”Yaʼiforege wohalöwö [si samösa niha] ba wamalua si sökhi faoma tangania, enaʼö tola ibeʼe wanolo ba niha soʼamböta.”​—EFESO 4:28.

Omasi Zomböi yaʼita na owölö-ölö ita wohalöwö. Aboto ba dödönia wa daʼö zameʼe khöda faʼomuso dödö. Hadia mbörö? Börö me tola tabönökhi zoguna khöda hegöi soguna ba nösi nomoda. Tola göi tatolo niha böʼö somasi manema fanolo. Baero daʼö, iʼameʼegö tödö ita kafaloda wohalöwö ba te lö iʼefasi ita ba halöwöda. Oya mbuania na owölö-ölö ita wohalöwö. Moloʼö Sura Niʼamoniʼö, fefu ngawalö zi sökhi andrö no ”buala [moroi khö] Lowalangi”.​—Sangombakha 3:13.

”Faduhu dödöma lö itegu ndraʼaga tödöma side-ide, ba omasiga matörö zindruhu ba ngawalö hadia ia.”​—HEBERAIʼO 13:18.

Na tatörö zindruhu, lö obou döida, ahono dödöda ba ohahau dödöda wemörö. Baero daʼö, faduhu dödö niha böʼö khöda ba lafosumange ita. Lö lasöndra daʼö niha si lö manörö sindruhu. Te lö aetu itahi-tahigö ira tödöra ba ataʼu ira na oroma gamuatara andrö ba niha böʼö.

”Böi miʼomasiʼö gefe ba mihonogö dödömi ba zi no so.”​—HEBERAIʼO 13:5.

Sindruhu sa, moguna khöda gefe ba wowöli gö hegöi soguna tanö böʼönia. Hizaʼi, na abölö ’taʼomasiʼö gefe’, tola teʼala waʼaurida. Niha sangomasiʼö kefe, oya laʼogunaʼö ginötö hegöi faʼabölöra enaʼö lasöndra gefe sebua. Lua-luania, lö fahasara dödö ba wongambatö, ba tola manö iʼofökhöi. (1 Timoteo 6:9, 10) Tola manö göi tedönisi dödönia ba walömanörö sindruhu. So ngawua wehede niha satua-tua sangumaʼö, ”Niha si lö faröi ba oya dania itema howu-howu, hizaʼi niha somasi alio kayo ba lö aefa ia wamalua sala.”​—Amaedola 28:20.

”Rorogö waʼatua-tua ba fangera-ngera si sökhi.”​—AMAEDOLA 3:21.

Famahaʼö si sökhi tola möi fanolo khöda enaʼö tobali ita niha si sökhi ba satua si sökhi. Hizaʼi, famahaʼö ba zekola lö ifabuʼu khöda wa mofozu ita ba tasöndra waʼohahau dödö. Enaʼö sindruhu-ndruhu mofozu ita, moguna khöda wamahaʼö fondrege zi sökhi yaʼia daʼö si otarai khö Zomböi yaʼita. Na omasi zi samösa niha ifahaʼö ia khö Zomböi yaʼita, ”fefu nifaluania ba mofozu”.​—Sinunö 1:1-3.