Ero maʼökhö, labunu-bunu ira niha ba wombönökhi soguna khöra. Hizaʼi abua khöra wamalua daʼö börö gabula dödö salua ba gulidanö andre.

• Na alua molö hegöi duru danö ba zi sambua wilayah, itugu tedou mböli zoguna ero maʼökhö hegöi nahia waʼatoröi.

• Ba ginötö krisis, tola manö itugu ide-ide gazi zohalöwö mazui ato niha niʼefasi ba halöwöra.

• Oya nomo si tekiko na alua bencana alam, tekoro lala wangalui mazui aekhu tou mböli gamawaö. Lua-luania ato zi tosasa.

• Na onekheʼö wombagi kefemö, daʼö zanolo yaʼugö ba wanaögö krisis salua ba zi so miföna.

• Törö tödöu wa fangalui, okhöta hegöi kefe niʼiröʼömö, tola manö lö bölinia samuza inötö.

• Tebai taʼöli fefu hadia ia faoma kefe, simane faʼohahau dödö hegöi fahasara dödö ba wongambatö.

Imane Sura Niʼamoniʼö: ”Na so khöda mbalazo hegöi nukha, yaʼahono dödöda ba daʼö.”—1 Timoteo 6:8.

Niha sahono tödö andrö omuso sibai dödönia na tebönökhi fefu zoguna khönia ba so khönia wanaha tödö, irege lö iʼöli-öli manö zomasi-masi dödönia. Moguna sibai khöda waʼahono dödö ba zi no so, mendrua manö ba ginötö tosasa ita wangalui soguna khöda.

Enaʼö ahono dödöda ba zi no so, te moguna taʼöna-önaiʼö waʼaurida ba tahide-hide wangogunaʼö kefe. Na asese taʼöli zi lö aetu ba gefeda, tola manö tobali abula dödöda dania.