Hizaʼi, na lö tefaudu wangogunaʼömö teknologi tola . . .

• manö lö inötömö khö woʼomomö.

• manö tetaha ndraʼugö ba halöwömö.

• manö manahö-nahö dödö ngambatöu ba fabali ami.

INÖTÖ

Imane foʼomo ira matua sotöi Michael, ”Ba ginötö fao ndraʼaga woʼomogu, itaria hulö zi lö yaʼia. No arörö manö ia ba HP-nia. Asese imane, ’Iʼotarai mege manö lö fakhamö ubokai HP-gu.’” Samösa woʼomo ira matua sotöi Jonathan sameʼe bua gera-erania ba zalua andrö. Imane, ”Hewaʼae no fao ira ngambatönia, yaʼira andrö amaedola zi so ba nahia si faböʼö.”

ANGERAGÖ: Ba ginötö fao ami ngambatöu, hawaʼasese mangoloi wangera-ngeramö ha börö-börö HP mazui pesan sofeta ba HP-mö?​—EFESO 5:33.

HALÖWÖ

So ngawalö halöwö si no mutatugöi si lö tola löʼö mufalua gofu hawaʼara ba gofu hezo so. Hewaʼae lö fefu halöwö simane daʼö, hizaʼi so halöwö si tebai muröi ba lö tola löʼö muʼasiwai ba zi maʼökhö daʼö. Na lö awai ba zi maʼökhö daʼö ba mutohugö ba zi bongi. Samösa woʼomo ira matua sotöi Lee imane, ”Na ha daru-darua ndraʼaga foʼomogu, asese adöni dödögu wamaigi SMS mazui na so telefo moroi ba nahia wohalöwögu.” Baero daʼö, samösa woʼomo ira alawe sotöi Joy imane, ”Asese olifudo ginötö börö me ba nomo mohalöwödo. Abua sibai khögu wombagi inötö ba nösi nomogu hegöi ba halöwögu.”

ANGERAGÖ: Ba ginötö fahuhuo ngambatömö, hadia sindruhu-ndruhu öfondrondrongo niwaʼönia?​—LUKA 8:18.

LÖ FARÖI

Moloʼö sambua survei, ato zongambatö si faʼudu börö me manahö-nahö dödöra khö woʼomora me no ibeʼe posting ba media sosial. So ösa zangumaʼö wa lö omasi ira na laʼila foʼomora hadia zi no la-posting andrö.

Daʼö mbörö wa so zangumaʼö, media sosial andrö amaedola ”langu yomo ba nomo”. Mendrua manö tola faʼero dödö zongambatö börö media sosial. Sinangea manö na lawaʼö ira pengacara wa media sosial andrö zi tobali börö wa alua wabalisa iadaʼa.

ANGERAGÖ: Hadia öbini-biniʼö ndraʼugö khö woʼomou na fahuhuo ndraʼugö ba zi tenga foʼomomö?​—AMAEDOLA 4:23.

OFÖNAIʼÖ ZABÖLÖ MOGUNA

Tola göna fökhö zi samösa niha na lö tatu ginötö wemangania. Simanö göi niha si lö mameʼe inötönia khö ngambatönia, tola tekiko wongambatöra.​—Efeso 5:28, 29.

Mifatunö darua ami ngambatöu wanuturu lala si so ba daʼa, aefa daʼö mifili hadia zinangea miʼoʼö, mazui sura hadia manö zinangea mifalua enaʼö lö ifakiko wongambatömi teknologi.

• Fao ami wemanga si löʼö-löʼönia sakali maʼökhö

• Tatugöi ginötö enaʼö lö öʼogunaʼö HP

• Tatugöi ginötö wefao ba zi darua ami

• Bunu HP-mö ba zi bongi ba aröuʼö moroi ba naha wemörö

• Si löʼö-löʼönia, ogunaʼö ginötö 15 menit ba wahuhuosa ba böi so HP ba zingamö

• Tatugöi ginötö ero maʼökhö enaʼö lö muʼogunaʼö Internet