So ösa ndra sagatua-tua sangumaʼö wa no tatu hadia zalua ba niha sorasoi abula dödö börö waʼamate niha niʼomasiʼöra. Hizaʼi sindruhunia, no faböʼö-böʼö lala wangoromaʼö niha faʼabu dödöra. Alua daʼö tenga börö me lö abu sibai dödöra mazui labini-biniʼö nösi dödöra. Sindruhu sa, tola alö waʼabu dödöda na tatemaʼö zi no alua ba tatutunö waʼabu dödö nirasoida. Hizaʼi, lö fagölö-gölö manö wangoromaʼö niha faʼabu dödö nirasoira. Teʼodaligö daʼö moloʼö si toʼölö mufalua, amuatara, si no irai alua khöra, ba hadia mbörö wa mate niha niʼomasiʼöra.

Te lö taʼila hadia dania zalua khöda na mate niha niʼomasiʼöda. Hizaʼi, datafaigi hadia zi toʼölönia larasoi niha si göna abula dödö ba hadia manö daha-taha nitaögöra.

Faʼabu dödö sabölö-bölö. Te meʼe ita ba itörö-törö manö tödöda niha niʼomasiʼöda si no mate. Tola manö tebulö-bulö nirasoida, ba itugu abu dödöda na itörö tödöda ia ba zi lö tadöna-döna mazui taʼangifigö ia. Ba wamobörö, tokea ita ba lö faduhu dödöda. Daʼö nirasoi Tina me mate woʼomonia Timo ba zi lö idöna-döna. Imane, ”Ba wamobörö, atata dölagu irege tebai ulau meʼe. Itaria abu sibai dödögu irege lö uʼila ufahasu ndraʼo. Lö faduhu dödögu zalua andrö.”

Mofönu ba fatahi-tahi manö. Imane Ivan, ”Mate nonoma ono matua sotöi Eric me 24 fakhe ndröfinia. Aefa daʼö, mofönu-fönu manö ndraʼo hegöi foʼomogu Yolanda. Ahöli dödöma börö me tenga simane daʼö ndraʼaga zi toʼölönia. Fatahi-tahi manö ndraʼaga börö me so nasa zi tola mafalua menaʼö ba wanolo onoma andrö.” Simane daʼö göi nirasoi Alejandro. Ara ba wökhö woʼomonia, ba gafuriata mate ia. Imane Alejandro, ”Ba wamobörö, umane tödögu wa so zala si no ufalua irege itehegö alua khögu wamakao Lowalangi. Hizaʼi aefa daʼö, maniasado börö me no utahigö Lowalangi.” Imane Kostas nitutunö ba artikel siföföna, ”Mato hauga kali mofönu ndraʼo khö Sophia börö me no iröi ndraʼo. Ba gafuriata, maniasado börö me uʼila wa tenga börö ia wa alua daʼö.”

Faʼafawuka wangera-ngera. So ginötönia te lö taʼokhögö wangera-ngera si sökhi ba lö tatemaʼö zalua. Duma-dumania, hulö tarongo linia ba taʼila-ila nasa niha niʼomasiʼöda andrö si no mate, ba tarasoi wa fao-fao ia khöda. Baero daʼö, te lö taʼila taʼosambuaʼö wangera-ngerada ba asese olifu ita. Imane Tina, ”Itaria na fahuhuo ndraʼo, molaya wangera-ngeragu. Itörö-törö manö tödögu ngaluo waʼamate Timo. Lua-luania, fawuka gera-eragu börö me lö uʼila uʼosambuaʼö dödögu.”

Lö fariawö ba niha. Te agalio mofönu ita mazui lö omasi ita na so niha böʼö si fao khöda. Imane Kostas, ”Na fao ndraʼo ba niha si no mangowalu, urasoi wa ha yaʼo-yaʼo. Hizaʼi, na fao ndraʼo ba niha si lö sangowalu, lö göi usöndra waʼomuso dödö.” Imane Yolanda, foʼomo Ivan, ”Aukhu dödögu na so niha samatunö-tunö abula dödöra si no ide-ide moroi ba zalua khöma! Baero nasa na ladunö-dunö sanandrösa ba ndraonora. Sindruhu sa wa fao ndraʼo khöra ba waʼomuso dödö. Hizaʼi, abu göi dödögu börö me itörö tödögu nonoma. Yaʼo hegöi Ivan, aboto ba dödöma wa moguna mataögö zalua ba waʼaurima andre. Hizaʼi, lö omasiga na marongo-rongo huhuo simane daʼö.”

