Tefakao zi samösa niha börö gamuata nifaluania iadaʼa mazui me föna. Na lö saʼae iʼangeragö ngawalö nösi gulidanö, tola ikhamö moksa, eluahania teʼefaʼö ia moroi ba reinkarnasi.

Famakao yaʼia daʼö hukuma ba niha samalua horö mazui fanandraigö famati. Moloʼö Dr.  Sayyid Syeed, presiden Masyarakat Islam Amerika Utara, famakao andrö no famasugi ba dödö enaʼö ”lö olifu niha ba wangandrö saohagölö khö Lowalangi börö howu-howu nibeʼenia ba enaʼö latolo niha soʼamböta”.

Tefakao zi samösa niha börö gamuatania. So ösa niha Yahudi, faduhu dödöra wa tesusugi dania niha si lö fasala si göna famakao. So reinkarnasi ba wamahaʼö Kabbalah (nifaduhusi tödö niha Yahudi), irege tebeʼe ginötö ba zi hauga kali ba niha enaʼö ihöli zala nifaluania.

Lö tebulö tefakao zi samösa niha hewaʼae na ifuli tumbu ia ba zi hauga kali. Awena tebato daʼö na lö saʼae ifalua zi lö sökhi ba no mofozu ia ba wangeheta fangera-ngera hegöi ohitö dödö si fasala. Na si fao faʼatua-tua fefu nifaluania, oya ifalua zi sökhi, iʼokhögö wangera-ngera satulö, awena tola ikhamö nifotöi nirwana, eluahania lö saʼae tefakao ia.

Moloʼö A Dictionary of Comparative Religion, börö ”waʼalösökhi hegöi amuata niha gulidanö” andrö wa alua wamakao. Moloʼö famahaʼö Konghucu, tola alö wamakao na so zamalua si sökhi. Hewaʼae simanö, so ösa wamakao niʼasogö ”mboto eheha sabölö moroi ba niha, ba lö hadöi sinangea lafalua niha enaʼö teʼefaʼö ira, hasambalö lataögö manö börö me no daʼö zinehe khöra”.

Börö wakelemusa, andrö wa alua wamakao. Niha sangokhögö elemu tola ibeʼe harazaki mazui abula dödö. Hizaʼi, na mufalua ngawalö wasömbata, tola alö gabula dödö niʼasogöra. Faduhu dödöra wa dalu-dalu hegöi fasömbata nifalua duku, tola möi famadöhö niha nikelemui.

Moloʼö 1 Moze si so ba Zura Niʼamoniʼö, tefakao niha börö horö nifalua wongambatö siföföna. Hizaʼi, oya aliran zonönö famahaʼö daʼö moloʼö fangera-ngerara samösa. Duma-dumania, so ösa aliran Katolik lawaʼö wa famakao salua ba zi samösa niha tola ibaliʼö daʼö sumange khö Lowalangi enaʼö tefahowuʼö gereja ba telumöʼö niha böʼö.