ITUGU TEKIKO GULIDANÖDA ANDRE
Gatua
TOLA göi lafotöi gatua ”paru-paru dunia” (sotuhini faʼauri ba gulidanö). Hadia mbörö? Eu, tola ihofo karbon dioksida, gas si möi famakiko ba niha. Tola göi iʼasogö oksigen, gas sabölö moguna ba waʼauri. So mato 80 persen zinanö hegöi urifö sauri ba gatua. Na lö hadöi gatua, basaki tola auri ita.
Sangaʼasogö Faʼatekiko Gatua
So miliaran geu niʼobö ero röfi, ba sabölö oyania muʼogunaʼö danö andrö tobali lahan pertanian. Na tafaehusi zalua ba gulidanö iadaʼa faoma me döfi 1950, no ahori matonga gatua ba gulidanö.
Ba ginötö lafakiko sambua gatua, mate göi fefu si so ba daʼö.
Me Mufazökhi Gulidanö, Tola Iʼehaogö Ia Samösa
So ösa gatua si no muhori eu, tola ifuli iʼehaogö ia samösa. Barö-barö daʼa, no lasöndra ahli ekologi wa tola ifuli tumbu geu ba gatua si no muhori eu, ba lö ara ginötö niʼogunaʼö irege ifuli sökhi mangawuli. Nehegö duma-duma andre:
-
Oya gatua si no muʼobö eu ba labaliʼö danö andrö tobali lahan pertanian, hizaʼi ba gafuriata lö laʼogunaʼö saʼae danö andrö. So ba zi 2.200 lahan simane daʼö ba Amerika hegöi Afrika Barat si no lafareso ira niha sagatua-tua. Moloʼö hasil penelitianra nifaʼanö ba majalah Science, tola ifuli sökhi lahan andrö barö zi fulu fakhe. Baero daʼö, tola ifuli afönu ngawalö geu hegöi ngawalö zauri ba daʼö te mato 100 fakhe waʼara.
-
Barö-barö daʼa, no lanehegö ira ilmuwan ba Brasil hadia gamaehuta lahan si no mutanö eu moroi ba lahan si lö mutanö eu, hizaʼi tumbu samösa geunia. Imane National Geographic, ”Omuso dödö [ndra ilmuwan] me laʼila wa lö moguna latanö geu ba lahan si lö hadöi sinanö.” Ha ba zi lima fakhe, ”tola ifuli tumbu geu ba danö andrö, eu si toʼölö auri ba daʼö”.
Famorege Nifalua Niha Iadaʼa
Ba zi sagörö ulidanö, oya wamorege si no mufalua ba wondrorogö gatua si lö nasa tekiko ba mufuli mutanö geu ba gatua si no tekiko. Buania, moloʼö Perserikatan Bangsa-Bangsa, ”no alö wolobö eu töra 50 persen ba zi sagörö ulidanö” barö zi 25 fakhe andre.
Hizaʼi, lö ibönö wamorege si no mufalua ba wondrorogö gatua. Imane sambua laporan organisasi Global Forest Watch, ”Lö si tebulö waʼoya hutan tropis zi tekiko barö zi hauga fakhe.”
Triliun rupiah waʼebua gefe nisöndra ndra solobö eu hewaʼae na lö mutehegö ndra samatörö khöra ba wamalua daʼö. Börö wakhögusa andrö, oya hutan tropis si tekiko.
Tim nibeʼe noro dödö ba wondrorogö gatua falulu fohalöwö ira ba wolobö eu si no agatua ba lafuli latanö geu
Tötönafö moroi ba Zura Niʼamoniʼö
”Ifatumbuʼö moroi ba danö ngawalö geu si sökhi Lowalangi Yehowa, a bua geu si tola muʼa.”—1 Moze 2:9.
Me ifazökhi gatua Somböi yaʼita, itatugöi enaʼö lö aetu tatema mbuania sagötö lö tafakiko gatua. Omasi ia na terorogö gatua hegöi ngawalö zauri si so ba daʼö.
Itutunö Sura Niʼamoniʼö wa lö itehegö Lowalangi ba niha sangalui tana khönia ba wamakiko ulidanö hegöi ngawalö zauri si so ba daʼö. Faigi artikel ”No Ifabuʼu Lowalangi Wa Lö Tebulö So Gulidanö” ba ngaʼörö 15.
a Yehowa yaʼia daʼö töi Lowalangi.—Sinunö 83:18.