Fökhö mboto. Tola manö areu ita wemanga, afuo mbotoda, ba lö taʼila mörö. Itörö tödö Aaron hadia nirasoinia sagötö zi döfi faʼara me no mate bapania. Imane, ”Lö uʼila mörö. Maoso ndraʼo ero bongi ba ginötö si fagölö börö me itörö-törö manö tödögu bapagu.”

 Irasoi Alejandro wa mofökhö ia, hizaʼi lö iʼila hadia wökhö si göna yaʼia. Imane, ”No hauga kali möido khö doto, ba ifatunö khögu wa lö fökhö-fökhögu. Te börö gabula dödö salua khögu wa mofökhö ndraʼo.” Ba gafuriata, taya manö wökhö nirasoinia. Feʼamöi Alejandro khö doto no angetula si tefaudu. Na tarasoi waʼabu dödö, tola alö waʼabölöda, itugu abölö-bölö wökhö si no so ba mbotoda, mazui göna ita fökhö tanö böʼö.

Erege dödö wamalua halöwö sabölö moguna. Imane Ivan, ”Me mate nonoma, moguna mafatunö daʼö ba nösi nomoma hegöi khö ndra awö-awöma, simanö göi khö gafalo Eric ba wohalöwö awö zokhö omo niʼokosinia. Oya göi zura-sura nifoʼösima. Aefa daʼö, maföfögö gama-gama Eric. Lö tola löʼö maʼohalöwögöigö daʼö, hewaʼae na no marase wangera-ngerama, tödöma, hegöi botoma.”

Baero daʼö, so ösa niha sanaögö abula dödö tanö böʼö. Iadaʼa, yaʼira zombambaya halöwö si toʼölö ifalua niha si no mofanö andrö. Daʼö zalua khö Tina. Imane, ”Timo zasese möi ba bank ba samalua halöwö tanö böʼönia. Iadaʼa, yaʼo samösa zamalua daʼö. Itugu fawuka gera-eragu. Ataʼudo alai na fawuka dania wamaluagu fefu daʼö.”

Simane si no mututunö, na mate niha niʼomasiʼöda, tola manö tefakao gera-erada, tödöda, hegöi botoda. Sindruhu-ndruhu wa abua sibai wanaögö abula dödö na mate niha niʼomasiʼöda. Hizaʼi, na aboto ba dödöda hadia dania zalua khöda na mate niha niʼomasiʼöda, tola so khöda waʼabölö ba wanaögö abula dödöda. Törö tödöu, lö dozi niha oi alua khöra fefu zi no tatutunö andre. Hizaʼi, na simane daʼö nirasoida, böi taʼaombösi tödö börö me no sinangea fefu daʼö.

Si tola alua: Tenga irugi zi lö aetu tarasoi waʼabu dödö börö waʼamate niha niʼomasiʼöda. Ba gafuriata, hasambalö alö waʼabu dödöda andrö. Tenga daʼö geluahania wa sindruhu-ndruhu ”döhö” waʼabu dödöda mazui taʼolifugö niha niʼomasiʼöda. Hizaʼi arara manö, alö waʼabu dödö nirasoida. Sindruhu sa, tola manö ifuli tarasoi waʼabu dödö ero na itörö tödöda ia, duma-dumania ba ngaluo wanörö tödö fangowaluda. Hizaʼi si toʼölönia, hasambalö ifuli tarasoi waʼahono dödö irege tola tafalua halöwöda sero maʼökhö. Tola tarasoi daʼö mendrua manö na tatema wanolo moroi ba nösi nomoda hegöi ira si fahuwu khöda, ba taforege enaʼö ifuli abölö ita.

Hawaʼara döhö zokhogu andre? So ösa zorasoi wa ibörötaigö alö waʼabu dödöra mato hauga waŵa aefa daʼö. Hizaʼi, ato göi zanaögö faʼafökhö mato döfi, dua fakhe, mazui töra moroi ba daʼö. * Imane Alejandro, ”Awena alö waʼabu dödögu me no numalö zi tölu fakhe.”

Foromaʼö waʼebolo dödö ba khöu samösa. Osambuaʼö dödöu ba waʼaurimö iadaʼa ba böi aombösi tödö zalua mahemolu. Törö tödöu, tenga sagötö faʼara örasoi waʼabu dödö börö waʼamate niha niʼomasiʼöu. Iadaʼa, datatutunö hadia manö zi tola tafalua enaʼö alö gabula dödöda, ba lö talafo ara tarasoi waʼabu dödö.