”Simanö göi woʼomo ira matua, enaʼö iʼomasiʼö woʼomonia simane botonia samösa. Niha sangomasiʼö foʼomonia, no iʼomasiʼö mbotonia. Lö hadöi niha si fatuwu ba mbotonia, hizaʼi iʼomasiʼö ba ibeʼe mbalazo.”​—EFESO 5:28, 29.

Foʼomo ira matua zi tobali högö yomo ba nomo. (Efeso 5:23) Hizaʼi, ira matua si sökhi lö amuʼi ba lö ilau-lau manö zomasi dödönia. Iʼalui zoguna ba nösi nomonia. Iforege enaʼö omuso dödö woʼomonia ba iʼomasiʼö. Iʼosinangegö woʼomonia ba lö ifaso na so zomasi-masi dödönia. (Filifi 2:4) Ihaogö wanutunö ösi dödönia khö woʼomonia ba ifondrondrongo göi na fahuhuo woʼomonia. Lö mofönu-fönu manö ia ba lö ilau wehede safökhö mazui ibözi.​—Kolose 3:19.

”Foʼomo ira alawe göi enaʼö sindruhu-ndruhu miʼoʼö li ndra matuami.”​—EFESO 5:33.

Ohahau dödö nösi nomo na foʼomo ira alawe ifosumange woʼomonia ba fao dödönia ba gangetula nihalö woʼomonia. Lö göi iʼailasi na so zala nifalua woʼomonia ira matua. Hizaʼi, ihaogö-haogö ba ifosumange. (1 Fetero 3:4) Ifili ginötö si tefaudu na omasi ia ifaʼema nösi dödönia khö woʼomonia, ba ihaogö-haogö wangumaʼö.—Sangombakha 3:7.

”Falemba dödö [ndra matua] khö ngambatönia ba ha sambua boto ira.”​—1 MOZE 2:24.

Ba ginötö mangowalu zi samösa ira matua khö zi samösa ira alawe, tobali sambua fongambatö ira ba itugu aro wahuwusara. Börö daʼö, enaʼö aro wongambatöra, moguna asese fahuhuo ira soroi ba dödö ba faoma laʼameʼegö tödö nawöra. Tebai faröi ira khö nawöra mazui laʼalui niha böʼö somasi ira. Na fakawa ira ba niha böʼö, amaedola zi no lafesokho dödö ngambatöra ba afökhö sibai daʼö. Tola manö aetu dalu wongambatöra.​—Heberaiʼo 13:4.

”Fahaʼö nonou ba lala satulö, na atua ia dania ba lö iböhöli wamalua daʼö.”​—AMAEDOLA 22:6.

Lowalangi zameʼe noro dödö khö zatua ba wondrorogö hegöi ba wamahaʼö iraonora. Moguna labeʼe ira duma-duma ba lafahaʼö ndraonora enaʼö tobali ira iraono sangila huku. (5 Moze 6:6, 7) Na ifalua zala si samösa iraono, satua si so faʼaboto ba dödö lö talafo abölö-bölö wofönunia ba ndraononia. ’Laʼaliokö wamondrongo, lö ihulö wehede, ba lö alio mofönu.’ (Yakobo 1:19) Na labeʼe wotu ba ndraonora, lafalua daʼö börö waʼomasi tenga börö waʼaukhu dödö.

”Yaʼami iraono, miʼoʼö li zatuami . . . ’Fosumange namau awö ninau.’”​—EFESO 6:1, 2. 

Lö tola löʼö, lafosumange ba laʼoʼö li zatuara iraono. Na lafalua daʼö, monönö waʼohahau dödöra yomo ba nomo, larasoi waʼatulö ba faʼohahau dödö. Iraono si no egebua-bua göi, no mifosumange zatuami na mirorogö ira. Farahu ba daʼö wangehaogö omora mazui ba wangaʼasogö soguna khöra.​—1 Timoteo 5:3, 4.