Börö me lö omasi ita na tefakao niha si sökhi amuata. Baero daʼö, so zangumaʼö wa zaya-zaya gölö na tobali ita niha si sökhi amuata na ba gafuriatania tataögö wamakao.

So zangumaʼö wa famakao andrö no itatugöi Lowalangi. So göi zangumaʼö wa ibeʼe wamakao Lowalangi ba wanguhuku niha si lö sökhi hegöi ba wotandraigö famati niha si sökhi amuata. Hizaʼi, so göi zangumaʼö lö taʼila sibai hana wa tefakao göi niha si sökhi amuata, irege so wanofu:

• Na no mutatugöi fefu hadia ia, hadia gunania na taforege enaʼö lö mofökhö ita mazui ba wamalua si sökhi?

• Na Lowalangi andrö no faʼomasi, hana wa ibeʼe wanandraigö ba niha?

  ENAʼÖ ITUGU ÖʼILA

  Faigi video Hana Wa Itehegö So Wamakao Lowalangi? ba jw.org/nia.

Tenga hukuma moroi khö Lowalangi wamakao salua.

Sasesenia, wa tefakao zi samösa niha börö ginötö hegöi salua si lö mudöna-döna.

”No tenga ba zalio ahe wagohisa, ba tenga ba zabölö wanuwö, ba tenga göi ba zatua-tua gö, ba tenga ba zonekhe waʼebua ganaʼa, ba tenga ba zaboto ba dödö waʼebua dödö; no ha sambua ginötö ba no ha sara zi göna ira fefu.”​—ZANGOMBAKHA 9:11.

Börö me niha si lö moʼahonoa ita, andrö wa göna ita famakao.

Ato zangumaʼö wa ”horö” yaʼia daʼö amuata si lö baga. Hizaʼi, moloʼö Sura Niʼamoniʼö, ”horö” andrö göi no ondröita ba niha fefu, he niha si lö sökhi hegöi si sökhi.

”Hiza, fao zi lö atulö, me tumbu ndraʼo ba fao horö, me itemado inagu.”​—ZINUNÖ 51:7.

Tefakao sibai waʼaurida börö horö niʼokhögöda iʼotarai me tumbu.

Börö horö wa tola tekiko wahuwusada khö Zomböi yaʼita hegöi ba nawöda niha. Daʼö göi mbörö wa omasi niha wamalua sala. Lua-luania, tenga ha samösa zi göna famakao, hizaʼi fefu niha.

”Na omasi ndraʼo wamalua satulö, ba no ahatö khögu zi lö sökhi.”​—ROMA 7:21.

”Oi mangarö-ngarö fefu niwöwöi Lowalangi ba lataögö waʼafökhö.”​—ROMA 8:22.