ITUGU TEKIKO GULIDANÖDA ANDRE
Asi
OYA gö niʼasogö nasi si tola taʼa, ba iʼasogö göi zi tola taʼogunaʼö ba wamazökhi dalu-dalu. Töra matonga oksigen ba zi sagörö ulidanö niʼasogö nasi, ba ihofo göi emisi karbon börö nifalua niha. Baero daʼö, irorogö göi iklim enaʼö lö tebulö-bulö.
Hana Wa Moguna Tarorogö Nasi
Faʼatebulö iklim tola so lua-luania ba terumbu karang, kerang hegöi ngawalö zauri si so ba nasi. Moloʼö ira peneliti, arakhagö mate fefu terumbu karang barö zi 30 fakhe mifönada. Sindruhunia, 25 persen ngawalö zauri si so ba nasi si no muʼila, ituhini ira terumbu karang.
Moloʼö niha sagatua-tua, arakhagö 90 persen wofo sangalui öra ba nasi, te no laʼa zasao moroi ba plastik. Ba ero röfi, zuta gurifö si so ba nasi mate börö zasao andrö.
Me döfi 2022, imane Sekretaris Jenderal Perserikatan Bangsa-Bangsa sotöi António Guterres, ”Ba zilalö ambö baga wondrorogöda asi, ba iadaʼa tarasoi lua-luania.”
Me Mufazökhi Gulidanö, Tola Iʼehaogö Ia Samösa
Me mufazökhi nasi hegöi ngawalö zauri ba daʼö, tola laʼehaogö ba larorogö samösa ira na lö itugu abölö wotaʼunöisi niha asi andrö. Itutunö buku Regeneration: Ending the Climate Crisis in One Generation, na so ösa nasi si lö göna limbah industri, ”tola manö alio ba nasi andrö ba wangehaogö yaʼia samösa”. Nehegö ösa duma-duma andre:
-
Mikroorganisme si so ba nasi lafotöi ia fitoplankton, tola ihofo karbon dioksida yaʼia daʼö gas si möi börö waʼalua pemanasan global. Faʼoya karbon dioksida nihofo fitoplankton, arakhagö fagölö waʼoyania simane faʼoya na muʼorudugö karbon dioksida nihofo geu, duʼu hegöi ngawalö zinanö sauri ba gulidanö.
-
Amatela giʼa si so ba nasi, bakteri zi manga daʼö irege lö taʼunö nasi. Aefa daʼö, bakteri andrö tobali ia ö gurifö tanö böʼö si so ba nasi. Moloʼö situs web Smithsonian Institution Ocean Portal, börö siklus daʼa wa ”lö tebulö ohahau nasi ba lö taʼunö”.
-
Keasaman nidanö nasi, tola ifakiko terumbu karang, kerang hegöi urifö tanö böʼö si so ba nasi. Oya gurifö si so ba nasi sangokhögö sistem pencernaan, tola iʼalösi keasaman nidanö nasi.
Famorege Nifalua Niha Iadaʼa
Tola fao ita ba wangalösi faʼoya zasao moroi ba plastik si so ba nasi, na taʼogunaʼö tasi naha zoguna na möi mowöli hegöi naha nidanö si tola muʼogunaʼö mato hauga kali
Lö moguna muʼehaogö nasi na lö hadöi sasao ba daʼö. Daʼö mbörö wa lafarou niha sato ira niha sagatua-tua enaʼö laʼogunaʼö tasi naha zoguna na möi mowöli, naha gö hegöi naha nidanö si tola muʼogunaʼö mato hauga kali, moroi na muʼogunaʼö naha gö hegöi naha nidanö nifazökhi moroi ba plastik si ha sakali muʼogunaʼö.
Hizaʼi lö ibönö na ha daʼö manö nifalua. Barö-barö daʼa, so sambua organisasi soʼamegö tödö lingkungan, sangowuloi sasao niʼohe ndrulu ba zinga nasi. Ba zi döfi, no laʼowuloi zasao mato 8.300 ton moroi ba zi 112 soi. Hizaʼi, faʼoya zasao niʼowuloira andrö ha seperseribu moroi ba waʼoya zasao nitiboʼö ba nasi ero röfi.
Moloʼö National Geographic ”tola manö tebai ifuli simane si toʼölö waʼalawa pengasaman [nidanö nasi] iadaʼa”. Perekonomian ba gulidanö teʼodaligö ba bahan bakar si no ide-ide böli. Hizaʼi, faʼataʼunö nasi börö nifalua niha no töra moroi ba waʼabölö gurifö si so ba nasi ba wangehaogö idanö nasi. Daʼa ”watandrisa si no abua dambai”.
Tötönafö moroi ba Zura Niʼamoniʼö
”Afönu gulidanö ngawalö nifazökhiu. Abakha sibai nasi ba ebolo,So ba daʼö gurifö segebua awö zide-ide.”—Sinunö 104:24, 25.
Asi hegöi faʼabölönia ba wangehaogö yaʼia samösa no omböila Zomböi yaʼita. Abölö oya niʼilania sanandrösa ba nasi hegöi ngawalö zauri si so ba daʼö. Na moloʼö yaʼugö, hadia tefaudu na mufaduhusi tödö wa so khönia waʼabölö ba wangehaogö faʼatekiko salua ba nasi? Faigi artikel ”No Ifabuʼu Lowalangi Wa Lö Tebulö So Gulidanö” ba ngaʼörö 15.
