Taʼameʼegö Tödö Waʼauri
HANA WA MOGUNA?
Na tafalua ngawalö hadia ia zi möi famakiko mbotoda mazui si möi famaʼala niha böʼö, daʼö geluahania lö taʼameʼegö tödö waʼauri.
-
Foroko, tenga ha iʼasogö wökhö kanker hizaʼi tebai mbotoda ibeʼe ba wolawa fökhö. So mato 90 persen moroi ba gotalua niha si mate börö kanker paru-paru, yaʼira andre niha soroko mazui sasese mohofo simbo roko.
-
Ero röfi, ato niha si fawuka wangera-ngera börö penembakan masal. Iʼombakhaʼö Universitas Stanford ba Amerika Serikat, ”Moloʼö sambua penelitian, me alua aksi penembakan ba zekola, so ösa zi lö göna ba si lö mesokho hizaʼi fawuka wangera-ngerara ero maʼökhö hewaʼae no hauga fakhe numalö daʼö.”
-
Na iʼohe hondra mazui moto niha si no mabu mazui sangogunaʼö narkoba, tola ifaʼala niha sanörö moto mazui sanörö hondra tanö böʼö hegöi sanörö ahe. Niha simane daʼö, sindruhunia lö iʼameʼegö tödö waʼauri ba sasesenia niha böʼö zorasoi lua-lua nifaluania.
SI TOLA ÖFALUA
Rorogö mbotomö enaʼö lö mofökhöʼö. Böi waʼö tödöu wa tebai saʼae öbulöʼö zi toʼölö öfalua samakiko botou, simane foroko, fangogunaʼö vape (roko elektrik), femabu-mabu mazui fangogunaʼö narkoba. Niha si toʼölö mamalua daʼö, sindruhunia lö iʼameʼegö tödö waʼaurinia samösa hegöi niha ba zi fasuinia farahu nösi nomonia.
Angeragö enaʼö lö teʼala ndraʼugö hegöi niha böʼö. Enaʼö böi alua deʼala, böi tebulö rorogö nomomö enaʼö sökhi. Angelama ba ginötö öʼohe hondra mazui moto, ba böi tebulö öfareso hondra mazui motou hadia so zi tekiko mazui löʼö. Böi tedönisi dödöu wamalua hadia ia si tola mamaʼala yaʼugö mazui sangaʼasogö khöu faʼamate, hewaʼae na so niha samaso yaʼugö ba wamalua daʼö.
Foromaʼö waʼasökhi dödö. Na taʼameʼegö tödö waʼauri, hasambalö taforomaʼö waʼasökhi dödö ba niha böʼö gofu hadia madora, soi, mazui lala waʼaurira. Törö tödöu, oya alau waʼalösökhi hegöi fasuwöta ba gulidanö andre börö me so wanahö-nahö tödö hegöi fatiusa.
NIFALUAMA
Latolo niha böʼö ira Samaduhuʼö Yehowa enaʼö laʼokhögö lala waʼauri si sökhi ba lö alio mofökhö ira. Informasi si teʼodane-dane ba Zura Niʼamoniʼö nifaʼemama, tola möi fanolo ba niha ba wolawa faʼasandru hegöi ba wamöhöli ngawalö zi lö sökhi si toʼölö lafalua.
Maforege enaʼö lö teʼala waʼaurima ba ginötö mafalua wangotomosi. Ba ginötö mafazökhi nahia gangowuloama hegöi fasilitas tanö böʼö niʼogunaʼö ba wamahaʼö niha ba Zura Niʼamoniʼö, maʼoʼö goi-goi si tohude ba wolumöʼö faʼauri. Ira relawan samalua fangotomosi no lafahaʼö ira enaʼö lö teʼala ira ba wohalöwö. Lö mamalö göi mafareso fefu domosa niʼogunaʼöma hadia no tefaudu ba huku sanandrösa ba wolumöʼö faʼauri.
Mabeʼe wanolo ba waʼaniha. Me döfi 2022, maʼogunaʼö dolo-tolo te mato 180 miliar rupiah ba wanolo niha me alua mato 200 bencana ba zi sagörö ulidanö.
Me alua virus Ebola ba Afrika Barat me döfi 2014 hegöi ba Republik Demokratik Kongo me 2018, mabeʼe wanuturu lala enaʼö lö alio fatöfa wökhö si möi famaʼala andrö. Mafaʼema göi huhuo sebua tuhonia, ”Telumöʼö Waʼaurida Na Moloʼö Ita” ba mbanua niha Keriso khöma. Baero daʼö, mahenaigö göi naha wanasa danga föna mbawandruhö nahia gangowuloama, ba mafasugi göi ba dödöra wa moguna wanasa tanga hegöi ba wamalua tanö böʼö si tola molumöʼö faʼaurira.
Ba zi sambua siaran radio ba Sierra Leone, lasuno ndra Samaduhuʼö Yehowa börö me latolo ndra talifusöra ba wamati hegöi si tenga Samaduhuʼö Yehowa enaʼö lö göna khöra virus Ebola.
Sagötö alua waba Ebola ba Liberia me döfi 2014, no lahenaigö naha wanasa tanga ba nahia gangowuloa ndra Samaduhuʼö Yehowa
a Ba Timur Tengah me föna, moguna laʼoʼö goi-goi daʼa. Börö daʼö, moguna aboto ba dödöra hewisa enaʼö telumöʼö nösi nomora hegöi niha böʼö.
