FANOLO BA NIHA SI GÖNA FANGABU DÖDÖ

Fanolo Fondrege zi Sökhi ba Niha si Göna Fangabu Dödö

FUTA

BARÖ-BARÖ DAʼA, ASESE LAFARESO IRA SAGATUA-TUA HEWISA WAʼAFÖKHÖ NIRASOI ZI SAMÖSA NIHA BÖRÖ WAʼAMATE NIHA NIʼOMASIʼÖRA. Simane si no mututunö, fanuturu lala si sökhi nibeʼe ndra niha sagatua-tua, sasesenia tefaudu daʼö ba mene-mene si no ara tesura ba Zura Niʼamoniʼö. Daʼa zangoromaʼö wa moguna khöda irugi maʼökhö mene-mene Zura Niʼamoniʼö. Hizaʼi, tenga ha mene-mene si sökhi zi so ba Zura Niʼamoniʼö. So göi wanuturu lala mazui turia si lö tesöndra ba danö böʼö sameʼe faʼahono dödö ba niha si göna fangabu dödö.

Lö tefakao niha niʼomasiʼöda si no mate

Imane Sura Niʼamoniʼö ba Zangombakha 9:5, ”Niha si no mate lö laʼila hadia ia.” Iwaʼö göi wa ”awai nikhoi dödöra”. (Sinunö 146:4) Daʼö mbörö wa iʼamaedolagö niha si no mate andrö Sura Niʼamoniʼö simane niha si no mörö.—Yohane 11:11.
Ibeʼe khöda wondrara dödö Lowalangi sebua faʼomasi

Imane Sura Niʼamoniʼö ba Zinunö 34:15, ”Ifaigi-faigi Yehowa * niha satulö, ba ibeʼe mbörö dalingania ba weʼaora ba wangandrö fanolo.” Tafaehagö nösi dödöda khö Lowalangi ba wangandrö, tenga ha enaʼö döhö sabata gabula dödöda mazui enaʼö ahono wangera-ngerada. Sindruhunia, daʼa lala sabölö sökhi ba wamakhai fahuwusada khö Zomböi yaʼita, si tola mangogunaʼö faʼabölönia ba wanolo yaʼita.
So dötönafö si sökhi nidöna-dönada ba zi so miföna

Khalaigö atö, ba zi so miföna niha si no mate ifuli auri ira ba gulidanö! No hauga kali itötöi mbuʼusa li daʼö Sura Niʼamoniʼö. Hewisa dania gulidanö andre ba zi so miföna? Itutunö Sura Niʼamoniʼö wa Lowalangi dania ’zolosi tawa hörö fefu ba höröda. Lö hadöi saʼae faʼamate, faʼabu dödö, fege-ege, mazui fökhö’.—Famaʼeleʼö 21:3, 4.

Niha si faduhu tödö khö Yehowa, Lowalangi nitötöi ba Zura Niʼamoniʼö, tola lataögö gabula dödö salua khöra börö me faduhu dödöra wa ifuli falukha ira ba niha niʼomasiʼöra si no mate. Duma-dumania, no mate woʼomo Ann, 65 fakhe me no mangowalu ira. Imane, ”Sura Niʼamoniʼö zameʼe khögu faʼafaduhu dödö wa lö tefakao niha si no mate, lö irai iʼolifugö ira Lowalangi, ba hasambalö isusugi ira. Daʼa niʼangeragögu ero abu dödögu. Buania, tola utaögö gabula dödö salua khögu hewaʼae na daʼö zabölö abua ba waʼaurigu!”

Imane Tina, si no mutötöi ba artikel si no tataluʼi, ”Iʼotarai me no mate Timo, urasoi samösa wanolo moroi khö Lowalangi. Sindruhu-ndruhu urasoi wanolo Yehowa ba ginötö ahöndrö ndraʼo ba waʼabu dödö. Lö olifu ndraʼo mbuʼusa li Zura Niʼamoniʼö sanandrösa ba wanusugi. Daʼö zameʼe khögu faʼanau gölö irege falukha ndraʼaga zui dania Timo.”

Sindruhunia, so nasa zuta niha si faduhu tödö wa hasambalö alua mbuʼusa li Zura Niʼamoniʼö. Te öwaʼö tödöu wa tebai tafaduhusi tödö mbuʼusa li Zura Niʼamoniʼö andrö mazui ha fangifi daʼö. Hizaʼi, sökhi na öfareso hadia manö dandra wa sindruhu mene-mene hegöi buʼusa li Zura Niʼamoniʼö. Tola manö ösöndra wanolo si tefaudu ba Zura Niʼamoniʼö ba wanaögö abula dödö börö me no mate niha niʼomasiʼöu.