Na ha börö gamuatara wa tola tefakao ira, eluahania tola laʼalösi wamakao salua khöra.

Hezo ndrege wa tola tawaʼö börö niha gulidanö wa alua zi hauga ngawua wamakao andre?

• Faʼalösökhi.

  Moloʼö Organisasi Kesehatan Dunia (WHO), 1 moroi ba gotalua zi 4 niha si no alawa döfi, no irai mufakao me iraono. Baero daʼö moloʼö WHO, 1 moroi ba gotalua zi 3 niha ndra alawe, no irai muhoröni mazui muböbözi, ba so göi zanaögö si dombua famakao andrö.

• Faʼamate.

  Iʼombakhaʼö World Health Statistics 2018 moroi ba WHO, ”Arakhagö 477.000 niha nibunu ba zi sagörö ulidanö me döfi 2016.” Baero daʼö, so mato 180.000 zi mate börö wasuwöta ba faʼakaliru salua ba ndröfi daʼö.

• Fökhö.

  Ba zi sambua artikel si so ba majalah National Geographic, isura Fran Smith, ”Töra satu miliar niha samadu roko. Börö mbago wa tola so ösa wökhö si möi famunu, simane fökhö tödö, simalapari, infeksi pernapasan hegöi kanker paru-paru.”

• Kesenjangan Sosial.

  Imane samösa psikolog sotöi Jay Watts, ”Ato zi fawuka fangera-ngera ba sabu tödö börö waʼanumana, me findra ira ba mbanua böʼö, fahindrisa, ba falöʼatulö nirasoira ha börö me faböʼö status sosial, soi, hegöi jenis kelamin.”

  ENAʼÖ ITUGU ÖʼILA

  Faigi video Hadia Gohitö Dödö Lowalangi Wa Ifazökhi Gulidanö? ba jw.org/nia.

Oya wamakao salua iadaʼa börö gamuata niha gulidanö.

Ato zi göna famakao börö gamatöröwa si lö sökhi, na dali zindruhunia lalumöʼö menaʼö nono mbanuara.

”Ibaliʼö ia samatörö awönia niha, ba wangalani yaʼia.”​— ZANGOMBAKHA 8:9.

Tola iʼalösi gabula dödönia niha gulidanö.

Mene-mene ba Zura Niʼamoniʼö sanolo yaʼita enaʼö lö alio mofökhö ba sökhi gamakhaitada ba niha böʼö.

”Faʼebolo dödö, ba no fangorifi mboto, ba faʼafökhö dödö, ba no faʼobou döla.”​—GAMAEDOLA 14:30.

”Miheta khömi waʼafökhö dödö, faʼabao dödö, fönu, feʼira-ira, falelesa, ba fefu ngawalö zi möi fangafökhö dödö.”​—EFESO 4:31.