Daʼö rahu-rahu nihalö ndra sagatua-tua moroi ba ngawalö soi sanandrösa ba waʼatebulö iklim. Na faduhu dödöu wa so Zomböi soʼameʼegö tödö niha gulidanö, rahu-rahu nihalöra andre zamasugi ba dödöda wa no ifaʼanö Lowalangi proses alami enaʼö tola iʼehaogö samösa ia ulidanö.

Hewaʼae simanö, börö me itugu tedou waʼatekiko gulidanö niʼasogö niha, tebai afönu iʼehaogö samösa ia ulidanö. Hizaʼi, omasi Lowalangi ba wangehaogö ulidanö enaʼö sökhi. Hana wa faduhu dödöda wa hasambalö ifalua daʼö Lowalangi?

Ayati si so ba daʼa zameʼe khöda faʼafaduhu dödö wa lö tebulö so gulidanö andre ba tola sökhi.

• Lowalangi zomböi ulidanö. ”Ba mböröta, ifazökhi Lowalangi mbanua si yawa awö danö.”—1 Moze 1:1

• Lowalangi zangumaʼö wa yaʼia zangokhögö ulidanö. ”Yehowa a zangokhögö ulidanö awö nösinia maʼafefu.”—Sinunö 24:1

• Me ifazökhi gulidanö Lowalangi, itatugöi enaʼö lö tebulö so. ”No ifasindro gulidanö yawa ba wondrasinia; lö modögö gulidanö irugi zi lö aetu.”—Sinunö 104:5

• No ifabuʼu Lowalangi wa lö tebulö so waʼauri ba gulidanö. ”Lowalangi sindruhu, Samazökhi ulidanö, . . . tenga si lö eluaha wamazökhinia daʼö, hizaʼi enaʼö mowanua niha ba daʼö.” —Yesaya 45:18

• No ifabuʼu Lowalangi wa auri niha ba gulidanö sagötö faʼara. ”Niha satulö tödö dania zokhö tanö, ba mowanua ira ba daʼö sagötö faʼara.”—Sinunö 37:29

Hadia nifalua niha so lua-luania daʼö ba gulidanö. Hizaʼi, na lö abölö-bölö waʼatekikonia, tola iʼehaogö samösa ia ulidanö. No ifazökhi gulidanö Lowalangi enaʼö tola iʼehaogö ia samösa. Baero daʼö, no ifaʼeleʼö Sura Niʼamoniʼö wa no itatugöi Lowalangi Yehowa wa hasambalö ihori niha samakiko ulidanö.—Famaʼeleʼö 11:18

No ifabuʼu Sura Niʼamoniʼö wa lö taʼunö ba sökhi dania gulidanö daʼa ibeʼe Lowalangi. Ibaliʼö gulidanö tobali faradaiso ba ibokai dangania ’ba wangabusoiʼö fefu zauri somasi dödöra’. —Sinunö 145:16