Hana Wa Tefakao Ita, Atua ba Mate?
Ba wamaigi Zomböi yaʼita, fefu niha ba gulidanö andre amaedola ndraononia. Daʼö mbörö wa lö omasi ia na tefakao ita. Na simanö, hana wa ato sibai niha si tefakao?
Horö Niha Siföföna
”Hulö simane böröta horö andrö, ha samösa niha zamobörö ba faʼamate andrö börö horö, andrö wa ikhamö fefu niha faʼamate.”—ROMA 5:12.
Me awena iwöwöi niha siföföna Lowalangi yaʼia daʼö Adamo ba Khawa, no iʼamualagö khöra mboto hegöi fangera-ngera soʼahonoa. Ifataro ira göi ba nahia si sökhi ba gulidanö yaʼia nifotöi Kabu Edena. Tola laʼa fefu mbua geu si so ba kabu andrö, hizaʼi so sageu mbua zinanö si tebai laʼa. Alimagö sibai, lö laʼoʼö ira Adamo faoma Khawa niwaʼö Lowalangi. Laʼa mbua geu si no itegu andrö, lua-luania aekhu ira ba horö. (1 Moze 2:15-17; 3:1-19) Börö daʼö, ifofanö ira Lowalangi moroi ba kabu andrö ba tosasa waʼaurira. Ba gafuriata, fefu ndraono niʼadonogöra ahori göna ira faʼatosasa, faʼatua ba faʼamate. (1 Moze 3:23; 5:5) Börö me yaʼita andre ngaʼötö Gadamo ba Khawa, andrö wa göna ita fökhö, atua ba mate.
Fondrönisi Dödö moroi khö Ndra Malaʼika si Lö Sökhi
”Satana zamatörö ulidanö andre maʼasagörö.”—1 YOHANE 5:19.
Satana andrö malaʼika solawa Lowalangi. (Yohane 8:44; Famaʼeleʼö 12:9) Ba gafuriata, fao göi khönia ndra malaʼika tanö böʼö ba wolawa Somböi yaʼita. Mufotöi ira malaʼika si lö sökhi. Laʼogunaʼö waʼabölöra ba wamaelungu niha enaʼö lö laʼoʼö niwaʼö Zomböi yaʼita. Lafarou dödö niha sato ba wamalua si lö sökhi. (Sinunö 106:35-38; 1 Timoteo 4:1) Omuso-muso dödö Zatana hegöi ira malaʼika si lö sökhi na tefakao ita.
Börö Zala Nifaluada Samösa
”Hadia nitaru niha sa, daʼö göi nibasinia dania.”—GALATIA 6:7.
Fefu ngawalö gabula dödö ba gulidanö andre, alua daʼö börö zala nifalua Gadamo faoma Khawa hegöi fondrönisi dödö moroi khö Zatana. Itaria göi wa itugu tosasa waʼaurida, börö zala nifaluada samösa. Hadia geluahania? Na ifalua zi lö sökhi si samösa niha mazui fasala gangetula nihalönia, lua-luania göna ia fangabu dödö. Hizaʼi, na si sökhi nifaluania ba sökhi göi mbua nitemania. Duma-dumania, so samösa ndra matua sanörö sindruhu, owölö-ölö ia wohalöwö ba iʼomasiʼö nösi nomonia. Hadia mbuania? Omuso dödönia hegöi ösi nomonia. So göi niha samadu-madu tuo, si famai, niha sareu, lua-luania aekhu ia ba waʼatosasa awö nösi nomonia. Andrö wa abölö sökhi na taʼoʼö niwaʼö Zomböi yaʼita. Omasi ia na oya falukha ita zi sökhi ba ”fahöna waʼahono dödö” nirasoida.—Sinunö 119:165.
Faʼaurida ba ”Ngaluo Safuria”
”Ba ngaluo safuria andre . . . amuata niha ba daʼö ha tana khöra laʼalui, sangomasiʼö anaʼa, . . . si lö mamondrongo li zatua, . . . si lö fanaha tödö, safaito, si lö mangomasiʼö si sökhi.”—2 TIMOTEO 3:1-5.
Ato sibai niha sangokhögö amuata simane daʼö iadaʼa. Daʼa sambua dandra sangoromaʼö wa no so ita ba ”ngaluo safuria” mazui inötö safuria. Ifatunö göi khöda Buku Niʼamoniʼö wa oya dania tarongo wasuwöta, faʼambö soguna, duru danö sabölö-bölö hegöi ngawalö wökhö. (Mataiʼo 24:3, 7, 8; Luka 21:10, 11) Daʼö mbörö wa ato niha si göna famakao ba faʼamate.
