Polusi udara tola ifakiko ngawalö zauri ba gulidanö. Moloʼö standar Organisasi Kesehatan Dunia, ha satu persen niha ba gulidanö sohofo angi si lö taʼunö.

Polusi udara tola iʼasogö ngawalö wökhö pernapasan, kanker paru-paru hegöi fökhö soʼamakhaita ba pembuluh darah hegöi tödö. Ero röfi, so mato fitu zuta niha salio mate börö polusi udara.

So waʼabölö ba gulidanö ba wangaʼasogö angi si lö taʼunö soguna ba ngawalö zauri si so ba gulidanö. Hizaʼi, awena tola alua daʼö na lö abölö-bölö wotaʼunöisi niha angi andrö. Nehegö ösa duma-duma andre hewisa gulidanö ba wangehaogönia angi enaʼö lö taʼunö.

• No aboto ba dödöda wa gatua tola ihofo karbon dioksida si so ba nangi. Hizaʼi, ato zi lö mangila wa eu tongo sauri ba zinga nasi tola ihofo karbon dioksida lima winaeta waʼabölönia moroi ba waʼabölö gatua.

• Moloʼö penelitian barö-barö daʼa, so ösa ndruʼu nasi, duma-dumania kelp, tola ihofo ba ikoʼo karbon dioksida si so ba atmosfer. Duʼu nasi, iʼokhögö naha side-ide ba wangiröʼö angi irege tola molaya ia irugi ba dalu nasi. Ba ginötö aröu ia moroi ba zinga nasi, aboto naha wangiröʼö angi andrö, ba ahöndrö ndruʼu nasi safönu karbon dioksida no mege, tekoʼo ia barö nasi irugi ngaotu fakhe faʼara.

• So waʼabölö ba nangi ba wangehaogö yaʼia samösa moroi ba polusi si möi famakiko, tola oroma daʼa sagötö lockdown me COVID-19. Me döfi 2020, itugu alö waʼataʼunö nangi nihofoda börö me arakhagö lö hadöi polusi niʼasogö pabrik, moto mazui hondra. Moloʼö sambua laporan nifaʼema me döfi 2020 sanandrösa ba walötaʼunö nangi (”2020 World Air Quality Report”), töra 80 persen soi si fao ba laporan andrö, latutunö wa itugu lö taʼunö nangi si so ba soira lö ara me no mufalua lockdown.

Lö aetu lafarou dödö zokhö pabrik ira samatörö ba zi hauga soi, enaʼö laʼalösi polusi udara. Baero daʼö, lö tebulö laʼalui lala ira ilmuwan ba wangalösi lua-lua polusi udara. Duma-dumania, laʼogunaʼö bakteri ba wombulöʼö zat sotaʼunöisi angi enaʼö lö möi famakiko. Baero daʼö, lafarou dödö niha sato ira niha sagatua-tua enaʼö laʼogunaʼö fakake si tola menghemat energi ba nomora, ba abölö sökhi na latörö tanö mazui kureta moroi na latörö moto hegöi hondra.

Hizaʼi, lö ibönö na ha daʼö manö nifalua. No mututunö zalua andre ba zi sambua laporan me döfi 2022, nifaʼanö ngawalö organisasi internasional, farahu ba daʼö Organisasi Kesehatan Dunia hegöi Bank Dunia.

Ba laporan andrö mututunö wa me döfi 2020, so mato sambua niʼotölu waʼato niha ba gulidanö sangogunaʼö kompor si tola mangaʼasogö polusi udara. Ba zi hauga banua, ato niha zi lö sagu ba wowöli kompor si tola mangalösi polusi udara mazui abua ba wanöndra bahan bakar si lö mangaʼasogö polusi udara.

”Daʼa niwaʼö Lowalangi sindruhu sotöi Yehowa, Somböi banua si yawa . . . Lowalangi samologö tanö awö nösinia, Lowalangi samohanu-hanu niha si so ba daʼö.”—Yesaya 42:5.

Lowalangi zangaʼasogö angi nihofoda hegöi siklus alam, irege tola iʼehaogö ia samösa enaʼö lö taʼunö. Sindruhu-ndruhu wa iʼomasiʼö niha gulidanö ba faʼabölönia tebai musuʼa. Na simanö, hadia faduhu dödöda khö Lowalangi wa tola iʼehaogö dania nangi si no taʼunö? Baso artikel ”No Ifabuʼu Lowalangi Wa Lö Tebulö So Gulidanö”.