Ato zi lö mamosumange Lowalangi börö me lawaʼö wa yaʼia zangaʼasogö famakao.

So zondröniaʼö ba agama samahaʼö wa tefakao niha gulidanö börö Lowalangi. Duma-dumania, so zangumaʼö:

• Bencana alam no hukuma moroi khö Lowalangi.

• Na mate ndraono, lawaʼö wa no ihalö ia Lowalangi enaʼö tobali malaʼika ba zorugo.

• So niʼoʼawögö Lowalangi na alua wasuwöta (no sambua famakao sebua ba niha).

Hizaʼi, hadia sindruhu fefu niwaʼö ndra sondröniaʼö ba agama andrö wa Lowalangi zi sala? Hewisa na lö tefaudu fefu niwaʼöra ba sindruhunia no itimbagö ira Lowalangi? Hadia tola nasa tafaduhusi tödö fefu niwaʼöra?

Tenga börö Lowalangi wa tefakao ita.

Tatu manö tenga Lowalangi zamalua daʼö börö me iʼokhögö gamuata simane:

’Satulö lala Lowalangi andrö fefu. . . . Satulö tödö ba sadölö tödö ia.’​—5 MOZE 32:4.

”Böi manö tawaʼö, ilau zi lö sökhi Lowalangi ba ifatörö zi lö atulö si lö ambö faʼabölö!”​—YOBI 34:10.

”Lö iwuʼai huku si lö ambö faʼabölö.”​—YOBI 34:12.

Itimbagö Lowalangi agama samöbögö si lö duhu sanandrösa khönia.

Farahu ba daʼö agama samahaʼö wa Lowalangi zangaʼasogö famakao hegöi agama sotuhini fasuwöta ba faʼalösökhi.

”Falimosa nifaʼeleʼö zamaʼeleʼö andrö ba döigu; tenga nifatengegu ira, lö niwaʼögu khöra, lö si hededo khöra . . . ba faetasa faya-faya ba faya nifakhai dödöra lafaʼeleʼö khömi!”​—YEREMIA 14:14.

Fatuwu Yesu ba agama samini tödö.

”Lö dozi molala dania ba Wamatörö Lowalangi ba zorugo andrö zoʼangaröfili töigu sangumaʼö, ’He Soʼaya! He Soʼaya!’ Ha samalua somasi Namagu andrö si so ba zorugo. Ato dania zangumaʼö khögu na luo daʼö, ’He Soʼaya! He Soʼaya! Hadia tenga töimö khöma ba wamaʼeleʼö, mafofanö malaʼika si lö sökhi ba döimö, ba oya dandra sahöli-höli dödö mafalua ba waʼabölö döimö?’ Ba umane khöra, ’Lö uʼila haniha ami! Yaʼami samalua si lö sökhi, miheta ami ba daʼa!’”—MATAIʼO 7:21-23.