Taʼameʼegö Tödö Niha Böʼö
HANA WA MOGUNA?
Na taʼameʼegö tödö niha böʼö, tola tatimbagö waʼudusa ba lö tanönö gabula dödö.
-
Imane Sura Niʼamoniʼö, ”Fanema li nihaogö ba möi fangalösi wönu, hizaʼi fehede si lö baga tobali fangandrö wönu.” (Amaedola 15:1) Simane bensin nihawui ba galitö, na ambö baga wehede hegöi amuatada ba niha, sasesenia iʼasogö gabula dödö sebua.
-
No irai iwaʼö Yesu, ”Hadia zi no fahöna ba dödö, daʼö zalua ba mbewe.” (Mataiʼo 12:34) Na ambö baga wehededa khö zi samösa niha, tola manö daʼö zangoromaʼö wa taʼokhögö wangera-ngera sambö tefaudu ba niha daʼö, te börö mado, soi, mazui lala waʼaurira si faböʼö moroi khöda.
Moloʼö survei Edelman Trust Barometer me 2023 sanandrösa ba zi 32.000 niha moroi ba zi 28 soi, töra matonga moroi ba gotaluara zangumaʼö wa amuata si lö baga ba falömangosinangegö niforomaʼö niha ba ginötö andre no fondrege waʼalösökhi.
SI TOLA ÖFALUA
Ameʼegö tödö fefu niha hewaʼae faehu lala wangera-ngerara moroi khöda. Ba ginötö fahuhuo ndraʼugö ba niha böʼö, tandraigö alui hadia manö zi fagölö ba lala wangera-ngerami. Daʼö zanolo yaʼugö enaʼö lö alio-lio manö khöu wangalui sala niha böʼö mazui öhuku ira.
Hadia zomasiʼö lafalua khöu niha böʼö, simane daʼö göi falua khöra. Na öfalua zi sökhi ba lö ebua dödö zambuana ndraʼugö ba niha böʼö, tola manö simane daʼö göi lafalua khöu.
Yatobali ndraʼugö niha somasi mangefaʼö sala. Na so niha sangumaʼö fehede sangafökhöiʼö tödöu mazui ifalua gamuata si lö baga, böi anemaiʼö so ba wangera-ngerau wa iʼodödögö wamalua daʼö. Forege ba wangokhögö fangera-ngera si sökhi sanandrösa ba niha daʼö.
NIFALUAMA
Laʼameʼegö tödö fefu niha ira Samaduhuʼö Yehowa, ba omasi ira latolo niha böʼö ba wamalua daʼö.
Omasiga mafaʼema informasi si teʼodane-dane ba Zura Niʼamoniʼö ba niha fefu ba lö maʼandrö gefe. Hizaʼi, lö mafaso niha enaʼö faduhu dödöra ba nifaduhusima tödö mazui latemaʼö lala wangera-ngerama. Maforege ba woloʼö mene-mene Zura Niʼamoniʼö ba ginötö fahuhuo ndraʼaga ’mahaogö wameʼe fanema li si fao sumange’.—1 Fetero 3:15; 2 Timoteo 2:24.
Lö mafaehu-faehusi niha. Matemaʼö gofu haniha manö zi möi ba gangowuloama na omasi ira lafahaʼö ba Zura Niʼamoniʼö. Maforege enaʼö ’mafosumange fefu niha’ hewaʼae no faböʼö-böʼö lala waʼaurira moroi khöma.—1 Fetero 2:17.
Mafosumange ndra samatörö. Duma-dumania, maʼoʼö huku ba mabuʼa pajak. (Roma 13:1) Hewaʼae lö ebua dödö zambuana ndraʼaga ba politik, lö maʼaohasi ba dödö gangetula niha böʼö sanandrösa ba daʼö.
