ihori niha si lö sökhi si lö mamalalini era-era. Hatö niha si sökhi zi toröi ba gulidanö, yaʼia daʼö niha soloʼö khönia. Simane niwaʼö Zura Niʼamoniʼö, ”Niha satulö tödö dania zokhö tanö, ba mowanua ira ba daʼö sagötö faʼara.”—Sinunö 37:29.
Tehori Dania Zatana
’Ifufu Zatana Lowalangi faʼohahau dödö.’—ROMA 16:20.
Lö hadöi saʼae dania ngawalö zi lö sökhi, Satana hegöi ira malaʼika si lö sökhi. Andrö wa atulö gulidanö. Ifabuʼu khöda Somböi, ”Lö hadöi sametaʼu [yaʼita].”—Mikha 4:4.
Lö Hadöi Fökhö hegöi Faʼamate
”So nose Lowalangi ba gotalua niha. . . . Iʼosi dawa hörö fefu ba höröra. Lö hadöi saʼae faʼamate, faʼabu dödö, fege-ege, mazui fökhö.”—FAMAʼELEʼÖ 21:3, 4.
Lö hadöi dania famakao hegöi fökhö börö me ifuli iʼazökhi Lowalangi fefu ngawalö nifakiko Zatana, Adamo, Khawa hegöi falömoʼahonoada samösa. Baero daʼö, ”lö hadöi saʼae faʼamate”. Niha sangomasiʼö ba soloʼö niwaʼö Zomböi yaʼita, lasöndra waʼauri si lö aetu sagötö faʼara. Na simanö, hezo toröi ira?
Omasi Zomböi na Tobali Faradaiso Gulidanö Andre
”Somuso tödö dania danö si mate hegöi tanö si lö niha-niha; sowua-wua tödö dania danö si lö niha-niha ba afönu ia bunga.”—YESAYA 35:1.
Na ihori dania ngawalö zi lö sökhi Lowalangi, tobali kabu si sökhi gulidanö andre ba oya iʼasogö ngawalö gö. (Sinunö 72:16) Lö taʼunö nasi, danau hegöi ungo nidanö ba afönu faʼauri. Ba lö saʼae tatöi-töi ngawua wehede ”polusi”! Baero daʼö, lafazökhi nomora niha ba toröi ira ba daʼö. Lö hadöi saʼae niha si lö omo, solofo mazui si tosasa.—Yesaya 65:21, 22.
Tesusugi Dania Niha si No Mate
”So wanusugi niha si no mate.”—HALÖWÖ ZINENGE 24:15.
Hadia omasi ndraʼugö na falukha ami zi fahuwu khöu hegöi ösi nomomö si no mate? Ifuli isusugi ira Lowalangi ba gulidanö Faradaiso si sökhi sibai. Tola öʼila ira ba laʼila göi ndraʼugö dania. Tatu omuso-muso sibai dödömi! Hizaʼi, hana wa faduhu dödöda wa hasambalö alua daʼa? Börö me no tesura ba Zura Niʼamoniʼö niha si no irai mususugi, satua hegöi iraono irege ifuli owulo ira ba nösi nomora. Baero daʼö, me ifalua wanusugi Yesu, ato niha sangila me luo daʼö.—Luka 8:49-56; Yohane 11:11-14, 38-44.
Te Göi Adöni Dödöu
FAOSO!
Ulidanö Safönu Abula Dödö—Böi Aetu Dötönaföu
Itolo ita Sura Niʼamoniʼö ba wanaögö salua ba waʼaurida ba ibeʼe khöda dötönafö ba zi so miföna.
ESSENTIAL BIBLE TEACHINGS
Hewisa Niha si No Mate?
Ifabuʼu Sura Niʼamoniʼö wa so ginötönia dania tesusugi niha si no mate, simane salua khö Lazaro.
FAMAHA’Ö ZURA NI’AMONI’Ö
Tandraigö Wamaha’ö Nifaluama
Faha’ö ndra’ugö ba Zura Ni’amoni’ö khö zi samösa samaha’ö, lö mu’andrö gefe.
